ഗയ ഓഫീസേഴ്സ് ട്രെയിനിങ് അക്കാദമിയിൽ (OTA) നടന്ന 29ആമത് പാസിങ് ഔട്ട് പരേഡിന് ശേഷം കോഴിക്കോട് സ്വദേശിനിയായ ആതിര സുരേഷ് ഇന്ത്യൻ ആർമിയിൽ ലെഫ്റ്റനന്റായി ഔദ്യോഗികമായി ചുമതലയേറ്റു. കോഴിക്കോട് എൻ.ഐ.ടിയിൽ നിന്ന് സിവിൽ എൻജിനീയറിങ്ങിൽ ബിരുദം പൂർത്തിയാക്കിയ ആതിര, ബഹുരാഷ്ട്ര കമ്പനിയായ എക്സൊൺമോബിലിൽ (ExxonMobil) പ്രൊജക്ട് കൺട്രോൾസ് എൻജിനീയറായി ഉയർന്ന ശമ്പളത്തോടെ ജോലി ചെയ്തുവരികയായിരുന്നു. എന്നാൽ കോർപ്പറേറ്റ് കരിയറിലെ ഭദ്രതയും സുഖസൗകര്യങ്ങളും ഉപേക്ഷിച്ച് രാജ്യസേവനം ലക്ഷ്യമിട്ട് അവർ ആ ഉദ്യോഗം സ്വമേധയാ ഉപേക്ഷിക്കുകയായിരുന്നു. സർവീസസ് സെലക്ഷൻ ബോർഡ് (SSB) പരീക്ഷ ആദ്യ ശ്രമത്തിൽ തന്നെ വിജയിച്ചാണ് അവർ ഷോർട്ട് സർവീസ് കമ്മീഷൻ (ടെക്നിക്കൽ) കോഴ്സിനായി ഗയയിലെ ഒടിഎയിൽ പ്രവേശനം നേടിയത്.
മൂന്ന് തലമുറകളായി നീളുന്ന ശക്തമായ സൈനിക പാരമ്പര്യമുള്ള കുടുംബ പശ്ചാത്തലമാണ് ആതിരയെ ഈ തീരുമാനത്തിലേക്ക് നയിച്ചത്. പിതാവ് സുരേഷ് ഇന്ത്യൻ ആർമിയുടെ സിഗ്നൽസ് കോർപ്സിലും പിന്നീട് റെയിൽവേ പ്രൊട്ടക്ഷൻ ഫോഴ്സിലും സേവനം അനുഷ്ഠിച്ചിട്ടുണ്ട്. കൂടാതെ മുത്തശ്ശന്മാരായ ഗംഗാധരൻ നായരും പരേതനായ വേലായുധൻ നായരും സൈന്യത്തിൽ സേവനം അനുഷ്ഠിച്ചവരാണ്.
വിയറ്റ്നാം പീപ്പിൾസ് ആർമിയുടെ ഡെപ്യൂട്ടി ചീഫ് ഓഫ് ജനറൽ സ്റ്റാഫ് ലെഫ്റ്റനന്റ് ജനറൽ ലെ വാൻ ഹുയോങ് അവലോകനം ചെയ്ത പാസിങ് ഔട്ട് പരേഡിലാണ് ആതിര തന്റെ പരിശീലനം പൂർത്തിയാക്കിയത്. ഉയർന്ന വിദ്യാഭ്യാസവും കോർപ്പറേറ്റ് ജോലിയും ഉണ്ടായിട്ടും കുടുംബത്തിന്റെ സൈനിക പാരമ്പര്യം ഏറ്റെടുത്ത് രാജ്യസേവനത്തിനായി ഇറങ്ങിയ ഈ യുവ എൻജിനീയറുടെ വിജയം കേരളത്തിനും അഭിമാനമായി മാറിയിരിക്കുകയാണ്.
NIT Calicut civil engineer Athira Suresh quit her lucrative ExxonMobil job to get commissioned as a Lieutenant in the Indian Army at OTA Gaya.
