മുൻപ് ഇന്ത്യയുടെ സേവന ശേഷിയെയും (Brainpower) സാങ്കേതിക പ്രവീണ്യത്തെയും മാത്രം ആശ്രയിച്ചിരുന്ന ലോകം, ഇന്ന് ഇന്ത്യയുടെ ചിന്താശേഷിയെയും (Mindpower) നവീകരണ മികവിനെയും പൂർണ്ണമായി വിശ്വസിക്കാൻ തുടങ്ങിയിരിക്കുകയാണെന്ന് പ്രധാനമന്ത്രി നരേന്ദ്ര മോദി. ന്യൂഡൽഹിയിൽ നടന്ന എൻ.ഡി.ടി.വി വേൾഡ് സമ്മിറ്റിൽ സംസാരിക്കവേയാണ്, കേവലം ഒരു ‘ബാക്ക് ഓഫീസ്’ എന്നതിലുപരി ലോകത്തിന് പുതിയ ആശയങ്ങൾ സംഭാവന ചെയ്യുന്ന ‘ബ്രെയിൻ ഓഫീസ്’ ആയി ഇന്ത്യ മാറിയെന്ന് അദ്ദേഹം വ്യക്തമാക്കിയത്.
ഡിജിറ്റൽ നവീകരണത്തിലും സ്റ്റാർട്ടപ്പ് ആവാസവ്യവസ്ഥയിലും ഇന്ത്യ ഇന്ന് ലോക രാജ്യങ്ങളിൽ മുൻപന്തിയിലാണെന്നും, ഏറ്റവും വേഗത്തിൽ വളരുന്ന പ്രധാന സാമ്പത്തിക ശക്തിയായി രാജ്യം തുടരുകയാണെന്നും അദ്ദേഹം പറഞ്ഞു. വിദേശ ആശ്രിതത്വം കുറയ്ക്കാനും ഭാവിയിലെ അടിയന്തര പ്രതിസന്ധികളെ നേരിടാനും ലക്ഷ്യമിട്ടാണ് കേന്ദ്ര സർക്കാർ ഓരോ വികസന നയങ്ങളും നിക്ഷേപ തീരുമാനങ്ങളും കൈക്കൊള്ളുന്നത്. മരുന്ന് നിർമ്മാണത്തിനുള്ള അസംസ്കൃത വസ്തുക്കൾക്കായി മുൻപ് വിദേശങ്ങളെ ആശ്രയിച്ചിരുന്ന ഇന്ത്യ, ഇന്ന് ആ മേഖലയിൽ കൈവരിച്ച തദ്ദേശീയ മുന്നേറ്റം ഇതിന് മികച്ച ഉദാഹരണമാണെന്നും പ്രധാനമന്ത്രി കൂട്ടിച്ചേർത്തു.
At the NDTV World Summit, PM Narendra Modi highlighted that the world now trusts India’s mindpower, transforming the nation from a global back office into an innovative brain office.
