ഇന്ത്യയും യുകെയും തമ്മിലുള്ള സമഗ്ര സാമ്പത്തിക-വ്യാപാര കരാർ (CETA) ജൂലൈ 15, 2026 മുതൽ പ്രാബല്യത്തിൽ വരികയാണ്. ഇതോടെ സ്കോച്ച് വിസ്കി, ജിൻ, ചോക്ലേറ്റുകൾ, ബിസ്കറ്റുകൾ, സൗന്ദര്യവർദ്ധക ഉൽപ്പന്നങ്ങൾ തുടങ്ങിയ ബ്രിട്ടീഷ് ഉൽപ്പന്നങ്ങൾ ഇന്ത്യയിൽ കൂടുതൽ വിലക്കുറവിൽ ലഭ്യമാകും. അതേസമയം, കരാറിന്റെ ഭാഗമായി ഇന്ത്യൻ കയറ്റുമതിക്കാർക്ക് യുകെ വിപണിയിലേക്ക് വലിയ നേട്ടമുണ്ടാകും. ഇന്ത്യൻ ഉൽപ്പന്നങ്ങളുടെ മൊത്തം വ്യാപാര മൂല്യത്തെ ബാധിക്കുന്ന 99 ശതമാനത്തോളം താരിഫ് ലൈനുകൾക്കും പൂജ്യം ശതമാനം തീരുവ ഏർപ്പെടുത്തുന്നതോടെ ഇന്ത്യൻ ഉൽപ്പന്നങ്ങൾക്ക് യുകെ വിപണിയിൽ കൂടുതൽ മത്സരക്ഷമത കൈവരിക്കാനാകും. ടെക്സ്റ്റൈൽസ്, തുകൽ ഉൽപ്പന്നങ്ങൾ, പാദരക്ഷകൾ, കായിക ഉപകരണങ്ങൾ, രത്നങ്ങൾ, ആഭരണങ്ങൾ തുടങ്ങിയ തൊഴിലധിഷ്ഠിത മേഖലകളാണ് കരാറിലൂടെ പ്രധാനമായും നേട്ടമുണ്ടാക്കുക.
വ്യാപാര സൗകര്യങ്ങൾക്കപ്പുറം സേവന മേഖലയിലും പ്രൊഫഷണലുകൾക്കും ഈ കരാർ വലിയ ആശ്വാസമാണ് നൽകുന്നത്. യുകെയിൽ ജോലി ചെയ്യുന്ന ഇന്ത്യക്കാർക്ക് ഇനിമുതൽ ഇരട്ട സാമൂഹിക സുരക്ഷാ നിക്ഷേപം ഒഴിവാക്കാൻ സാധിക്കും. ‘ഡബിൾ കോൺട്രിബ്യൂഷൻ കൺവെൻഷൻ’ നിലവിൽ വരുന്നതോടെ, യുകെയിൽ ജോലി ചെയ്യുന്നവർക്ക് അവിടെ അടയ്ക്കേണ്ട സാമൂഹിക സുരക്ഷാ വിഹിതം ഒഴിവാക്കി അത് ഇന്ത്യയിലെ അവരുടെ പിഎഫ് അക്കൗണ്ടിലേക്ക് മാറ്റാൻ കഴിയും. ഇത് അവരുടെ ശമ്പളത്തിന്റെ ഏകദേശം 25 ശതമാനത്തോളം ലാഭിക്കാൻ സഹായിക്കുമെന്നാണ് കണക്കാക്കപ്പെടുന്നത്. കൂടാതെ, കാർഷിക മേഖലയിലെ സെൻസിറ്റീവായ ഉൽപ്പന്നങ്ങളെയും പാൽ ഉൽപ്പന്നങ്ങളെയും കരാറിൽ നിന്ന് ഒഴിവാക്കി ഇന്ത്യ തങ്ങളുടെ കർഷകരുടെ താൽപ്പര്യങ്ങളും സംരക്ഷിച്ചിട്ടുണ്ട്. ഡിജിറ്റൽ വ്യാപാരം, ഐടി സേവനങ്ങൾ, ബൗദ്ധിക സ്വത്തവകാശം തുടങ്ങിയ 30 ഓളം മേഖലകളിൽ സഹകരണം ഉറപ്പാക്കുന്ന ഈ കരാർ, ദീർഘകാലാടിസ്ഥാനത്തിൽ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം 25.5 ബില്യൺ പൗണ്ടായി ഉയർത്തുമെന്നാണ് യുകെ സർക്കാരിന്റെ കണക്കുകൂട്ടൽ.
The India-UK FTA (CETA) is officially live. Enjoy cheaper Scotch whisky, chocolates, and cosmetics, alongside zero-duty access for Indian exports to the UK
