കേരളത്തിന്റെ തലസ്ഥാന നഗരത്തിലെ വ്യോമഗതാഗത വികസനത്തിന് പുതിയ അധ്യായം കുറിച്ച് തിരുവനന്തപുരം അന്താരാഷ്ട്ര വിമാനത്താവളത്തിൽ ₹2,500 കോടി ചെലവിലുള്ള അന്താരാഷ്ട്ര ടെർമിനൽ വികസനത്തിന്റെ നിർമാണ പ്രവർത്തനങ്ങൾ ആരംഭിച്ചു. വിമാനത്താവളത്തിന്റെ സമഗ്ര വികസനം ലക്ഷ്യമിടുന്ന പ്രോജക്ട് അനന്തയുടെ (Project Anantha) ഭാഗമായാണ് പദ്ധതി നടപ്പാക്കുന്നത്.
ചാക്കയിലെ അന്താരാഷ്ട്ര ടെർമിനലിന്റെ ഡിപ്പാർച്ചർ മേഖലയോട് ചേർന്നാണ് ആദ്യഘട്ട നിർമാണ പ്രവർത്തനങ്ങൾ ആരംഭിക്കുന്നത്.
ചീഫ് എയർപോർട്ട് ഓഫീസർ പി.കെ. അജു, എയർപോർട്ട് അതോറിറ്റി ഓഫീസർ ഇൻ ചാർജ് മോഹൻ റോയ്, ടിയാൽ ഇൻഫ്രാ ഹെഡ് കെ.എസ്. ഷിബു കുമാർ, എഒസി ചെയർമാൻ സഞ്ജയ് അംബുജാക്ഷൻ, ബ്യൂറോ ഓഫ് ഇമിഗ്രേഷൻ അസിസ്റ്റന്റ് ഡയറക്ടർ രാജൻ ചെങ്കുനി എന്നിവർ ചടങ്ങിൽ പങ്കെടുത്തു.
35 ലക്ഷത്തിൽ നിന്ന് 1.15 കോടി യാത്രക്കാരിലേക്ക്
ഏകദേശം 92,552 ചതുരശ്ര മീറ്റർ വിസ്തൃതിയിലാണ് അന്താരാഷ്ട്ര ടെർമിനൽ വികസനം നടപ്പാക്കുന്നത്.പദ്ധതി പൂർത്തിയാകുന്നതോടെ അന്താരാഷ്ട്ര ടെർമിനലിന്റെ വാർഷിക യാത്രക്കാരെ കൈകാര്യം ചെയ്യാനുള്ള ശേഷി നിലവിലെ 35 ലക്ഷത്തിൽ നിന്ന് 1.15 കോടിയായി ഉയരും.
അതായത് നിലവിലുള്ളതിന്റെ മൂന്നിരട്ടിയിലധികം യാത്രക്കാരെ കൈകാര്യം ചെയ്യാൻ ടെർമിനലിന് ശേഷിയുണ്ടാകും.വർധിച്ചുവരുന്ന യാത്രക്കാരുടെ എണ്ണത്തിനനുസരിച്ച് വിമാനത്താവളത്തിന്റെ അടിസ്ഥാനസൗകര്യങ്ങൾ വിപുലീകരിക്കുന്നതാണ് പദ്ധതിയുടെ പ്രധാന ലക്ഷ്യം.
പുതിയ ടെർമിനൽ വികസനത്തിലൂടെ യാത്രക്കാർക്ക് കൂടുതൽ സൗകര്യപ്രദവും വേഗത്തിലുള്ളതുമായ സേവനങ്ങൾ ലഭ്യമാക്കാനാണ് ലക്ഷ്യമിടുന്നത്.ആധുനിക ചെക്ക്-ഇൻ സംവിധാനങ്ങൾ, വിപുലീകരിച്ച ഇമിഗ്രേഷൻ കൗണ്ടറുകൾ, പുതിയ ബാഗേജ് ഹാൻഡ്‌ലിങ് സംവിധാനങ്ങൾ എന്നിവ പദ്ധതിയുടെ ഭാഗമാണ്. കൂടുതൽ റീട്ടെയിൽ ഔട്ട്‌ലെറ്റുകൾ, ഡ്യൂട്ടി ഫ്രീ ഷോപ്പിങ് സൗകര്യങ്ങൾ എന്നിവയും ഒരുക്കും.യാത്രക്കാരുടെ എണ്ണം വർധിക്കുന്ന സാഹചര്യത്തിൽ തിരക്ക് നിയന്ത്രിക്കാനും വിമാനത്താവളത്തിനുള്ളിലെ യാത്രാനുഭവം മെച്ചപ്പെടുത്താനും ഈ സൗകര്യങ്ങൾ സഹായിക്കും.
കഴിഞ്ഞ അഞ്ച് വർഷത്തിനിടെ തിരുവനന്തപുരം അന്താരാഷ്ട്ര വിമാനത്താവളം ശ്രദ്ധേയമായ വളർച്ചയാണ് കൈവരിച്ചത്.പ്രതിദിന വിമാന സർവീസുകളുടെ എണ്ണം 45ൽ നിന്ന് 90 ആയി ഉയർന്നു. പ്രതിദിന യാത്രക്കാരുടെ എണ്ണം ഏകദേശം 5,500ൽ നിന്ന് 15,000 ആയി വർധിച്ചു.
വിമാനത്താവളത്തിൽ പ്രവർത്തിക്കുന്ന വിമാനക്കമ്പനികളുടെ എണ്ണം 11ൽ നിന്ന് 17 ആയും ഉയർന്നിട്ടുണ്ട്. 2025–26 സാമ്പത്തിക വർഷത്തിൽ മാത്രം 47 ലക്ഷം യാത്രക്കാരെയും 31,366 വിമാന നീക്കങ്ങളെയും തിരുവനന്തപുരം വിമാനത്താവളം കൈകാര്യം ചെയ്തു. നിലവിൽ 14 അന്താരാഷ്ട്ര ലക്ഷ്യസ്ഥാനങ്ങളിലേക്കും എട്ട് ആഭ്യന്തര ലക്ഷ്യസ്ഥാനങ്ങളിലേക്കും നേരിട്ടുള്ള വിമാന സർവീസുകളുണ്ട്.
യാത്രക്കാരുടെ സൗകര്യം മെച്ചപ്പെടുത്തുന്നതിനായി നിരവധി സാങ്കേതിക സംവിധാനങ്ങളും വിമാനത്താവളത്തിൽ ഇതിനകം നടപ്പാക്കിയിട്ടുണ്ട്.
ഡിജിയാത്ര, ഇ-ഗേറ്റുകൾ, ഫാസ്റ്റ് ട്രാക്ക് ഇമിഗ്രേഷൻ, മെച്ചപ്പെടുത്തിയ ചെക്ക്-ഇൻ സൗകര്യങ്ങൾ എന്നിവ യാത്രാനടപടികൾ കൂടുതൽ സുഗമമാക്കുന്നു. യാത്രക്കാർക്കായി ഉഡാൻ കഫെ പോലുള്ള സൗകര്യങ്ങളും വിമാനത്താവളത്തിൽ ഒരുക്കിയിട്ടുണ്ട്. സേവന നിലവാരത്തിലെ മികവിന് അന്താരാഷ്ട്ര അംഗീകാരങ്ങളും തിരുവനന്തപുരം വിമാനത്താവളത്തിന് ലഭിച്ചിട്ടുണ്ട്.
അടിസ്ഥാനസൗകര്യ വികസനത്തിനൊപ്പം സുരക്ഷയ്ക്കും പരിസ്ഥിതി സംരക്ഷണത്തിനും വിമാനത്താവളം പ്രാധാന്യം നൽകുന്നുണ്ട്. നൂതന ക്രാഷ് ഫയർ ടെൻഡറുകൾ ഉൾപ്പെടെയുള്ള സംവിധാനങ്ങളിലൂടെ അടിയന്തര സാഹചര്യങ്ങളിലെ പ്രതികരണശേഷി വർധിപ്പിച്ചു. മാലിന്യസംസ്കരണത്തിലും പരിസ്ഥിതി സൗഹൃദ പ്രവർത്തനങ്ങളിലും ശ്രദ്ധേയമായ നേട്ടങ്ങളാണ് വിമാനത്താവളം കൈവരിച്ചത്. സീറോ വേസ്റ്റ് ടു ലാൻഡ്‌ഫിൽ സർട്ടിഫിക്കേഷൻ നേടിയ ഇന്ത്യയിലെ ആദ്യ വിമാനത്താവളമെന്ന നേട്ടവും തിരുവനന്തപുരം അന്താരാഷ്ട്ര വിമാനത്താവളത്തിനുണ്ട്.
തിരുവനന്തപുരം വിമാനത്താവളത്തിന്റെ ദീർഘകാല വികസനത്തിനായി ഏകദേശം ₹8,700 കോടി നിക്ഷേപം ലക്ഷ്യമിടുന്ന പദ്ധതിയാണ് പ്രോജക്ട് അനന്ത.ഇതിന്റെ ഭാഗമായി നടപ്പാക്കുന്ന ₹2,500 കോടിയുടെ അന്താരാഷ്ട്ര ടെർമിനൽ വികസനം വിമാനത്താവളത്തിന്റെ ഭാവി വളർച്ചയിൽ നിർണായക പങ്കുവഹിക്കും.വിമാന സർവീസുകളുടെയും യാത്രക്കാരുടെയും എണ്ണത്തിലുണ്ടാകുന്ന വർധന കണക്കിലെടുത്ത് കൂടുതൽ ശേഷിയുള്ള അടിസ്ഥാനസൗകര്യങ്ങൾ ഒരുക്കുകയാണ് ലക്ഷ്യം.ടൂറിസം, വ്യാപാരം, വ്യവസായം, അന്താരാഷ്ട്ര കണക്റ്റിവിറ്റി തുടങ്ങിയ മേഖലകളിലും ഈ വികസനം പുതിയ അവസരങ്ങൾ സൃഷ്ടിക്കുമെന്നാണ് പ്രതീക്ഷ.
പ്രതിവർഷം 1.15 കോടി യാത്രക്കാരെ സ്വീകരിക്കാൻ ശേഷിയുള്ള അന്താരാഷ്ട്ര ടെർമിനലുമായി തിരുവനന്തപുരം വിമാനത്താവളത്തെ ഭാവിയിലെ വ്യോമഗതാഗത ആവശ്യങ്ങൾക്ക് സജ്ജമാക്കുകയാണ് പ്രോജക്ട് അനന്ത.
Thiruvananthapuram Airport Begins Major International Terminal Expansion Under Project Anantha. The foundation stone for the International Terminal Expansion under Project Anantha has been laid at Thiruvananthapuram International Airport, marking a major milestone in its infrastructure development. The expansion will nearly triple the airport’s annual international passenger-handling capacity from 3.5 million to approximately 11.5 million. The project aims to introduce enhanced passenger facilities, strengthen operational infrastructure, and support greater international connectivity, positioning Thiruvananthapuram as a modern, future-ready aviation hub.
