ഇന്ത്യയിൽ ഏറ്റവുമധികം ആസ്തിയുള്ള താരദമ്പതിമാരാണ് വിരാട് കോഹ്ലിയും അനുഷ്ക ശർമയും. വിവിധ റിപ്പോർട്ടുകൾ പ്രകാരം ഏതാണ്ട് 1,300 കോടി രൂപയാണ് ഇരുവരുടേയും സംയോജിത ആസ്തി. ക്രിക്കറ്റ്, സിനിമ എന്നീ മേഖലകൾക്കപ്പുറം ഫാഷൻ, ഹോസ്പിറ്റാലിറ്റി, ഫുഡ്-ടെക്, സ്റ്റാർട്ടപ്പ് നിക്ഷേപങ്ങൾ എന്നിവയിലൂടെയാണ് ഇരുവരും ഈ വമ്പൻ സാമ്രാജ്യം കെട്ടിപ്പടുത്തിരിക്കുന്നത്.
റിപ്പോർട്ടുകൾ പ്രകാരം കോഹ്ലിയുടെ മാത്രം ആസ്തി 1,050 മുതൽ 1,115 കോടി രൂപ വരെയാണ്. ഐ.പി.എൽ ശമ്പളം, ബി.സി.സി.ഐ കരാർ, വൻകിട ബ്രാൻഡ് പരസ്യങ്ങൾ എന്നിവയ്ക്ക് പുറമെ ‘വൺ8’ (One8), WROGN തുടങ്ങിയ ലൈഫ്സ്റ്റൈൽ ബ്രാൻഡുകളും ബ്ലൂ ട്രൈബ്, ഗോ ഡിജിറ്റ് തുടങ്ങിയ വിവിധ സ്റ്റാർട്ടപ്പുകളിലെ നിക്ഷേപങ്ങളും കോഹ്ലിയുടെ ബിസിനസ്സ് ശൃംഖലയുടെ ഭാഗമാണ്.
മറുവശത്ത്, അഭിനയത്തിൽ നിന്ന് ഭാഗികമായി വിട്ടുനിൽക്കുകയാണെങ്കിലും ഫാഷൻ ലേബലായ ‘നൂഷ്’ (Nush), പ്രൊഡക്ഷൻ കമ്പനിയായ ‘ക്ലീൻ സ്ലേറ്റ് ഫിലിംസ്’ തുടങ്ങിയ സംരംഭങ്ങളിലൂടെയും സ്ലർപ് ഫാം പോലുള്ള സ്റ്റാർട്ടപ്പ് നിക്ഷേപങ്ങളിലൂടെയും അനുഷ്ക ശർമ്മയ്ക്ക് 255 മുതൽ 260 കോടി രൂപയുടെ ആസ്തിയാണുള്ളത്. മിന്ത്ര, നിവിയ, ഗാർണിയർ, തനിഷ്ക് തുടങ്ങിയ പ്രമുഖ ബ്രാൻഡുകളുടെ പരസ്യങ്ങളിലൂടെയും ഡിജിറ്റൽ സഹകരണങ്ങളിലൂടെയും താരം തന്റെ വരുമാന സ്രോതസ്സുകൾ വിപുലീകരിച്ചിട്ടുണ്ട്.
ഈ ബിസിനസ്സ് സംരംഭങ്ങൾക്ക് പുറമെ മുംബൈ, ഗുരുഗ്രാം, അലിബാഗ് എന്നിവിടങ്ങളിലായി 100 കോടിയിലധികം രൂപ വിലമതിക്കുന്ന ആഡംബര റിയൽ എസ്റ്റേറ്റ് നിക്ഷേപങ്ങളും ദമ്പതികൾക്കുണ്ട്. അടുത്തിടെ മുംബൈയിലെ വെർസോവയിൽ 18.29 കോടി രൂപ മുടക്കി പുതിയ അപ്പാർട്ട്മെന്റും ഇവർ വാങ്ങിയിരുന്നു. ഇത്തരത്തിൽ പരമ്പരാഗത കരിയറിനപ്പുറം വൈവിധ്യമാർന്ന നിക്ഷേപങ്ങളിലൂടെയും ബിസിനസ്സ് സംരംഭങ്ങളിലൂടെയുമാണ് ഇന്ത്യയിലെ ഏറ്റവും ആസ്തിയുള്ള സെലിബ്രിറ്റി ദമ്പതികളായി ഇവർ മാറിയത്.
Discover how Virat Kohli and Anushka Sharma built a ₹1,300 crore business empire through cricket, Bollywood, fashion brands, startup investments, and luxury real estate
