നിർമ്മിത ബുദ്ധി (AI), സെമികണ്ടക്ടറുകൾ, ക്വാണ്ടം കമ്പ്യൂട്ടിംഗ് എന്നീ മേഖലകളിൽ ഇന്ത്യയും ഇസ്രായേലും തമ്മിലുള്ള ഗവേഷണ-വികസന പങ്കാളിത്തം തന്ത്രപ്രധാനമായ മെഗാ പദ്ധതികളിലേക്ക് ഉയർത്തണമെന്ന് ഇസ്രായേൽ ഇന്നൊവേഷൻ അതോറിറ്റി ചെയർമാൻ ഡോ. അലോൺ സ്റ്റോപ്പൽ ആവശ്യപ്പെട്ടു. ഇന്ത്യാ സന്ദർശനത്തിനിടെ എ.എൻ.ഐയ്ക്ക് നൽകിയ അഭിമുഖത്തിലാണ് ഇരുരാജ്യങ്ങളുടെയും സാങ്കേതിക പരമാധികാരം ശക്തിപ്പെടുത്തുന്നതിനായി സംയുക്ത ടെക്നോളജി കൺസോർഷ്യം രൂപീകരിക്കണമെന്ന് അദ്ദേഹം നിർദ്ദേശിച്ചത്. ഇസ്രായേലിന്റെ ഡീപ്-ടെക് വൈദഗ്ധ്യവും ഇന്ത്യയിലെ പ്രതിഭാശാലികളായ യുവതലമുറയെയും വലിയ വിപണിയെയും സംയോജിപ്പിക്കുന്നതിലൂടെ ആഗോളതലത്തിൽ വലിയ മാറ്റങ്ങൾ സൃഷ്ടിക്കാനാകുമെന്ന് അദ്ദേഹം ചൂണ്ടിക്കാട്ടി.

നിലവിലുള്ള ‘ഇന്ത്യ-ഇസ്രായേൽ ഇൻഡസ്ട്രിയൽ ആർ ആൻഡ് ഡി ഫണ്ട്’ (I4F) വിപുലീകരിക്കാനും സംയുക്തമായി എ.ഐ കമ്പ്യൂട്ടറുകളും നൂതന സെമികണ്ടക്ടർ സാങ്കേതികവിദ്യകളും വികസിപ്പിക്കാനും ഇസ്രായേൽ സന്നദ്ധമാണ്. ഇസ്രായേലി സ്റ്റാർട്ടപ്പുകൾക്ക് ഇന്ത്യൻ വിപണിയിലേക്കുള്ള പ്രവേശനം എളുപ്പമാക്കുന്നതിനായി ഒരു ഇന്ത്യൻ സ്ഥാപനവുമായി ചേർന്ന് പ്രത്യേക ലോഞ്ച്പാഡ് പദ്ധതി ആരംഭിക്കുമെന്നും ഡോ. സ്റ്റോപ്പൽ പ്രഖ്യാപിച്ചു. ഇന്ത്യയെ തന്ത്രപ്രധാന പങ്കാളിയായാണ് ഇസ്രായേൽ കാണുന്നതെന്നും സാങ്കേതികവിദ്യയിലൂടെ ഇരുരാജ്യങ്ങളുടെയും വളർച്ചയും സുരക്ഷയും ഉറപ്പാക്കാനാകുമെന്നും അദ്ദേഹം കൂട്ടിച്ചേർത്തു.
Dr. Alon Stopel of Israel Innovation Authority advocates mega-projects in AI, semiconductors, and quantum computing to strengthen India-Israel tech ties.

