നിതേഷ് തിവാരി സംവിധാനം ചെയ്യുന്ന ബ്രഹ്മാണ്ഡ ചിത്രമായ ‘രാമായണ’ത്തിൽ രാവണനായി വേഷമിടുന്ന കന്നഡ സൂപ്പർതാരം യഷ്, തന്റെ 100 കോടി രൂപയുടെ പ്രതിഫലം വേണ്ടെന്നുവെച്ചു. ചിത്രത്തിന്റെ രണ്ട് ഭാഗങ്ങൾക്കുമായി ലഭിക്കേണ്ട വലിയ തുകയ്ക്ക് പകരം സൗത്ത് ഇന്ത്യയിലെ തിയേറ്റർ വിതരണാവകാശമാണ് താരം സ്വന്തമാക്കിയിരിക്കുന്നത്. തന്റെ പ്രൊഡക്ഷൻ ഹൗസായ ‘മോൺസ്റ്റർ മൈൻഡ് ക്രിയേഷൻസ്’ വഴി ചിത്രത്തിന്റെ സഹനിർമ്മാതാവ് കൂടിയായ യഷിന്റെ ഈ നീക്കം സിനിമാ ലോകത്ത് വലിയ ചർച്ചയായിട്ടുണ്ട്. സ്ഥിരമായ പ്രതിഫലത്തേക്കാൾ സിനിമയുടെ ദക്ഷിണേന്ത്യൻ ബോക്സ് ഓഫീസ് വിജയത്തിൽ പങ്കാളിത്തം ഉറപ്പാക്കുകയാണ് താരം ഇതിലൂടെ ലക്ഷ്യമിടുന്നത്.
റൺബീർ കപൂർ ശ്രീരാമനായും സായി പല്ലവി സീതയായും വേഷമിടുന്ന ഈ ഇതിഹാസ ചിത്രം രണ്ട് ഭാഗങ്ങളായാണ് തിയേറ്ററുകളിലെത്തുന്നത്. ചിത്രത്തിന്റെ ആദ്യ ഭാഗം 2026 നവംബറിലും രണ്ടാം ഭാഗം 2027 ദീപാവലി റിലീസായും ലോകമെമ്പാടും പ്രദർശനത്തിനെത്തും. അടുത്തിടെ പുറത്തിറങ്ങിയ യഷിന്റെ ‘ടോക്സിക്’ എന്ന ചിത്രം ബോക്സ് ഓഫീസിൽ സമ്മിശ്ര പ്രതികരണങ്ങൾ നേടിയ പശ്ചാത്തലത്തിലാണ് രാമായണത്തിലെ പുതിയ ബിസിനസ്സ് നീക്കം. ദക്ഷിണേന്ത്യൻ വിപണിയിൽ ചിത്രം വൻ വിജയം നേടുകയാണെങ്കിൽ നിശ്ചിത പ്രതിഫലത്തേക്കാൾ വലിയ ലാഭം ഈ കരാറിലൂടെ യഷിന് ലഭിക്കുമെന്നാണ് വിലയിരുത്തൽ.
Kannada superstar Yash waives his ₹100 crore acting fee for Nitesh Tiwari’s ‘Ramayana’ to acquire the theatrical distribution rights for South India.
