ഗതാഗതക്കുരുക്കിൽ നിന്ന് ആകാശമാർഗ്ഗം രക്ഷനേടാൻ സഹായിക്കുന്ന ലോകത്തിലെ ആദ്യത്തെ ഫ്ലയിംഗ് ടാക്സി വെർട്ടിപോർട്ടിന് (Vertiport) ഔദ്യോഗിക റെഗുലേറ്ററി അനുമതി ലഭിച്ചു. ദുബായ് അന്താരാഷ്ട്ര വിമാനത്താവളത്തിന് സമീപം സ്ഥിതി ചെയ്യുന്ന ‘VDX’ എന്ന അത്യാധുനിക കേന്ദ്രത്തിനാണ് ഇലക്ട്രിക് വെർട്ടിക്കൽ ടേക്ക്-ഓഫ് ആൻഡ് ലാൻഡിംഗ് (eVTOL) സർവീസുകൾക്കായി ഔദ്യോഗിക അനുമതി ലഭിച്ചിരിക്കുന്നത്.
യുണൈറ്റഡ് അറബ് എമിറേറ്റ്സിന്റെ ജനറൽ സിവിൽ ഏവിയേഷൻ അതോറിറ്റിയാണ് (GCAA) സുരക്ഷാ മാനദണ്ഡങ്ങളും അടിസ്ഥാന സൗകര്യങ്ങളും വിലയിരുത്തിയ ശേഷം ഈ നിർണായക സർട്ടിഫിക്കേഷൻ നൽകിയത്. സ്കൈപോർട്സ് ഇൻഫ്രാസ്ട്രക്ചറും ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റിയും (RTA) ചേർന്നാണ് ഈ പദ്ധതി യാഥാർത്ഥ്യമാക്കുന്നത്.
പരമ്പരാഗത ഹെലികോപ്റ്ററുകളെ അപേക്ഷിച്ച് ശബ്ദം വളരെ കുറഞ്ഞതും ലംബമായി പറന്നുയരാൻ കഴിയുന്നതുമായ ചെറിയ ഇലക്ട്രിക് വിമാനങ്ങളാണ് ഈ സർവീസിനായി ഉപയോഗിക്കുന്നത്. നാല് നിലകളിലായി ഏകദേശം 3,100 ചതുരശ്ര മീറ്റർ വിസ്തൃതിയിൽ നിർമ്മിച്ചിരിക്കുന്ന ഈ വെർട്ടിപോർട്ടിൽ രണ്ട് ലാൻഡിംഗ് പാഡുകളും വേഗത്തിൽ ചാർജ് ചെയ്യാനുള്ള സൗകര്യങ്ങളും യാത്രക്കാർക്കുള്ള സംവിധാനങ്ങളും ഒരുക്കിയിട്ടുണ്ട്. വാണിജ്യ പ്രവർത്തനങ്ങൾ പൂർണ്ണമായി ആരംഭിക്കുന്നതോടെ പ്രതിവർഷം 1.7 ലക്ഷം യാത്രക്കാരെ വരെ കൈകാര്യം ചെയ്യാൻ ഈ കേന്ദ്രത്തിന് സാധിക്കും. ദുബായ് നഗരത്തിൽ ആസൂത്രണം ചെയ്തിരിക്കുന്ന നാല് വെർട്ടിപോർട്ടുകളിൽ പ്രധാനപ്പെട്ടതാണ് ഈ ഹബ്ബ്.
അമേരിക്കൻ കമ്പനിയായ ജോബി ഏവിയേഷനുമായി (Joby Aviation) സഹകരിച്ചാണ് ദുബായിൽ ഫ്ലയിംഗ് ടാക്സി സർവീസുകൾ നടപ്പിലാക്കുന്നത്. 2026-ഓടെ കമേഴ്സ്യൽ സർവീസുകൾ ആരംഭിക്കാനാണ് ലക്ഷ്യമിടുന്നത്. നഗരത്തിനുള്ളിലെ യാത്രാസമയം കുറയ്ക്കാനും ഗതാഗതക്കുരുക്കിന് ശാശ്വത പരിഹാരം കാണാനും ഈ അത്യാധുനിക വ്യോമ ഗതാഗത പദ്ധതി സഹായിക്കുമെന്നാണ് വിലയിരുത്തപ്പെടുന്നത്. നഗരങ്ങളിൽ സുസ്ഥിരവും വേഗതയേറിയതുമായ പൊതുഗതാഗത സംവിധാനം ഒരുക്കുന്നതിൽ ഇതൊരു ചരിത്രപരമായ ചുവടുവെപ്പായി മാറും
Dubai secures approval for the world’s first commercial eVTOL vertiport near DXB Airport, paving the way for Joby Aviation air taxi operations
