ഇന്ത്യയിലെ ആദ്യ ബുള്ളറ്റ് ട്രെയിൻ പദ്ധതിയായ അഹമ്മദാബാദ്-മുംബൈ ഹൈസ്പീഡ് റെയിൽ കോറിഡോർ പദ്ധതി വേഗത്തിലാകുന്നു. ഹൈ-സ്പീഡ് റെയിൽ കോറിഡോറിലെ സിഗ്നലിംഗ്, ടെലികോം സംവിധാനങ്ങൾക്കായുള്ള കരാർ സീമെൻസ് (Siemens) അടങ്ങുന്ന കൺസോർഷ്യത്തിന് നൽകി. രാജ്യത്തെ ആദ്യ അതിവേഗ ബുള്ളറ്റ് ട്രെയിൻ പദ്ധതി നടപ്പിലാക്കുന്ന നാഷണൽ ഹൈ സ്പീഡ് റെയിൽ കോർപ്പറേഷൻ ലിമിറ്റഡാണ് ആകെ 4100 കോടി രൂപയുടെ കരാർ കൺസോർഷ്യത്തിന് നൽകിയിരിക്കുന്നത്.
മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിക്കായി നൂതന സിഗ്നലിംഗ്, ടെലികമ്മ്യൂണിക്കേഷൻ സംവിധാനങ്ങൾ നടപ്പിലാക്കുന്നതിനുള്ള കരാറാണ് ദിനേശ് ചന്ദ്ര അഗർവാൾ ഇൻഫ്രാകോൺ, സീമെൻസ് ലിമിറ്റഡ്, സീമെൻസ് മൊബിലിറ്റി ജിഎംബിഎച്ച് എന്നിവ ഉൾപ്പെടുന്ന കൺസോർഷ്യം നേടിയത്. കരാർ പ്രകാരം സീമെൻസ് യൂറോപ്യൻ ട്രെയിൻ കൺട്രോൾ സിസ്റ്റം (ETCS) ലെവൽ ടൂ അധിഷ്ഠിത സിഗ്നലിംഗും ട്രെയിൻ നിയന്ത്രണ സംവിധാനങ്ങളും വിന്യസിക്കും. മണിക്കൂറിൽ 350 കിലോമീറ്റർ വരെ വേഗതയിൽ ട്രെയിൻ എത്തിക്കുന്നതിനു സഹായിക്കുന്നതാണ് ഈ സംവിധാനങ്ങൾ. ഇതോടൊപ്പം തത്സമയ നിരീക്ഷണം, തുടർച്ചയായ വയർലെസ് കണക്റ്റിവിറ്റി തുടങ്ങിയവ ഉറപ്പാക്കുന്നതിനും ഇത് സഹായിക്കുന്നു.
4100 കോടി രൂപയുടെ കരാറിൽ നൂതന സിഗ്നലിംഗ്, ടെലികമ്മ്യൂണിക്കേഷൻ സാങ്കേതികവിദ്യകളുടെ രൂപകൽപ്പന, ഇൻസ്റ്റാളേഷൻ, ദീർഘകാല മെയിന്റനൻസ് എന്നിവയ്ക്കായി സീമെൻസ് ലിമിറ്റഡിന് 1230 കോടി രൂപയുടെ വിഹിതമാണ് ഉള്ളതെന്ന് കമ്പനി പുറത്തിറക്കിയ ഔദ്യോഗിക പ്രസ്താവനയിൽ പറയുന്നു.
NHSRCL awards ₹4,100 crore contract to a Siemens-led consortium for ETCS Level 2 signalling and telecom systems for India’s first Mumbai-Ahmedabad bullet train.
