ഗ്രാമീണ മേഖലകളിൽ പുതിയ നിർമ്മാണ സംസ്കാരവും തൊഴിൽ വൈദഗ്ധ്യവും വളർത്തിയെടുക്കുക എന്ന ലക്ഷ്യത്തോടെ ജപ്പാനിലെ ചെറുകിട-ഇടത്തരം കമ്പനികളെ ഇന്ത്യൻ ഗ്രാമങ്ങളുമായി ബന്ധിപ്പിക്കാൻ ഒരുങ്ങി പ്രമുഖ ഐടി കമ്പനിയായ സോഹോയുടെ (Zoho) സഹസ്ഥാപകനും സിഇഒയുമായ ശ്രീധർ വെമ്പു. ഇതിന്റെ ഭാഗമായി ജപ്പാനിലെ ചെറുകിട നഗരങ്ങളിലെ ബിസിനസുകളുമായി പങ്കാളിത്തം സ്ഥാപിക്കുന്നതിനും അവരുടെ സാങ്കേതിക വൈദഗ്ധ്യം ഇന്ത്യൻ ഗ്രാമങ്ങളിലേക്ക് എത്തിക്കുന്നതിനുമായി അദ്ദേഹം ജപ്പാൻ സന്ദർശനം നടത്തും.
സൂക്ഷ്മമായ നിർമ്മാണ മേഖലകളിൽ (Precision Manufacturing) ലോകോത്തര നിലവാരമുള്ള ജാപ്പനീസ് കമ്പനികളുടെ അനുഭവസമ്പത്ത് ഇന്ത്യയിലെ ചെറുപട്ടണങ്ങളിലെ ജനങ്ങൾക്ക് പകർന്നുനൽകുകയാണ് ഈ പദ്ധതിയിലൂടെ ലക്ഷ്യമിടുന്നത്. പരമ്പരാഗത കരകൗശല-നിർമ്മാണ സംസ്കാരം പുനരുജ്ജീവിപ്പിക്കാൻ ആഗ്രഹിക്കുന്ന ഈ സംരംഭത്തിന്, ദശാബ്ദങ്ങളായി ജപ്പാനിൽ ബിസിനസ്സ് ചെയ്യുന്ന അദ്ദേഹത്തിന്റെ സുഹൃത്ത് ബ്രിട്ടോയാണ് (Takumi Motion Controls സ്ഥാപകൻ) വഴികാട്ടിയാകുന്നത്.
വലിയ നഗര കേന്ദ്രീകൃതമായ ഐടി വികസനത്തിന് പകരം ഗ്രാമങ്ങളുടെ വികസനത്തിനും വികേന്ദ്രീകരണത്തിനും മുൻഗണന നൽകുന്ന ശ്രീധർ വെമ്പുവിന്റെ ദീർഘകാല നയങ്ങളുടെ തുടർച്ചയാണ് ഈ പുതിയ ജപ്പാൻ ദൗത്യം. തമിഴ്നാട്ടിലെ തെങ്കാശി ഉൾപ്പെടെയുള്ള ഗ്രാമീണ മേഖലകളിൽ നേരത്തെ തന്നെ വിജയകരമായി ടെക്നോളജി സെന്ററുകൾ സ്ഥാപിച്ച് ഗ്രാമീണ പ്രതിഭകളെ മുഖ്യധാരയിലേക്ക് കൊണ്ടുവന്ന ചരിത്രവും സോഹോ കമ്പനിക്കുണ്ട്.
Zoho Founder Sridhar Vembu plans a Japan mission to connect Japanese precision manufacturing SMEs with rural Indian talent, driving economic decentralization.
