ഇന്ത്യയും യുഎസും തമ്മിലുള്ള ഉഭയകക്ഷി വ്യാപാര ചർച്ചകൾ നിർണായക ഘട്ടത്തിലെത്തിനിൽക്കെ, യുഎസ് സ്റ്റേറ്റ് സെക്രട്ടറി മാർക്കോ റൂബിയോ അടുത്ത ആഴ്ച ഇന്ത്യ സന്ദർശിക്കും. മുംബൈ, ഗുജറാത്തിലെ ജാംനഗർ എന്നിവിടങ്ങൾ സന്ദർശിക്കുന്ന അദ്ദേഹം, മുതിർന്ന ഇന്ത്യൻ ഉദ്യോഗസ്ഥരുമായും വ്യവസായ പ്രമുഖരുമായും കൂടിക്കാഴ്ച നടത്തും. ഊർജ്ജ സഹകരണം, തന്ത്രപ്രധാന ബന്ധങ്ങൾ, സാമ്പത്തിക സഹകരണം എന്നിവ ശക്തിപ്പെടുത്തുകയാണ് ഈ സന്ദർശനത്തിന്റെ പ്രധാന ലക്ഷ്യം. വ്യാപാര തർക്കങ്ങളും റഷ്യയിൽ നിന്നുള്ള എണ്ണ ഇറക്കുമതിയും സംബന്ധിച്ച് ഇരുരാജ്യങ്ങൾക്കുമിടയിൽ അഭിപ്രായവ്യത്യാസങ്ങൾ നിലനിൽക്കുന്നുണ്ടെങ്കിലും, ഉഭയകക്ഷി ബന്ധം മെച്ചപ്പെടുത്തുന്നതിനുള്ള യുഎസ് നീക്കത്തിന്റെ ഭാഗമായാണ് കഴിഞ്ഞ മെയ് മാസത്തിന് ശേഷമുള്ള റൂബിയോയുടെ ഈ രണ്ടാം ഇന്ത്യൻ സന്ദർശനം.
അതേസമയം, യുഎസുമായുള്ള വ്യാപാര ചർച്ചകൾ ധാരണയിലെത്താൻ അടുത്തിരിക്കുകയാണെന്ന് വിദേശകാര്യ മന്ത്രി എസ്. ജയശങ്കർ വ്യക്തമാക്കി. ന്യൂഡൽഹിയിൽ നടന്ന ബ്ലൂംബെർഗ് ന്യൂ ഇക്കോണമി ഫോറത്തിൽ സംസാരിക്കവെയാണ് ചർച്ചകൾ അനുകൂലമായ തീരുമാനത്തിലേക്ക് നീങ്ങുകയാണെന്ന സൂചന അദ്ദേഹം നൽകിയത്. ആഗോള സാമ്പത്തിക രംഗത്ത് യുഎസ് സ്വീകരിക്കുന്ന പുതിയ വ്യാപാര നയങ്ങൾക്കനുസരിച്ച് മറ്റു രാജ്യങ്ങൾ തങ്ങളുടെ നിലപാടുകൾ പുനഃപരിശോധിക്കേണ്ടി വരുന്നുണ്ടെന്നും, ഇന്ത്യയും ഈ നിർദ്ദിഷ്ട കരാറിനെ അത്തരം സാഹചര്യങ്ങൾ കണക്കിലെടുത്താണ് വിലയിരുത്തുന്നതെന്നും അദ്ദേഹം കൂട്ടിച്ചേർത്തു. റൂബിയോയുടെ സന്ദർശനം ഇരുരാജ്യങ്ങളും തമ്മിലുള്ള സാമ്പത്തിക-തന്ത്രപ്രധാന പങ്കാളിത്തത്തിന് പുതിയ ദിശാബോധം നൽകുമെന്നാണ് കരുതപ്പെടുന്നത്.
US Secretary of State Marco Rubio will visit India next week to strengthen energy, economic, and strategic cooperation amid ongoing bilateral trade negotiations
