ഇന്ത്യയിൽ നിന്നുള്ള E20 പെട്രോൾ (20 ശതമാനം എഥനോൾ ചേർത്ത ഇന്ധനം) ഇറക്കുമതി ചെയ്യാൻ ഭൂട്ടാൻ വിസമ്മതിച്ചു എന്ന വാർത്തകളെച്ചൊല്ലി കേന്ദ്ര പെട്രോളിയം മന്ത്രാലയവും ഭൂട്ടാനിലെ പ്രമുഖ മാധ്യമവും തമ്മിൽ തർക്കം മുറുകുന്നു. ഭൂട്ടാൻ ഇത്തരമൊരു ഓഫർ നിരസിച്ചിട്ടില്ലെന്നും, ഇന്ത്യൻ എണ്ണക്കമ്പനികൾ (OMCs) ഭൂട്ടാനിലേക്ക് ഇന്ധനം കയറ്റുമതി ചെയ്യാൻ യാതൊരു നിർദ്ദേശവും മുന്നോട്ട് വെച്ചിട്ടില്ലെന്നും വ്യക്തമാക്കിക്കൊണ്ട് കേന്ദ്ര പെട്രോളിയം മന്ത്രാലയം തങ്ങളുടെ സോഷ്യൽ മീഡിയ അക്കൗണ്ടുകളിലൂടെ ‘ഫാക്ട് ചെക്ക്’ പുറത്തുവിട്ടു.
സംഭരണ ശൃംഖലയിലെയും ഇന്ധനം കൈകാര്യം ചെയ്യുന്നതിലെയും ആശങ്കകൾ കാരണം, എഥനോൾ കലർന്ന E20 ഇന്ധനത്തിന് പകരം സാധാരണ പെട്രോൾ വിതരണം ചെയ്യുന്നത് തുടരാൻ ഭൂട്ടാൻ സർക്കാർ ഇന്ത്യൻ പൊതുമേഖലാ ഇന്ധന വിതരണക്കാരോട് ആവശ്യപ്പെട്ടു എന്ന തരത്തിൽ ‘ദി ഭൂട്ടാനീസ്’ (The Bhutanese) പത്രം വാർത്ത നൽകിയതിനെത്തുടർന്നാണ് മന്ത്രാലയം ഈ വിശദീകരണവുമായി രംഗത്തെത്തിയത്. ഈ വാർത്ത ഇന്ത്യയിലെ ചില രാഷ്ട്രീയ നേതാക്കളും സോഷ്യൽ മീഡിയ ഉപയോക്താക്കളും ഏറ്റെടുക്കുകയും, എഥനോൾ മിശ്രിത പദ്ധതിയെച്ചൊല്ലി സർക്കാരിനെതിരെ രംഗത്തുവരികയും ചെയ്തിരുന്നു.
എന്നാൽ, സംഭരണ ശേഷിയിലെ പരിമിതികളും വാഹനങ്ങളുടെ സുരക്ഷയും മുൻനിർത്തി ഇന്ത്യയിലെ പൊതുമേഖലാ സ്ഥാപനങ്ങളോട് സാധാരണ പെട്രോൾ തന്നെ തുടർന്നും നൽകണമെന്ന് ഭൂട്ടാൻ ആവശ്യപ്പെട്ടിരുന്നു എന്ന റിപ്പോർട്ടിൽ തങ്ങൾ ഉറച്ചുനിൽക്കുന്നതായി ഭൂട്ടാനീസ് മാധ്യമത്തിന്റെ എഡിറ്റർ തെൻസിങ് ലാംസാങ് പ്രതികരിച്ചു. ഭൂട്ടാൻ ട്രേഡ് ഡിപ്പാർട്ട്മെന്റിൽ നിന്നുള്ള രേഖകൾ പങ്കുവെച്ചുകൊണ്ടാണ് മാധ്യമം തങ്ങളുടെ വാദത്തെ ന്യായീകരിക്കുന്നത്.
എഥനോൾ അടങ്ങിയ ഇന്ധനം ഈർപ്പം വലിച്ചെടുക്കാൻ സാധ്യതയുള്ളതിനാൽ നിലവിലെ ഭൂഗർഭ സംഭരണികൾ ഇതിന് അനുയോജ്യമല്ലെന്നും, അതിനാൽ ഇന്ത്യയിൽ സാധാരണ പെട്രോൾ ലഭ്യമാകുന്നിടത്തോളം കാലം അത് തന്നെ നൽകണമെന്ന് സാങ്കേതിക യോഗങ്ങളിൽ ആവശ്യപ്പെട്ടിട്ടുണ്ടെന്നും ഭൂട്ടാൻ വ്യക്തമാക്കുന്നു. അതേസമയം, രാഷ്ട്രീയ വിവാദങ്ങൾക്കും വാഹന ഉടമകളുടെ ആശങ്കകൾക്കും വഴിവെച്ച ഈ വിഷയത്തിൽ, കർഷകർക്ക് ഗുണകരമാകുന്ന എഥനോൾ പദ്ധതിക്കെതിരെ ചില നിക്ഷിപ്ത താല്പര്യക്കാരാണ് വ്യാജപ്രചാരണം നടത്തുന്നതെന്ന് കേന്ദ്ര മന്ത്രിമാരായ ഹർദീപ് സിങ് പുരിയും നിതിൻ ഗഡ്കരിയും ആരോപിച്ചു. വിപുലമായ പരിശോധനകൾക്ക് ശേഷമാണ് E20 ഇന്ധനം വിപണിയിലെത്തിച്ചതെന്നും ഇത് പൂർണ്ണ സുരക്ഷിതമാണെന്നും മന്ത്രാലയം ആവർത്തിച്ചു.
മൈലേജ് കുറയുന്നതായും എഞ്ചിൻ കേടുപാടുകൾ സംഭവിക്കുന്നതായും ചില വാഹന ഉടമകളിൽ നിന്ന് പരാതികൾ ഉയർന്നതിനെത്തുടർന്ന് രാജ്യത്ത് E20 പെട്രോളിനെക്കുറിച്ച് വലിയ ചർച്ചകൾ നടക്കുന്നതിനിടയിലാണ് മന്ത്രാലയത്തിന്റെ ഈ പ്രസ്താവന വരുന്നത്. എന്നാൽ സർക്കാരും വാഹന നിർമ്മാതാക്കളും ഈ പരാതികൾ തള്ളിക്കളഞ്ഞിട്ടുണ്ട്.
അതിനിടെ, രാജ്യവ്യാപകമായി E20 പെട്രോൾ നടപ്പിലാക്കുന്നതിനെതിരെ വാഹന ഉടമകളും ഉപഭോക്തൃ പ്രവർത്തകരും ഡൽഹിയിലെ ജന്തർ മന്ദിറിൽ പ്രതിഷേധം രേഖപ്പെടുത്തി. എഥനോൾ മിശ്രിത പദ്ധതിയെക്കുറിച്ച് സ്വതന്ത്രമായ സാങ്കേതിക അവലോകനം വേണമെന്നും E20 പെട്രോളിനൊപ്പം സാധാരണ പെട്രോളും വാങ്ങാനുള്ള അവസരം ഉപഭോക്താക്കൾക്ക് നൽകണമെന്നും പ്രതിഷേധക്കാർ ആവശ്യപ്പെട്ടു.
The Indian Oil Ministry clarifies reports claiming Bhutan rejected E20 petrol imports, stating no such proposal was made by Indian oil companies.
