ക്രിക്കറ്റ് മൈതാനത്ത് കളിയിലെ സമ്മർദ്ദങ്ങളെ ശാന്തതയോടെ നേരിട്ട് ജയം സ്വന്തമാക്കിയ ‘ക്യാപ്റ്റൻ കൂൾ’ എം.എസ്. ധോണി, അതേ സമചിത്തതയും തന്ത്രങ്ങളും ഉപയോഗിച്ചാണ് ബിസിനസ് രംഗത്തും 1,000 കോടിയിലധികം മൂല്യമുള്ള വൻ സംരംഭക സാമ്രാജ്യം പടുത്തുയർത്തിയത്. ധോണിയുടെ ഈ ശാന്തവും ദീർഘവീക്ഷണമുള്ളതുമായ ബിസിനസ് ശൈലിയിൽ നിന്ന് വ്യക്തികൾക്കും നിക്ഷേപകർക്കും ഉൾക്കൊള്ളാൻ കഴിയുന്ന ഏഴ് പ്രധാന നിക്ഷേപ പാഠങ്ങൾ നോക്കാം:
നിങ്ങളെ സ്വീകരിക്കുന്ന ഇടങ്ങൾ അടിത്തറയാക്കുക
ബിസിനസ്സ് സാമ്രാജ്യത്തിന്റെ വളർച്ചയിൽ നഗരങ്ങളുമായുള്ള ബന്ധം നിർണ്ണായകമാണ്. വലിയ നഗരങ്ങളുടെ തിളക്കത്തിന് പിന്നാലെ പോകാതെ, ഐ.പി.എൽ കാലം മുതൽ തന്നോട് ആത്മബന്ധം പുലർത്തുന്ന ചെന്നൈ നഗരത്തെ അടിസ്ഥാനമാക്കിയാണ് ധോണി ‘ചെന്നൈയിൻ എഫ്.സി’ എന്ന ഫുട്ബോൾ ടീമിൽ നിക്ഷേപം നടത്തിയത്. ഉദ്യോഗസ്ഥർക്കും സ്പോൺസർമാർക്കുമൊപ്പം നിൽക്കാതെ ടീമിലെ കളിക്കാർക്കൊപ്പം സമയം ചെലവഴിച്ച് ആദ്യം വിശ്വാസം വളർത്തുകയാണ് അദ്ദേഹം ചെയ്തത്.
സാധാരണ കാര്യങ്ങളിൽ നിന്നാണ് മികച്ച നിക്ഷേപങ്ങളുടെ തുടക്കം
ബാഹ്യമായ തിളക്കങ്ങളേക്കാൾ ലളിതവും പ്രായോഗികവുമായ ആശയങ്ങളിലാണ് വലിയ അവസരങ്ങൾ ഒളിഞ്ഞിരിക്കുന്നത്. ഉപഭോക്താക്കൾക്ക് തങ്ങളുടെ അഭിരുചിക്കനുസരിച്ച് ബിരിയാണി തിരഞ്ഞെടുക്കാൻ സൗകര്യമൊരുക്കിയ ‘ഹൗസ് ഓഫ് ബിരിയാണി’ (House of Biryan) എന്ന സംരംഭത്തിന്റെ ലാളിത്യം തിരിച്ചറിഞ്ഞ് ധോണി നടത്തിയത് 32 കോടി രൂപയുടെ നിക്ഷേപമാണ്. ഇത് പിൽക്കാലത്ത് കമ്പനിയുടെ വൻ വരുമാന വളർച്ചയ്ക്ക് കാരണമായി.
വിശ്വാസം കെട്ടിപ്പടുക്കുന്നത് കോൺഫറൻസ് മുറികളിലല്ല, നിശ്ശബ്ദമായ നിരീക്ഷണങ്ങളിലൂടെയാണ്
പരസ്യ പ്രചാരണങ്ങളേക്കാൾ പ്രധാനം ബിസിനസിന്റെ പശ്ചാത്തലവും പ്രവർത്തന രീതിയും നേരിട്ട് മനസ്സിലാക്കുക എന്നതാണ്. കാർഷിക-വ്യവസായ മേഖലയിലെ ഡ്രോൺ നിർമ്മാതാക്കളായ ഗരുഡ എയറോസ്പേസ് കമ്പനിയുടെ പ്ലാന്റ് നേരിട്ട് സന്ദർശിച്ച് കാര്യങ്ങൾ മനസ്സിലാക്കിയ ശേഷമാണ് ധോണി അതിൽ 5 കോടി രൂപയിലധികം നിക്ഷേപിച്ചതും ബ്രാൻഡ് അംബാസഡറായതും.
ആർഭാടപരമായവയെക്കാൾ പ്രായോഗികമായ പോർട്ട്ഫോളിയോ തിരഞ്ഞെടുക്കുക
വെറുമൊരു പ്രദർശന വസ്തുവെന്നതിനേക്കാൾ ദീർഘകാല വളർച്ച നൽകുന്ന സ്ഥാപനങ്ങളിലാണ് നിക്ഷേപിക്കേണ്ടത്. സെക്കൻഡ് ഹാൻഡ് കാർ പ്ലാറ്റ്‌ഫോമായ CARS24, ചെറുകിട വ്യാപാരികൾക്കായുള്ള ഖാതാബുക്ക് (Khatabook), ഇ-സൈക്കിൾ ബ്രാൻഡായ ഇ-മോട്ടോറാഡ് (EMotorad), ഫിറ്റ്നസ് ബ്രാൻഡായ തഗ്ഡാ റഹോ (Tagda Raho) തുടങ്ങി ദൈനംദിന ജീവിതവുമായി ബന്ധപ്പെട്ട ബിസിനസുകളിലാണ് ധോണി പണം മുടക്കിയിട്ടുള്ളത്.
നഷ്ടങ്ങൾ കളിയുടെ ഭാഗമാണ്, അതിനോട് നിശബ്ദത പാലിക്കുക
ബിസിനസിലെ തിരിച്ചടികളെ ധീരമായി ഉൾക്കൊള്ളാനും അതിൽ നിന്ന് പഠിക്കാനും സാധിക്കണം. ഇ.വി ടാക്സി സർവീസായ ‘ബ്ലൂസ്മാർട്ട്’ (BluSmart) നേരിട്ട തകർച്ച ധോണിയുടെ ഫാമിലി ഓഫീസിനും വലിയ നഷ്ടമുണ്ടാക്കിയെങ്കിലും, അത് പരസ്യമാക്കാതെ നിശബ്ദമായി ഉൾക്കൊള്ളുകയാണ് അദ്ദേഹം ചെയ്തത്.
യഥാർത്ഥ തീരുമാനങ്ങളെടുക്കുന്നവർ സംസാരിക്കുന്നതിനേക്കാൾ കൂടുതൽ കേൾക്കും
ധൃതിപിടിച്ചുള്ള തീരുമാനങ്ങളേക്കാൾ ദീർഘനേരത്തെ പഠനവും ചിന്തയുമാണ് നല്ല നിക്ഷേപത്തിന് പ്രധാനം. സാങ്കേതിക തിടുക്കങ്ങൾ കാണിക്കാതെ, അടിസ്ഥാനപരമായ സംശയങ്ങൾ ചോദിച്ചറിഞ്ഞും ഭാര്യ സാക്ഷി ധോണിയുമായി ചേർന്നുള്ള സാമ്പത്തിക വിശകലനങ്ങൾ നടത്തിയുമാണ് ധോണി ഓരോ തീരുമാനവുമെടുക്കുന്നത്.
സമ്മർദ്ദങ്ങളെ അതിജീവിക്കുന്ന ഏക തന്ത്രം ക്ഷമയാണ്
ട്രെൻഡുകൾക്ക് പിന്നാലെ ഓടാതെ ക്ഷമയോടെ കാത്തിരിക്കുക എന്നതാണ് ധോണിയുടെ രീതി. പ്രശസ്തി മാത്രം നോക്കി നിക്ഷേപം നടത്താതെ, ബിസിനസ് എന്താണെന്ന് വ്യക്തമായി മനസ്സിലാക്കി മികച്ച തീരുമാനങ്ങളെടുക്കാൻ നിക്ഷേപകന് സമയം നൽകുന്നത് ഈ ക്ഷമയാണ്. അനാവശ്യ ധൃതി ഒഴിവാക്കി സാഹചര്യങ്ങളെ വ്യക്തമായി കാണാൻ ഇത് സഹായിക്കുന്നു.
Discover 7 valuable investment lessons from MS Dhoni, who leveraged patience, practical decision-making, and strategic vision to build over a 1,000-crore business empire.
