ഇന്ത്യയും സൗദി അറേബ്യയും തമ്മിൽ ജലവിഭവ മാനേജ്മെന്റ് രംഗത്തെ സഹകരണം ശക്തമാക്കാൻ ധാരണാപത്രം ഒപ്പുവെച്ചു. ജിദ്ദയിൽ നടന്ന ‘സൗദി വാട്ടർ വീക്ക്’ അന്താരാഷ്ട്ര സമ്മേളനത്തിനിടയിലാണ് ഇരുരാജ്യങ്ങളും തമ്മിലുള്ള തന്ത്രപ്രധാനമായ ഈ കരാർ ഒപ്പുവെച്ചത്. ജലവിഭവ ആസൂത്രണം, സുസ്ഥിര ജല മാനേജ്മെന്റ്, കാര്യക്ഷമമായ ജലസേചന ശൃംഖലകൾ എന്നിവയിലെ പരസ്പര സഹകരണമാണ് ഈ ധാരണാപത്രത്തിലൂടെ ലക്ഷ്യമിടുന്നത്. വർദ്ധിച്ചുവരുന്ന ആഗോള ജലപ്രതിസന്ധികൾ നേരിടാൻ ഇരുരാജ്യങ്ങളിലെയും സ്ഥാപനങ്ങൾ തമ്മിൽ സാങ്കേതിക വൈദഗ്ധ്യവും മികച്ച പ്രവർത്തനരീതികളും കൈമാറാൻ ഈ കരാർ സഹായിക്കുമെന്ന് അധികൃതർ വ്യക്തമാക്കി. മികച്ച ജലസംരക്ഷണ മാർഗ്ഗങ്ങൾ രൂപീകരിക്കുന്നതിനും ഇരുരാജ്യങ്ങളിലെയും ശേഷി വികസനം വേഗത്തിലാക്കുന്നതിനും ഈ സുപ്രധാന ചുവടുവെപ്പ് വഴിയൊരുക്കും.
ഇന്ത്യയുടെ സൗദി അംബാസഡർ ഡോ. സുഹേൽ ഖാനും സൗദി പരിസ്ഥിതി, ജല, കൃഷി മന്ത്രി എൻജിനീയർ അബ്ദുൽറഹ്മാൻ അബ്ദുൽമൊഹ്സിൻ അൽഫദ്ലിയുമാണ് ധാരണാപത്രത്തിൽ ഒപ്പുവെച്ചത്. ജിദ്ദയിലെ ഇന്ത്യൻ കോൺസൽ ജനറൽ ഫഹദ് സൂരി ഉൾപ്പെടെയുള്ള പ്രമുഖ നയതന്ത്രജ്ഞരും ചടങ്ങിൽ സന്നിഹിതരായിരുന്നു. ഊർജ്ജം, വ്യാപാരം, നിക്ഷേപം തുടങ്ങിയ മേഖലകളിൽ ഇരുരാജ്യങ്ങളും തമ്മിൽ നിലവിലുള്ള ശക്തമായ പങ്കാളിത്തത്തിന് പുതിയ കരാർ കൂടുതൽ കരുത്തുപകരും.e
India and Saudi Arabia signed a strategic MoU at the Saudi Water Week in Jeddah to boost cooperation in water resource planning, sustainability, and efficient irrigation.
