കേരളത്തിൽ പൂർണ്ണമായും സൗരോർജ്ജത്തിൽ പ്രവർത്തിക്കുന്ന അതിവേഗ റെയിൽ ഇടനാഴി (KHSR) സ്ഥാപിക്കുകയെന്ന നിർദ്ദേശവുമായി ‘മെട്രോ മാൻ’ ഇ. ശ്രീധരൻ രംഗത്തെത്തിയിരിക്കുകയാണ്. തിരുവനന്തപുരം മുതൽ കണ്ണൂർ വരെ ഏകദേശം 470 കിലോമീറ്റർ നീളത്തിൽ നിർദ്ദേശിച്ചിരിക്കുന്ന ഈ അർദ്ധ അതിവേഗ റെയിൽ ശൃംഖല യാഥാർത്ഥ്യമായാൽ, ആഗോളതലത്തിൽ ഈ ഗണത്തിൽപ്പെടുന്ന ലോകത്തിലെ ആദ്യത്തെ സമ്പൂർണ്ണ സൗരോർജ്ജ റെയിൽപ്പാതയായി ഇത് മാറും.
മണിക്കൂറിൽ 200 കിലോമീറ്റർ വേഗതയിൽ സഞ്ചരിക്കുന്ന ട്രെയിനുകൾ വഴി കേരളത്തിന്റെ ഒരറ്റത്തുനിന്ന് മറ്റേ അറ്റത്തേക്കുള്ള യാത്രാസമയം വെറും മൂന്നര മണിക്കൂറായി കുറയ്ക്കാനാകും. ഭൂരിഭാഗവും തൂണുകളിൽ നിർമ്മിക്കുന്നതു വഴി സ്ഥലം ഏറ്റെടുക്കൽ മൂലമുള്ള ജനങ്ങളുടെ ഭീതി ഒഴിവാക്കാനും സാധിക്കും. ഇന്ത്യയിലെ ഏറ്റവും മികച്ച ടെക്നോക്രാറ്റുകളിൽ ഒരാളായ ഇ. ശ്രീധരന്റെ നേതൃത്വത്തിൽ വിഭാവനം ചെയ്തിരിക്കുന്ന, 54,000 മുതൽ 60,000 കോടി രൂപ വരെ ചിലവ് പ്രതീക്ഷിക്കുന്ന ഈ പദ്ധതി പരിസ്ഥിതി സൗഹൃദമായ പുതിയ വികസന മാതൃകയാണ് രാജ്യത്തിന് മുന്നിൽ വെക്കുന്നത്.
Metro Man E. Sreedharan proposes a 470 km solar-powered semi-high-speed rail corridor from Thiruvananthapuram to Kannur, cutting Kerala travel time to 3.5 hours
