നവരാത്രി ഉത്സവകാലത്തെ കടുത്ത യാത്രത്തിരക്ക് പരിഹരിക്കുന്നതിനായി കേരളത്തിൽ നിന്ന് പ്രത്യേക ട്രെയിൻ സർവീസുകൾ പ്രഖ്യാപിച്ച് ദക്ഷിണ റെയിൽവേ. ബെംഗളൂരു, കൊൽക്കത്ത (സാന്ദ്രഗച്ചി) എന്നിവിടങ്ങളിലേക്കും തിരിച്ചുമാണ് പ്രത്യേക ട്രെയിനുകൾ സർവീസ് നടത്തുക. ട്രെയിനുകളിലേക്കുള്ള ബുക്കിംഗ് ആരംഭിച്ചു.
കൊൽക്കത്ത മേഖലയിലേക്ക് തിരുവനന്തപുരം നോർത്ത് – സാന്ദ്രഗച്ചി സ്പെഷ്യൽ (06105) ഒക്ടോബർ 15 വ്യാഴാഴ്ച ഉച്ചയ്ക്ക് 2.15-ന് പുറപ്പെട്ട് ശനിയാഴ്ച ഉച്ചയ്ക്ക് 1.45-ന് സാന്ദ്രഗച്ചിയിലെത്തും. മടക്ക സർവീസിൽ സാന്ദ്രഗച്ചി – തിരുവനന്തപുരം നോർത്ത് സ്പെഷ്യൽ (06106) ഒക്ടോബർ 18 ഞായറാഴ്ച ഉച്ചയ്ക്ക് 2.15-ന് പുറപ്പെട്ട് ചൊവ്വാഴ്ച രാവിലെ 9.55-ന് തിരുവനന്തപുരം നോർത്തിൽ എത്തിച്ചേരും.
ബെംഗളൂരു മേഖലയിലേക്ക് ബെംഗളൂരു കന്റോൺമെന്റ് – തിരുവനന്തപുരം നോർത്ത് സ്പെഷ്യൽ (06575) ഒക്ടോബർ 16 വെള്ളിയാഴ്ച വൈകുന്നേരം 4.40-ന് പുറപ്പെട്ട് അടുത്ത ദിവസം രാവിലെ 10.30-ന് തിരുവനന്തപുരം നോർത്തിലെത്തും. തിരികെ തിരുവനന്തപുരം നോർത്ത് – ബെംഗളൂരു കന്റോൺമെന്റ് സ്പെഷ്യൽ (06576) ഒക്ടോബർ 17 ശനിയാഴ്ച ഉച്ചയ്ക്ക് 12.40-ന് പുറപ്പെട്ട് അടുത്ത ദിവസം രാവിലെ 6 മണിക്ക് ബെംഗളൂരു കന്റോൺമെന്റിൽ സർവീസ് അവസാനിപ്പിക്കും.
Southern Railway announces festival special trains from Kerala to Bengaluru and Santragachi (Kolkata) to manage Navratri travel rush; ticket bookings are now open.
