ദീപാവലി ഉത്സവ സീസൺ അടുത്തിരിക്കെ രാജ്യത്ത് പഞ്ചസാര വില കുത്തനെ ഉയരുന്നു. കഴിഞ്ഞ ആറ് ദിവസത്തിനുള്ളിൽ പഞ്ചസാരയുടെ Ex-mill price 10 ശതമാനത്തിലധികം വർധനവാണ് രേഖപ്പെടുത്തിയത്. ഉത്തർപ്രദേശിൽ ക്വിന്റലിന് 4,600 രൂപയിൽ നിന്ന് 5,200 രൂപയായും മഹാരാഷ്ട്രയിൽ 4,350 രൂപയിൽ നിന്ന് 5,100 രൂപയായും വില ഉയർന്നു. ഉത്സവ ആവശ്യങ്ങൾക്കായി വീടുകളിലും മിഠായി നിർമ്മാതാക്കൾക്കിടയിലും ഡിമാൻഡ് ഉയർന്നതും, വിപണിയിലെ വരവ് കുറഞ്ഞതുമാണ് വിലവർധനവിന് പ്രധാന കാരണം. മഹാരാഷ്ട്ര, കർണാടക എന്നീ സംസ്ഥാനങ്ങളിൽ കരിമ്പ് ഉൽപ്പാദനത്തിലുണ്ടായ കുറവും ഒക്ടോബർ മധ്യത്തോടെ കരിമ്പ് സംസ്കരണം ആരംഭിക്കാനുള്ള പദ്ധതികൾ വൈകുന്നതും സ്ഥിതിഗതികൾ കൂടുതൽ സങ്കീർണ്ണമാക്കുന്നു.
അതേസമയം, വിലക്കയറ്റം തടയാനും ഉത്സവ സീസണിൽ വിപണിയിൽ ലഭ്യത ഉറപ്പാക്കാനും കേന്ദ്ര സർക്കാർ അടിയന്തര നടപടികൾ സ്വീകരിച്ചിട്ടുണ്ട്. ഒക്ടോബർ രണ്ടാം പകുതിക്കായി 14 ലക്ഷം ടൺ പഞ്ചസാരയുടെ അധിക ക്വാട്ട സർക്കാർ അനുവദിച്ചു. കൂടാതെ വിപണിയിലെ പൂഴ്ത്തിവെപ്പ് തടയുന്നതിനായി വ്യാപാരികളുടെ സ്റ്റോക്ക് പരിധി 2,000 ക്വിന്റലിൽ നിന്ന് 1,000 ക്വിന്റലായി കുറയ്ക്കുകയും ചെയ്തു. 10 ലക്ഷം ടൺ അസംസ്കൃത പഞ്ചസാര ഇറക്കുമതി ചെയ്യാൻ അനുമതി നൽകിയതിനൊപ്പം, വൻകിട ഉപഭോക്താക്കളുടെ സ്റ്റോക്കുകളിൽ പരിശോധന ശക്തമാക്കാനും സർക്കാർ നിർദ്ദേശം നൽകിയിട്ടുണ്ട്.
Sugar mill prices surge over 10% ahead of Diwali due to high demand and supply delays, prompting the Center to release extra quotas and impose stock limits.
