മനുഷ്യശബ്ദത്തിന് സമാനമായ കൃത്യതയും വേഗതയുമുള്ള വോയിസ് എഐ മോഡലുകൾ വികസിപ്പിക്കുന്നതിൽ ആഗോള തലത്തിൽ വമ്പൻമാർക്ക് വെല്ലുവിളിയാകുകയാണ് ബെംഗളൂരു ആസ്ഥാനമായുള്ള മർഫ് എഐ. മർഫിന്റെ ‘ഫാൽക്കൺ 2’ എന്ന പുതിയ മോഡൽ ആർട്ടിഫിഷ്യൽ അനാലിസിസ് നടത്തിയ ബെഞ്ച്മാർക്ക് പരിശോധനയിൽ ഓപ്പൺ എഐ ഉൾപ്പെടെയുള്ള വൻകിട കമ്പനികളുടെ സാങ്കേതികവിദ്യകളെക്കാൾ മികച്ച റാങ്കിങ്ങാണ് സ്വന്തമാക്കിയത്.
വെറും 100 മില്ലിസെക്കൻഡിനുള്ളിൽ പ്രതികരിക്കാൻ കഴിയുന്ന ഈ സാങ്കേതികവിദ്യ, നിലവിൽ വിപണിയിലുള്ള പ്രധാന എതിരാളികളായ ഇലവൻ ലാബ്സിനേക്കാൾ അഞ്ചിലൊന്ന് കുറഞ്ഞ ചിലവിൽ (മിനിറ്റിന് 0.01 ഡോളർ) ലഭ്യമാണ് എന്നതാണ് മറ്റൊരു പ്രത്യേകത. ഐ.ഐ.ടി ഖരഗ്പൂർ പൂർവ്വവിദ്യാർത്ഥികളായ സ്നേഹ റോയ്, അങ്കുർ എഡ്കി, ദിവ്യാംഷു പാണ്ഡെ എന്നിവർ ചേർന്ന് 2020-ൽ സ്ഥാപിച്ച ഈ സ്റ്റാർട്ടപ്പ്, ഹണിവെൽ, സിസ്കോ, നെസ്‌ലെ തുടങ്ങിയ ആഗോള കമ്പനികൾ ഉൾപ്പെടെ ലക്ഷക്കണക്കിന് ഉപയോക്താക്കൾക്ക് സേവനം നൽകുന്നുണ്ട്.
35-ലധികം ഭാഷകളിലും 150-ലധികം ശബ്ദങ്ങളിലും ലഭ്യമായ ഫാൽക്കൺ 2, ലൈവ് കസ്റ്റമർ കോളുകൾ, ബുക്കിങ് പ്രക്രിയകൾ തുടങ്ങിയ യഥാർത്ഥ സാഹചര്യങ്ങളിലാണ് പരിശീലനം നേടിയിരിക്കുന്നത്. കറൻസികൾ, തീയതികൾ, വിലാസങ്ങൾ എന്നിവ തെറ്റില്ലാതെ കൈകാര്യം ചെയ്യാനും ഒരേസമയം 10,000 കോളുകൾ വരെ പ്രോസസ്സ് ചെയ്യാനും ഈ മോഡലിന് സാധിക്കും. കൂടുതൽ സുരക്ഷ ഉറപ്പാക്കുന്നതിനായി ക്ലൗഡ് സപ്പോർട്ടും ഇൻ-ഹൗസ് ക്ലൗഡ് സൗകര്യവും കമ്പനി വാഗ്ദാനം ചെയ്യുന്നുണ്ട്.
Bengaluru startup Murf AI releases Falcon 2, a fast text-to-speech AI model offering 100ms latency and 5x lower costs to compete with OpenAI and ElevenLabs
