ടാറ്റാ ഗ്രൂപ്പിന്റെ റീട്ടെയിൽ കമ്പനിയായ ട്രെന്റ് ലിമിറ്റഡിന്റെ (Trent Ltd) പുതിയ ചെയർമാനായി ചുമതലയേൽക്കുന്ന ബഹ്‌റാം എൻ. വകീൽ ഇന്ത്യയിലെ മുൻനിര അഭിഭാഷകരിലൊരാളും സാമ്പത്തിക പുനഃസംഘടന, ഇൻസോൾവൻസി (Insolvency), അടിസ്ഥാനസൗകര്യ വികസനം, പ്രൊജക്റ്റ് ഫിനാൻസ് എന്നീ മേഖലകളിൽ ദീർഘകാലത്തെ പരിചയസമ്പത്തുള്ള വ്യക്തിയുമാണ്. കൊളംബിയ യൂണിവേഴ്സിറ്റിയിൽ നിന്ന് എൽ.എൽ.എം ബിരുദം നേടിയ അദ്ദേഹം ഇന്ത്യയിലും ന്യൂയോർക്കിലും അഭിഭാഷകനായി പ്രവർത്തിക്കാൻ യോഗ്യതയുള്ളയാളാണ്.
റിസർവ് ബാങ്ക് ഓഫ് ഇന്ത്യയുടെയും (RBI) സെബിയുടെയും (SEBI) സമിതികളിൽ അംഗമായി പ്രവർത്തിച്ചിട്ടുള്ള വകീൽ, രാജ്യത്തെ ഇൻസോൾവൻസി അഥവാ പാപ്പരത്ത നിയമ പരിഷ്കാരങ്ങളിലും ധനകാര്യ നയരൂപീകരണങ്ങളിലും പ്രധാന പങ്കുവഹിച്ചിട്ടുണ്ട്. ബി.എ.എസ്.എഫ് (BASF) ഇന്ത്യ, ടാറ്റാ ഇൻവെസ്റ്റ്മെന്റ് കോർപ്പറേഷൻ എന്നിവയുടെ ഡയറക്ടർ ബോർഡുകളിലും അദ്ദേഹം സേവനമനുഷ്ഠിക്കുന്നു. കോർപ്പറേറ്റ് അഭിഭാഷകൻ എന്നതിനുപുറമേ ‘എ.സെഡ്.ബി ആന്റ് പാർട്ണേഴ്സ്’ (AZB & Partners) സ്ഥാപകനുമാണ് അദ്ദേഹം.
ടാറ്റാ ഗ്രൂപ്പ് നിർദേശിക്കുന്ന ഭരണനിർവഹണ മാനദണ്ഡങ്ങൾ അനുസരിച്ചാണ് നോയൽ ടാറ്റ ചെയർമാൻ സ്ഥാനത്തുനിന്ന് വിരമിക്കുന്നത്. ഇതിനുശേഷവും അദ്ദേഹം കമ്പനിയുടെ ‘ചെയർമാൻ എമരിറ്റസ്’ ആയി തുടരും. 1.63 ലക്ഷം കോടി രൂപ വിപണിമൂല്യമുള്ള ട്രെന്റ് ലിമിറ്റഡിന്റെ ഡയറക്ടർ ബോർഡിൽ നിലവിൽ എക്സിക്യൂട്ടീവ് ഇതര ഡയറക്ടറായി പ്രവർത്തിച്ചുവരികയായിരുന്നു ബഹ്‌റാം വകീൽ. വിപണിയിലെ കടുത്ത മത്സര അന്തരീക്ഷത്തിൽ ട്രെന്റിന്റെ ഭാവി വളർച്ചയ്ക്ക് അദ്ദേഹത്തിന്റെ അന്താരാഷ്ട്ര നിയമ-സാമ്പത്തിക പരിചയസമ്പത്ത് വലിയ കരുത്താകുമെന്നാണ് വിലയിരുത്തപ്പെടുന്നത്.
Prominent corporate lawyer Bahram Vakil is set to succeed Noel Tata as the new Chairman of Trent Ltd on November 12. Read about his background and experience
