രാജ്യത്തിന്റെ സമുദ്രമേഖലയിൽ ചരിത്രപരമായ കുതിച്ചുചാട്ടത്തിന് ഒരുങ്ങി പൊതുമേഖലാ സ്ഥാപനമായ മസഗോൺ ഡോക്ക് ഷിപ്പ് ബിൽഡേഴ്സ് ലിമിറ്റഡ് (MDL). ആന്ധ്രാപ്രദേശിലെ ദുഗരാജപട്ടണത്ത് ₹15,000 കോടി ചെലവിൽ അത്യാധുനിക ഗ്രീൻഫീൽഡ് കപ്പൽ നിർമ്മാണ ശാല സ്ഥാപിക്കുന്നതിനായി നാഷണൽ ഷിപ്പ് ബിൽഡിംഗ് ആൻഡ് ഹെവി ഇൻഡസ്ട്രീസ് പാർക്കുമായി (NSHIP-AP) എം.ഡി.എൽ. ധാരണാപത്രത്തിൽ ഒപ്പുവെച്ചു.
അടുത്ത 5 മുതൽ 7 വർഷത്തിനുള്ളിൽ പൂർത്തിയാക്കുന്ന ഈ പദ്ധതിയിലൂടെ ഏകദേശം 45,000 തൊഴിലവസരങ്ങൾ സൃഷ്ടിക്കപ്പെടുമെന്നും, 2047-ഓടെ ലോകത്തെ ആദ്യത്തെ അഞ്ച് കപ്പൽ നിർമ്മാണ രാജ്യങ്ങളിൽ ഒന്നാകാനുള്ള ഇന്ത്യയുടെ ലക്ഷ്യത്തിൽ ഇത് നിർണ്ണായകമാകുമെന്നും ചടങ്ങിൽ സംസാരിക്കവേ ആന്ധ്ര മുഖ്യമന്ത്രി ചന്ദ്രബാബു നായിഡു വ്യക്തമാക്കി. വർഷത്തിൽ 1.2 ദശലക്ഷം ഗ്രോസ് ടൊണ്ണേജ് ശേഷിയുള്ള ഈ ശാലയിൽ ടാങ്കറുകൾ, എൽ.എൻ.ജി. കാരിയറുകൾ തുടങ്ങിയ വലിയ വാണിജ്യ കപ്പലുകൾ നിർമ്മിക്കും.
ഇതിനുപുറമെ, മഹാരാഷ്ട്ര സർക്കാരിന്റെ നാമനിർദ്ദേശപ്രകാരം അവിടേയും ഒരു മെഗാ ഷിപ്പ് യാർഡ് സ്ഥാപിക്കുന്നതിനുള്ള പ്രാരംഭ പദ്ധതികൾ എം.ഡി.എൽ. പുരോഗമിപ്പിക്കുന്നുണ്ടെന്ന് കമ്പനിയുടെ ഫിനാൻസ് ഡയറക്ടർ റുചിർ അഗർവാൾ വ്യക്തമാക്കി. സർക്കാരിന്റെ ‘മറൈൻ അമൃത് കാൽ വിഷൻ 2047’-ന്റെ ഭാഗമായാണ് ഈ വിപുലീകരണ പദ്ധതികൾ നടപ്പിലാക്കുന്നത്. വിദേശ നിക്ഷേപകരെയും ഉൾപ്പെടുത്തി മുന്നോട്ട് പോകുന്ന ഈ പദ്ധതികളിലൂടെ കമ്പനി നിക്ഷേപകർക്ക് 15 മുതൽ 17% വരെ വരുമാന വളർച്ചയാണ് പ്രതീക്ഷിക്കുന്നത്.
വരാനിരിക്കുന്ന അന്തർവാഹിനി കരാറുകളുടെ കൂടി പശ്ചാത്തലത്തിൽ മസഗോൺ ഡോക്കിന്റെ നിലവിലെ ഓർഡർ ബുക്ക് ₹1 ലക്ഷം കോടി രൂപയെന്ന ലക്ഷ്യത്തിലേക്ക് കുതിക്കുകയാണെന്നും അദ്ദേഹം കൂട്ടിച്ചേർത്തു. നിലവിൽ ₹18,000 കോടിയിൽ താഴെയുള്ള ഓർഡർ ബുക്ക്, ജർമ്മനിയുടെ ടികെഎംഎസുമായി (TKMS) സഹകരിച്ച് നടപ്പിലാക്കുന്ന പി-75ഐ (P-75I) സബ്മറൈൻ പദ്ധതി ഉൾപ്പെടെയുള്ള വൻകിട നാവിക കരാറുകൾ ലഭിക്കുന്നതോടെ വൻതോതിൽ ഉയരുമെന്നാണ് പ്രതീക്ഷിക്കുന്നത്. ഈ സാമ്പത്തിക വർഷം കമ്പനി 15-17% വരുമാന വളർച്ച കൈവരിക്കുമെന്നും അധികൃതർ വ്യക്തമാക്കുന്നു.
Mazagon Dock Shipbuilders is investing Rs 15,000 crore in a greenfield shipyard in Andhra Pradesh, creating 45,000 jobs as its order book approaches Rs 1 lakh crore
