കേരളത്തിന്റെ ലോജിസ്റ്റിക്സ് അടിസ്ഥാന സൗകര്യങ്ങൾക്ക് വലിയ പ്രോത്സാഹനമായി, ഡ്രൈവർ ലോജിസ്റ്റിക്സ് എൽഎൽപി (Driver Logistics LLP) കളമശ്ശേരി കിൻഫ്ര ഹൈടെക് പാർക്കിൽ അവരുടെ അത്യാധുനിക ലോജിസ്റ്റിക്സ് പാർക്ക് ആരംഭിച്ചിരിക്കുകയാണ്. എറണാകുളം ആസ്ഥാനമായുള്ള ഫോർസ വെയർഹൗസിംഗിനു കീഴിലുള്ള ഡ്രൈവർ ലോജിസ്റ്റിക്സിന്റെ വെയർഹൗസ് 1.8 ലക്ഷം ചതുരശ്ര അടി വിസ്തീർണമുള്ളതാണ്.
കളമശ്ശേരി കിൻഫ്ര ഹൈടെക് പാർക്കിൽ 2020ലാണ് ഫോർസ വെയർഹൗസിംഗിന് വെയർഹൗസും ലോജിസ്റ്റിക്സ് സൗകര്യങ്ങളും സ്ഥാപിക്കുന്നതിനായി 5.31 ഏക്കർ ഭൂമി അനുവദിച്ചത്. 20.8 കോടി രൂപയുടെ നിക്ഷേപത്തിലാണ് കമ്പനി അത്യാധുനികരീതിയിലുള്ള വെയർഹൗസ് സൗകര്യം സജ്ജമാക്കിയിട്ടുള്ളത്. വെയർഹൗസിംഗ് ഓപ്പറേഷനുകൾ, ചരക്കുനീക്കം, വിതരണ ശൃംഖലാ സേവനങ്ങൾ തുടങ്ങി വിവിധ വിഭാഗങ്ങളിലായി പ്രത്യക്ഷവും പരോക്ഷവുമായ 250ൽപരം തൊഴിലവസരങ്ങളാണ് ഇതിലൂടെ സൃഷ്ടിക്കപ്പെടുന്നത്.
എച്ച്എംടിയിൽ നിന്ന് തിരിച്ചെടുത്ത 240 ഏക്കർ ഭൂമിയിൽ വികസിപ്പിച്ച് 2008ൽ ഉദ്ഘാടനം ചെയ്ത കളമശ്ശേരി കിൻഫ്ര ഹൈടെക് പാർക്കിൽ നിലവിൽ നൂറിലധികം സ്ഥാപനങ്ങൾ പ്രവർത്തിക്കുന്നുണ്ട്. തടസ്സമില്ലാത്ത വൈദ്യുതി വിതരണം, ആറ് എംഎൽഡി ശേഷിയുള്ള ജലശുദ്ധീകരണ പ്ലാന്റ്, റോഡുകൾ, ടെലികമ്യൂണിക്കേഷൻ തുടങ്ങിയ അടിസ്ഥാന സൗകര്യങ്ങളെല്ലാം കിൻഫ്ര ഒരുക്കിയിട്ടുള്ളതിനാൽ നെസ്റ്റ് ഹൈടെക് പാർക്ക്, ഗെയിൽ, ബിഇഎൽ, നുവാൽസ്, കേരള സ്റ്റാർട്ടപ് മിഷൻ തുടങ്ങി ഒട്ടനവധി പ്രമുഖ സ്ഥാപനങ്ങൾ ആറ് വ്യത്യസ്ത മേഖലകളാക്കി തിരിച്ചിട്ടുള്ള പാർക്കിൽ പ്രവർത്തിക്കുന്നുണ്ട്. ഇവിടെ കിൻഫ്ര നേരിട്ട് വികസിപ്പിച്ച ഇൻഡസ്ട്രി ആൻഡ് ബയോടെക്നോളജി സോണിലാണ് ഫോർസയുടെ ഡ്രൈവർ ലോജിസ്റ്റിക്സ് പ്രവർത്തനം ആരംഭിച്ചിരിക്കുന്നത്.
Driver Logistics LLP, under Forza Warehousing, launches a 1.8 lakh sq. ft. state-of-the-art logistics park at Kinfra Hi-Tech Park, Kochi with a ₹20.8 Cr investment.
