2030ഓടെ രാജ്യത്തെ 5ജി ഉപയോക്താക്കളുടെ എണ്ണം 55 കോടിയിൽ നിന്ന് 100 കോടിയായി ഉയർത്താൻ ലക്ഷ്യമിടുന്നതായി കേന്ദ്ര ടെലികോം മന്ത്രി ജ്യോതിരാദിത്യ സിന്ധ്യ വ്യക്തമാക്കി. ന്യൂഡൽഹിയിൽ ഇന്ത്യ മൊബൈൽ കോൺഗ്രസ് (IMC) 2026 ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 4ജി സാങ്കേതികവിദ്യയിൽ ലോകത്തിന് പിന്നിലായിരുന്ന ഇന്ത്യ, വരാനിരിക്കുന്ന 6ജി സാങ്കേതികവിദ്യയിൽ ആഗോളതലത്തിൽ നേതൃത്വം നൽകാൻ പ്രതിജ്ഞാബദ്ധമാണെന്നും മന്ത്രി കൂട്ടിച്ചേർത്തു.
2017 സെപ്റ്റംബറിലെ ആദ്യ ഐ.എം.സി മുതൽ ഇന്ത്യയുടെ ടെലികോം രംഗം വൻ വളർച്ചയാണ് കൈവരിച്ചത്. ബ്രോഡ്ബാൻഡ് ഉപയോക്താക്കളുടെ എണ്ണം 6 കോടിയിൽ നിന്ന് 110 കോടിയായും മൊബൈൽ ഉപയോക്താക്കളുടെ എണ്ണം 135 കോടിയായും ഉയർന്നു. 2014ൽ 268 രൂപയായിരുന്ന 1 ജിബി ഡാറ്റയുടെ വില ഇന്ന് 8 രൂപയായി കുറഞ്ഞതായും, ഇത് ലോകത്തിലെ ഏറ്റവും കുറഞ്ഞ നിരക്കാണെന്നും അദ്ദേഹം പറഞ്ഞു. കൂടാതെ രാജ്യത്തെ ആകെ ഡിജിറ്റൽ ഇടപാടുകളുടെ 84 ശതമാനവും യു.പി.ഐ (UPI) വഴിയാണ് നടക്കുന്നത്.
മൊബൈൽ നിർമ്മാണ രംഗത്തും ഇന്ത്യ വൻ മുന്നേറ്റമാണ് നടത്തിയത്. 2014ൽ 2-3 ബില്യൺ ഡോളർ മൂല്യമുണ്ടായിരുന്ന മൊബൈൽ ഫോൺ വ്യവസായം ഇന്ന് 63 ബില്യൺ ഡോളറായി വളർന്നു. ലോകത്തിലെ ഏറ്റവും വലിയ രണ്ടാമത്തെ മൊബൈൽ ഫോൺ നിർമ്മാതാക്കളായി മാറിയ ഇന്ത്യയുടെ കയറ്റുമതി 29 ബില്യൺ ഡോളറിനടുത്താണ്. ഭാരത് നെറ്റ് പദ്ധതിയിലൂടെ രാജ്യത്തെ ഗ്രാമങ്ങളിലേക്ക് അതിവേഗ ഇന്റർനെറ്റ് കണക്റ്റിവിറ്റി എത്തിക്കുമെന്നും മന്ത്രി വ്യക്തമാക്കി.
India aims for 1 billion 5G users by 2030 and prepares for global leadership in 6G technology, as announced by Telecom Minister Jyotiraditya Scindia at IMC 2026.
