മൂന്നാം മോദി സർക്കാരിന്റെ ആദ്യ ബജറ്റിൽ ആന്ധ്രയ്ക്കും ബിഹാറിനും കൈനിറയെ പദ്ധതികള് ആണ് ധനമന്ത്രി നിർമ്മല സീതാരാമൻ പ്രഖ്യാപിച്ചത്. ബിഹാര്, ആന്ധ്ര, ഒഡീഷ സംസ്ഥാനങ്ങള്ക്കായി പ്രത്യേക പദ്ധതികളും ബജറ്റിൽ പറയുന്നുണ്ട്. ബിഹാര്, ഝാര്ഖണ്ഡ്, പശ്ചിമബംഗാള്, ഒഡിഷ, ആന്ധപ്രദേശ് സംസ്ഥാനങ്ങള്ക്കായി പൂര്വോദയ പദ്ധതി പ്രഖ്യാപിച്ചു. ഇതിൽ ഏറ്റവും ശ്രദ്ധിക്കപ്പെടുന്നത് കേന്ദ്രം കേരളത്തോട് കാണിച്ച അവഗണന തന്നെയാണ്.
ബിഹാറിലെ റോഡ് വികസനത്തിനായി 26,000 കോടി രൂപയുടെ പദ്ധതികളാണ് ധനമന്ത്രി പ്രഖ്യാപിച്ചത്. വികസന ഏജൻസികളുടെ ധനസഹായത്തോടെ പദ്ധതികൾ നടപ്പിലാക്കാനാണ് തീരുമാനം. ബിഹാറിൽ 2400 മെഗാവാട്ടിന്റെ ഊർജ പ്ലാന്റിന് 21,400 കോടിയുടെ പദ്ധതി ബജറ്റിൽ പ്രഖ്യാപിച്ചു.
അടിസ്ഥാന സൗകര്യവികസനത്തിന് ബിഹാറിന് കൂടുതല് ധനസഹായം പ്രഖ്യാപിച്ചിട്ടുണ്ട്. പുതിയ വിമാനത്താവളങ്ങള്, മെഡിക്കല് കോളേജുകള്, കായിക സ്ഥാപനങ്ങള് എന്നിവ ബിഹാറില് നിര്മിക്കും. വെള്ളപ്പൊക്ക പ്രതിരോധത്തിനായി 11,500 കോടിയും അനുവദിച്ചു. ബിഹാറില് രണ്ട് ക്ഷേത്ര ഇടനാഴിക്ക് പദ്ധതി. നളന്ദ സര്വകലാശാലയുടെ വികസനത്തിന് മുന്ഗണന നല്കും.
ആന്ധ്രപ്രദേശിന്റെ തലസ്ഥാനം നിർമിക്കുന്നതിനായി വിവിധ ഏജൻസികൾ വഴി പ്രത്യേക ധനസഹായം നൽകും. ഈ വർഷം 15,000 കോടി അനുവദിക്കും. ആവശ്യമായ തുക വരും വർഷങ്ങളിൽ അനുവദിക്കുമെന്നും ധനമന്ത്രി വ്യക്തമാക്കി. അമൃത്സര്-കൊല്ക്കത്ത വ്യവസായ ഇടനാഴി, ബിഹാറിലെ ഗയയിലെ വ്യവസായ പദ്ധതി, ഹൈദരബാദ്-ബെംഗളൂരു വ്യവസായ ഇടനാഴി, വിശാഖപട്ടണം വ്യവസായ ഇടനാഴി തുടങ്ങി വമ്പൻ പദ്ധതികളും ബജറ്റിലുണ്ട്.
ആന്ധ്രയ്ക്കും ബീഹാറിനും പുറമെ ഉത്തരാഖണ്ഡ്, ആസാം, സിക്കിം, ഹിമാചൽ പ്രദേശ് എന്നീ സംസ്ഥാനങ്ങൾക്കും പ്രളയ സഹായം ഉൾപ്പെടെ ഫണ്ടുകൾ ബജറ്റിൽ അനുവദിച്ചിട്ടുണ്ട്. പ്രളയ സഹായങ്ങളിൽ പോലും കേരളത്തെ ഉൾപ്പെടുത്തിയില്ല എന്നതും ശ്രദ്ധേയമാണ്. ബജറ്റ് പ്രസംഗത്തിൽ ഒരു തവണപോലും ധനമന്ത്രി നിർമലാ സീതാരാമൻ കേരളത്തിന്റെ പേര് പരാമർശിച്ചില്ല.
ഇത്തവണയും എയിംസ് ഇല്ല. പ്രത്യേക പദ്ധതികളുമില്ല. 24,000 കോടി രൂപയുടെ പ്രത്യേക പാക്കേജ് അനുവദിക്കണം എന്നതുൾപ്പെടെയുള്ള കേരളത്തിന്റെ ആവശ്യങ്ങളും തള്ളിയിരിക്കുന്നു. കഴിഞ്ഞ 10 വർഷമായി കേരളത്തിനായി ഒരു പുതിയ പദ്ധതിയും നടപ്പാക്കിയിട്ടില്ല. ഓൾ ഇന്ത്യാ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസി (എയിംസ്)ന് സ്ഥലം ഏറ്റെടുക്കൽ ഉൾപ്പെടെ പൂർത്തിയാക്കിയ ഘട്ടത്തിലാണ് കേന്ദ്രസർക്കാരിന്റെ ഈ നീക്കം ഉണ്ടായിരിക്കുന്നത്.
The first budget of the third Modi government, presented by Finance Minister Nirmala Sitharaman, focuses on projects for states like Bihar, Andhra Pradesh, and Odisha, while neglecting Kerala. Discover the highlights and regional allocations.
