ഇന്ത്യയും വിയറ്റ്നാമും തമ്മിലുള്ള വിമാന സർവീസ് ശേഷി ഇരട്ടിയിലധികം വർദ്ധിപ്പിക്കാൻ ധാരണയായി. ആഴ്ചയിൽ നിലവിലുണ്ടായിരുന്ന 8,000 സീറ്റുകൾ എന്ന പരിധി 16,000-ത്തിലധികമായി ഉയർത്തിക്കൊണ്ടുള്ള പുതിയ തീരുമാനം ഉടൻ നിലവിൽ വരും. ഇരുരാജ്യങ്ങളിലെയും വിമാനക്കമ്പനികൾ നിലവിലുള്ള യാത്രാപരിധികൾ പൂർണ്ണമായി ഉപയോഗിച്ച സാഹചര്യത്തിലും, സപ്ലൈ വർദ്ധിപ്പിക്കേണ്ടതിന്റെ ആവശ്യം മുൻനിർത്തിയുമാണ് ഈ സുപ്രധാന നടപടി. ഇന്ത്യയിൽ നിന്നുള്ള വിനോദസഞ്ചാരികൾക്കായി വിയറ്റ്നാം വിസ നിയമങ്ങൾ ലഘൂകരിച്ചതും തെക്കുകിഴക്കൻ ഏഷ്യയിലേക്കുള്ള യാത്രാക്കുതിപ്പിന് ആക്കംകൂട്ടിയിട്ടുണ്ട്.
നിലവിൽ ഇൻഡിഗോ, എയർ ഇന്ത്യ എന്നീ ഇന്ത്യൻ കമ്പനികൾ വിയറ്റ്നാമിലേക്ക് ആഴ്ചയിൽ 30 സർവീസുകളും, വിയറ്റ്നാം കമ്പനികൾ 48 സർവീസുകളുമാണ് നടത്തുന്നത്. പുതിയ തീരുമാനപ്രകാരം വിയറ്റ്നാം എയർലൈൻസ്, വിയറ്റ്ജെറ്റ് തുടങ്ങിയ കമ്പനികൾക്ക് ഡൽഹി, മുംബൈ, ഹൈദരാബാദ്, ചെന്നൈ, കൊൽക്കത്ത തുടങ്ങിയ പ്രധാന ഇന്ത്യൻ നഗരങ്ങളിലേക്ക് കൂടുതൽ സർവീസുകൾ ആരംഭിക്കാൻ സാധിക്കും. കൂടാതെ വിയറ്റ്നാമിന്റെ സൺ ഫുക്വൂക്ക് എയർലൈൻസും (Sun PhuQuoc Airlines) മുംബൈയിലേക്ക് പുതിയ സർവീസുകൾ ആസൂത്രണം ചെയ്യുന്നുണ്ട്. 2024-ന് ശേഷം ഇരുരാജ്യങ്ങളും തമ്മിലുള്ള സീറ്റ് കോട്ട വർദ്ധിപ്പിക്കുന്നത് ഇത് രണ്ടാം തവണയാണ്.
India and Vietnam double weekly flight seat capacity to over 16,000 to meet rising travel demand and relaxed visa norms for Indian tourists.
