കേരളത്തിലെ ബാറുകളിൽ പ്രായപൂർത്തിയാകാത്തവർക്ക് മദ്യം നൽകുന്നത് തടയാൻ ആധാർ ഉൾപ്പെടെയുള്ള തിരിച്ചറിയൽ രേഖകൾ പരിശോധിച്ച് പ്രായം ഉറപ്പുവരുത്തണമെന്ന് എക്സൈസ് മന്ത്രി എം. ലിജു നിർദേശം നൽകി. സംസ്ഥാനത്തെ മദ്യശാലകളിൽ പ്രായപരിശോധന കർശനമാക്കണമെന്ന നിർദേശം പാലിക്കപ്പെടുന്നുണ്ടെന്ന് ഉറപ്പാക്കേണ്ട പൂർണ ഉത്തരവാദിത്വം ബാർ ലൈസൻസികൾക്കാണെന്ന് മന്ത്രി വ്യക്തമാക്കി. നിയമലംഘനം നടത്തുന്ന ബാറുകൾക്കെതിരെ കർശന നടപടിയുണ്ടാകും.
കേരളത്തിലെ അബ്കാരി നിയമപ്രകാരം മദ്യം വാങ്ങുന്നതിനും കഴിക്കുന്നതിനുമുള്ള കുറഞ്ഞ പ്രായപരിധി 23 വയസ്സാണ്. എന്നാൽ ഇത് കൃത്യമായി പാലിക്കപ്പെടാത്ത സാഹചര്യത്തിലാണ് സർക്കാർ കർശന നടപടികളിലേക്ക് കടന്നത്. നെടുമ്പാശ്ശേരിയിൽ മൂന്ന് കോളേജ് വിദ്യാർഥികളുടെ മരണത്തിനിടയാക്കിയ മിനി കൂപ്പർ വാഹനാപകടത്തിൽ, 19 വയസ്സുകാരനായ ഡ്രൈവർ മൂന്ന് പ്രമുഖ ബാറുകളിൽ നിന്ന് മദ്യം കഴിച്ചതായി എക്സൈസ് വകുപ്പ് കണ്ടെത്തിയിരുന്നു. ഇത്തരം സംഭവങ്ങൾ ആവർത്തിക്കാതിരിക്കാനാണ് എക്സൈസ് വകുപ്പുമായി കൂടിയാലോചിച്ച് പുതിയ തീരുമാനം കൈക്കൊണ്ടത്.
മദ്യശാലകളിൽ നിയമം ലംഘിച്ച് പ്രായപൂർത്തിയാകാത്തവർക്ക് മദ്യം നൽകുന്നത് തടയാൻ എക്സൈസ് സംഘം വരും ദിവസങ്ങളിൽ സംസ്ഥാനത്തുടനീളം പരിശോധന ശക്തമാക്കാനാണ് തീരുമാനം. നിയമം ലംഘിക്കുന്ന ബാറുകളുടെ ലൈസൻസ് റദ്ദാക്കുന്നത് ഉൾപ്പെടെയുള്ള നടപടികളിലേക്ക് എക്സൈസ് വകുപ്പ് കടക്കും. ഹൈക്കോടതിയെയും സർക്കാർ ഈ തീരുമാനങ്ങൾ ഔദ്യോഗികമായി അറിയിച്ചിട്ടുണ്ട്. സംസ്ഥാന സർക്കാരിന്റെ പുതിയ എക്സൈസ് നയം നവംബറിൽ പ്രഖ്യാപിക്കുമെന്ന് മന്ത്രി അറിയിച്ചു. ലഹരിവസ്തുക്കളുടെ ഉപയോഗം തടയുന്നതിനും കർശന നിയന്ത്രണങ്ങൾ ഏർപ്പെടുത്തുന്നതിനുമുള്ള വ്യവസ്ഥകൾ പുതിയ മദ്യനയത്തിൽ ഉൾപ്പെടുത്തും.
Kerala Excise Department makes Aadhaar verification mandatory at bars to strictly enforce the minimum drinking age limit of 23. Read details here.
