ഇന്ത്യയിലെ എൽപിജി ഇറക്കുമതി ചിലവ് മാർഗത്തിന്റെയും ഉറവിട രാജ്യത്തിന്റെയും അടിസ്ഥാനത്തിൽ വലിയ തോതിൽ വ്യത്യാസപ്പെടാമെന്ന് ക്രിസിൽ ഇന്റലിജൻസ് റിപ്പോർട്ട്. രാജ്യത്തെ പൊതുമേഖലാ എണ്ണവിതരണ കമ്പനികൾ യുഎസ്സിൽ നിന്ന് പാചകവാതകം (LPG) ഇറക്കുമതി ചെയ്യാൻ കരാറിൽ ഒപ്പുവെച്ചതിനു പിന്നാലെയാണ് ക്രിസിൽ റിപ്പോർട്ട്. മധ്യപൂർവ രാജ്യങ്ങളിൽ നിന്നുള്ള എൽപിജി സൗദി കോൺട്രാക്ട് പ്രൈസ് (Saudi CP) അടിസ്ഥാനമാക്കിയാണ് വിലനിർണയം നടക്കുന്നത്. എന്നാൽ യുഎസിൽ നിന്നുള്ള എൽപിജി മോണ്ട്–ബെൽവിയു (Mont Belvieu) വിലയോട് ബന്ധപ്പെട്ടിരിക്കുന്നതിനാൽ ഫ്രൈറ്റ് ചിലവിന് വലിയ പങ്കുള്ളതായും ഇത് വിലനിർണയത്തെ ബാധിക്കാമെന്നും റിപ്പോർട്ട് ചൂണ്ടിക്കാട്ടുന്നു.
ഈ മാസം ആദ്യമാണ് ഇന്ത്യ വർഷത്തിൽ 2.2 മില്യൻ ടൺ എൽപിജി ഇറക്കുമതി ചെയ്യാൻ കരാറിൽ ഒപ്പിട്ടത്. നിലവിൽ രാജ്യത്തെ എൽപിജി ആവശ്യത്തിന്റെ 55–60 ശതമാനവും ഇറക്കുമതിയിലൂടെയാണ് നിറവേറ്റുന്നത്. യുഎസ്സുമായുള്ള പുതിയ കരാറിലൂടെ ഇന്ത്യയ്ക്ക് വിതരണ വൈവിധ്യം ഉറപ്പാക്കാനാകും എന്ന നേട്ടമുണ്ട്. ജിയോ-പൊളിറ്റിക്കലി വ്യത്യസ്തമായ ഈ വിതരണ പാത റിസ്ക് ഡൈവർസിഫിക്കേഷനും ഇറക്കുമതി കൂടുതൽ സുഖപ്രദമാക്കാനും സഹായിക്കുമെന്ന് റിപ്പോർട്ട് ചൂണ്ടിക്കാണിക്കുന്നു. എന്നാൽ, യുഎസ്സിൽ നിന്നുള്ള എൽപിജിക്ക് ഉയർന്ന ചരക്ക് ഗതാഗത ചിലവ് വെല്ലുവിളിയാണെന്നും റിപ്പോർട്ട് വ്യക്തമാക്കുന്നു. യുഎസ്സിൽ നിന്ന് ഇന്ത്യയിലേക്ക് കപ്പലുകൾ എത്താൻ ഏകദേശം 45 ദിവസം എടുക്കുമ്പോൾ, മിഡിൽ ഈസ്റ്റിൽ നിന്ന് 7–8 ദിവസം മാത്രം മതി. ഈ വലിയ ദൂരവ്യത്യാസം ചിലവിലും അന്തിമവിലയിലും നേരിട്ട് സ്വാധീനം ചെലുത്തിയേക്കാമെന്ന് ക്രിസിൽ റിപ്പോർട്ട് വിലയിരുത്തുന്നു.
മറുവശത്ത്, വെസ്റ്റ് ഏഷ്യയുമായി താരതമ്യപ്പെടുത്തുമ്പോൾ യുഎസ്സിൽ നിന്നുള്ള ഫ്രൈറ്റ് ചിലവ് കൂടുതലാണെങ്കിലും യുഎസ് ലോകത്തിലെ ഏറ്റവും വലിയ നാച്ചുറൽ ഗ്യാസ് ലിക്വിഡ് (NGL) നിർമാതാക്കളിൽ ഒന്നായതിനാൽ വില കുറവാകാനുള്ള സാധ്യത കൂടുതലാണെന്ന് ചില വിപണി വിദഗ്ധർ ചൂണ്ടിക്കാട്ടുന്നു. ഷെയിൽ ഗ്യാസ് ഉത്പാദനത്തിന്റെ വൻ തോതിൽ ലഭിക്കുന്ന എൻജിഎൽ യുഎസ്സിനെ കുറഞ്ഞ വിലയിൽ എൽപിജി നൽകാൻ ശേഷിയുള്ള വിപണിയായി നിലനിർത്തുന്നു. ഇതുവഴി ഉയർന്ന ഫ്രൈറ്റ് ചിലവിനെ ഒരു പരിധിവരെ ബാലൻസ് ചെയ്യാൻ സാധിക്കുമെന്നാണ് വിലയിരുത്തൽ
Crisil report suggests US LPG imports might be costlier for Indian Oil Marketing Companies due to higher freight costs associated with Mont Belvieu pricing, despite diversification benefits.
