ബെംഗളൂരുവിന് പുറത്തേക്ക് അത്യാധുനിക സാങ്കേതികവിദ്യ വ്യാപിപ്പിക്കുക എന്ന ലക്ഷ്യത്തോടെ കർണാടകയിലെ ധാർവാഡിൽ പുതിയ ക്വാണ്ടം കമ്പ്യൂട്ടിങ് സെന്റർ വരുന്നു. ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി (IIIT) സ്ഥാപിക്കുന്ന ഈ സെന്റർ ഓഫ് എക്സലൻസ് (CoE), കേന്ദ്ര-സംസ്ഥാന സർക്കാരുകളുടെ സഹായത്തോടെ അടുത്ത മൂന്ന്-നാല് മാസത്തിനുള്ളിൽ പ്രവർത്തനസജ്ജമാകും. ബെംഗളൂരു ആസ്ഥാനമായുള്ള ‘ക്യുപിഐഎഐ’ (QpiAI) വികസിപ്പിച്ച 25 ക്യുബിറ്റ് ക്വാണ്ടം കമ്പ്യൂട്ടറും എൻവിഡിയയുടെ ജിപിയു ക്ലസ്റ്ററുമാണ് ഇവിടെ സജ്ജീകരിക്കുന്നത്.
ഈ പദ്ധതിയുടെ പ്രധാന നിക്ഷേപകരും ആസൂത്രകരും കർണാടക സർക്കാരാണ്. ‘ലീപ്’ (LEAP) പദ്ധതിയുടെ ഭാഗമായി ഉപകരണങ്ങൾ വാങ്ങുന്നതിനുള്ള ചിലവും അടുത്ത അഞ്ച് വർഷത്തേക്കുള്ള പ്രവർത്തന ചിലവും സർക്കാർ വഹിക്കും. കേവലം അടിസ്ഥാന ഗവേഷണങ്ങൾക്കപ്പുറം ബാങ്കിംഗ്, ആരോഗ്യം, ഓട്ടോമോട്ടീവ് മേഖലകളിലെ പ്രായോഗിക ആവശ്യങ്ങൾക്കായി ക്വാണ്ടം സാങ്കേതികവിദ്യ എങ്ങനെ ഉപയോഗിക്കാം എന്നതിനാണ് ഈ കേന്ദ്രം മുൻഗണന നൽകുന്നത്. മെഴ്സിഡസ് ബെൻസ് പോലുള്ള വൻകിട കമ്പനികളുമായി സഹകരിച്ച് വിവിധ പ്രശ്നപരിഹാരങ്ങൾക്കായി ഈ സൗകര്യം ഉപയോഗപ്പെടുത്താനും പദ്ധതിയുണ്ട്.
ടയർ-2 നഗരങ്ങളിലെ വിദ്യാർത്ഥികൾക്കും പ്രൊഫഷണലുകൾക്കും അന്താരാഷ്ട്ര നിലവാരത്തിലുള്ള പരിശീലനം ഉറപ്പാക്കി പ്രാദേശികമായ ടെക് ഇക്കോസിസ്റ്റം വളർത്തിയെടുക്കുക എന്നതാണ് ഇതിന്റെ പ്രധാന ലക്ഷ്യം. ഓരോ ആവശ്യങ്ങൾക്കും ബെംഗളൂരുവിലേക്ക് പോകേണ്ട സാഹചര്യം ഒഴിവാക്കി മൈസൂരു, മംഗളൂരു തുടങ്ങിയ നഗരങ്ങളിലേക്കും ഇത്തരം കേന്ദ്രങ്ങൾ വ്യാപിപ്പിക്കാൻ കർണാടകയുടെ ക്വാണ്ടം റോഡ്മാപ്പ് (2026-2035) ലക്ഷ്യമിടുന്നു. അധ്യാപകർക്കും വിദ്യാർത്ഥികൾക്കും പ്രത്യേക കോഴ്സുകളും താമസസൗകര്യവും നൽകിക്കൊണ്ട് ഒരു ദേശീയ തലത്തിലുള്ള പരിശീലന കേന്ദ്രമായി ഇതിനെ മാറ്റാനാണ് അധികൃതർ ഒരുങ്ങുന്നത്.
Karnataka sets a new milestone as Dharwad gets its first state-of-the-art Quantum Computing Center at IIIT. Powered by QpiAI’s 25-qubit computer and the LEAP initiative, this hub aims to revolutionize banking, healthcare, and automotive sectors beyond Bengaluru
