ഇന്ത്യയും ഇസ്രായേലും തമ്മിലുള്ള സൈനിക-പ്രതിരോധ ബന്ധം കൂടുതൽ ശക്തമാക്കുന്നതിനുള്ള പുതിയ പ്രതിരോധ റോഡ്മാപ്പിന് ഇരുരാജ്യങ്ങളും രൂപം നൽകി. ഇതിന്റെ ഭാഗമായി ഇന്ത്യ സന്ദർശിച്ച ഇസ്രായേൽ പ്രതിരോധ മന്ത്രാലയം ഡയറക്ടർ ജനറൽ റിട്ട. മേജർ ജനറൽ അമീർ ബരാം, പ്രതിരോധ മന്ത്രി രാജ്നാഥ് സിംഗുമായി ന്യൂഡൽഹിയിൽ വെച്ച് കൂടിക്കാഴ്ച നടത്തി. അത്യാധുനിക സാങ്കേതികവിദ്യകൾ പങ്കുവെക്കൽ, സംയുക്ത ആയുധ നിർമ്മാണം, സൈനിക പരിശീലനം എന്നിവയിലൂന്നിയുള്ള സഹകരണമാണ് പുതിയ കരാറിലൂടെ ലക്ഷ്യമിടുന്നത്.
ഇന്ത്യയുടെ ‘ആത്മനിർഭർ ഭാരത്’ പദ്ധതിക്ക് കരുത്തുപകരാൻ ഇസ്രായേലിന്റെ മിസൈലുകൾ, ഡ്രോണുകൾ, സൈബർ സുരക്ഷാ സാങ്കേതികവിദ്യകൾ എന്നിവ സഹായിക്കും. നിലവിലുള്ള റഷ്യൻ, പാശ്ചാത്യ പ്രതിരോധ സംവിധാനങ്ങളിലേക്ക് ഇസ്രായേലിന്റെ അത്യാധുനിക സെൻസറുകളും റഡാറുകളും സംയോജിപ്പിക്കുന്ന രീതിയാണ് ഇന്ത്യയ്ക്ക് ഏറെ പ്രയോജനപ്പെടുക. പ്രാദേശിക സുരക്ഷാ വെല്ലുവിളികളെ നേരിടാനും ഇന്ത്യൻ സായുധ സേനയെ ആധുനികവൽക്കരിക്കാനും ഈ തന്ത്രപ്രധാന പങ്കാളിത്തം വഴിയൊരുക്കുമെന്നാണ് വിലയിരുത്തൽ.
India and Israel establish a new defence roadmap focusing on joint weapon production, military training, and high-tech transfers during talks in New Delhi.
