ലാറ്റിനമേരിക്കൻ വിപണിയിൽ സാന്നിധ്യം ശക്തമാക്കാനുള്ള നീക്കങ്ങളുടെ ഭാഗമായി ഇന്ത്യയും മെക്സിക്കോയും തമ്മിലുള്ള മുൻഗണനാ വ്യാപാര കരാറിന് (Preferential Trade Agreement – PTA) വഴിയൊരുങ്ങുന്നു. ഒക്ടോബർ 26-ന് മെക്സിക്കോ സിറ്റിയിൽ ആരംഭിച്ച സന്ദർശനത്തിൽ കേന്ദ്ര വാണിജ്യ സെക്രട്ടറി രാജേഷ് അഗർവാൾ ചർച്ചകൾക്കുള്ള മാർഗ്ഗരേഖയിൽ (Terms of Reference – ToR) ഒപ്പുവെക്കുന്നതോടെ കരാറിനായുള്ള ഔദ്യോഗിക ചർച്ചകൾക്ക് തുടക്കമാകും. ഇരുരാജ്യങ്ങളും തമ്മിൽ തിരഞ്ഞെടുക്കപ്പെട്ട ഉൽപ്പന്നങ്ങളുടെ ഇറക്കുമതി തീരുവ ഒഴിവാക്കുന്നതിനും വ്യാപാരം കൂടുതൽ ഉദാരമാക്കുന്നതിനുമുള്ള ‘ഏർലി ഹാർവെസ്റ്റ്’ (Early Harvest) ഇടക്കാല കരാറിനാണ് മെക്സിക്കോ പ്രധാനമായും താല്പര്യം പ്രകടിപ്പിക്കുന്നതെന്ന് കേന്ദ്ര വാണിജ്യ മന്ത്രി പിയൂഷ് ഗോയൽ അറിയിച്ചു.
മരുന്ന്, ഗതാഗതം, ഐ.ടി തുടങ്ങി ഇരുരാജ്യങ്ങൾക്കും സാധ്യതയുള്ള വിവിധ മേഖലകളിലെ ഉൽപ്പന്നങ്ങളുടെ തീരുവ കുറയ്ക്കാനും സപ്ലൈ ചെയിൻ ബന്ധങ്ങൾ കൂടുതൽ കരുത്തുറ്റതാക്കാനും ഈ പങ്കാളിത്തം വഴി സാധിക്കും. ഒപ്പുവെക്കലിന് മുന്നോടിയായി ഇന്ത്യൻ എംബസിയുടെയും ഇൻഡ്മെക്സ് (Indmex) കൗൺസിലിന്റെയും നേതൃത്വത്തിൽ പ്രമുഖ ഇന്ത്യൻ-മെക്സിക്കൻ വ്യവസായികളുടെ യോഗം ചേർന്ന് നിക്ഷേപ സാധ്യതകൾ ചർച്ച ചെയ്തു. ഏകദേശം 7 ശതമാനം സാമ്പത്തിക വളർച്ച കൈവരിക്കുന്ന ഇന്ത്യയ്ക്ക് മെക്സിക്കൻ വിപണിയിലുള്ള സാധ്യതകൾ പരമാവധി പ്രയോജനപ്പെടുത്താനും, സ്ഥിരതയുള്ള വ്യവസ്ഥാപിത വ്യാപാര അന്തരീക്ഷം ഉറപ്പുവരുത്താനും ഈ നീക്കം സഹായിക്കുമെന്ന് വാണിജ്യ മന്ത്രാലയം വ്യക്തമാക്കി.
India and Mexico initiate official negotiations for a Preferential Trade Agreement to lower import duties, boost supply chains, and strengthen economic ties in Latin America.
