ആഗോള വ്യാപാര മാന്ദ്യത്തിനിടയിലും 2026-27 സാമ്പത്തിക വർഷത്തിൽ ഇന്ത്യയുടെ കയറ്റുമതി ലക്ഷ്യമായ 1 ട്രില്യൺ ഡോളർ കൈവരിക്കാൻ കഴിയുമെന്ന തികഞ്ഞ ആത്മവിശ്വാസം പ്രകടിപ്പിച്ച് കേന്ദ്ര വാണിജ്യ-വ്യവസായ മന്ത്രി പിയൂഷ് ഗോയൽ. കഴിഞ്ഞ വർഷത്തെ റെക്കോർഡ് കയറ്റുമതിയായ 863 ബില്യൺ ഡോളറിനേക്കാൾ 16 ശതമാനം അധികമാണിത്. രാജ്യത്തെ 6.3 കോടിയിലധികം സൂക്ഷ്മ, ചെറുകിട, ഇടത്തരം സംരംഭങ്ങളുടെയും (MSMEs) സ്റ്റാർട്ടപ്പുകളുടെയും കരുത്തിലാണ് ഈ വളർച്ചയെന്നും, കഴിഞ്ഞ നാലര വർഷത്തിനിടയിൽ 38 വികസിത രാജ്യങ്ങളുമായി ഒപ്പുവെച്ച 9 സ്വതന്ത്ര വ്യാപാര കരാറുകൾ ഇതിന് വലിയ സഹായമായെന്നും അദ്ദേഹം സി.ഐ.ഐ (CII) പാർട്ണർഷിപ്പ് ഉച്ചകോടിയുടെ കർട്ടൻ റെയ്സർ ചടങ്ങിൽ വ്യക്തമാക്കി.
ആഗോള വളർച്ചാ നിരക്ക് മന്ദഗതിയിലാണെങ്കിലും ഇന്ത്യയുടെ ജി.ഡി.പി വളർച്ച 7 ശതമാനത്തിൽ അധികമായിരിക്കുമെന്നും, 2047-ഓടെ രാജ്യം 30 ട്രില്യൺ ഡോളർ സമ്പദ്‌വ്യവസ്ഥയായി മാറുമെന്നും മന്ത്രി കൂട്ടിച്ചേർത്തു. അതേസമയം, നവംബറിൽ വിശാഖപട്ടണത്ത് നടക്കുന്ന 31-ാമത് സി.ഐ.ഐ ഉച്ചകോടിയിൽ വ്യവസായങ്ങൾക്കായി പുതിയ പദ്ധതികൾ പ്രഖ്യാപിക്കുമെന്ന് ചടങ്ങിൽ പങ്കെടുത്ത ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായ്ഡു വ്യക്തമാക്കി. സെമികണ്ടക്ടർ ആവാസവ്യവസ്ഥ, ഹരിത ഹൈഡ്രജൻ കയറ്റുമതി തുടങ്ങിയ പദ്ധതികളിലൂടെ രാജ്യത്തിന്റെ പ്രധാന വ്യാവസായിക ഹബ്ബായി ആന്ധ്രാപ്രദേശ് മാറുമെന്നും അദ്ദേഹം പറഞ്ഞു
Union Minister Piyush Goyal expresses confidence that India will achieve its $1 trillion export target in FY 2026-27, driven by MSMEs, startups, and new free trade agreements.
