സ്റ്റാർട്ടപ്പുകൾക്ക് ലോകവേദിയുമായി് ഹഡിൽ

കേരളത്തിന്റെ സ്റ്റാർട്ടപ്പ് എക്കോസിസ്റ്റത്തെ ആഗോള നിക്ഷേപകരുമായും സാങ്കേതികവിദ്യാ വിദഗ്ധരുമായും ബന്ധിപ്പിക്കുന്ന ഹഡിൽ ഗ്ലോബൽ 2026 നവംബർ 12, 13, 14 തീയതികളിൽ തിരുവനന്തപുരത്തെ ലീല കോവളത്ത് നടക്കും. കേരള സ്റ്റാർട്ടപ്പ് മിഷൻ സംഘടിപ്പിക്കുന്ന ഹഡിൽ ഗ്ലോബലിന്റെ എട്ടാമത് പതിപ്പിൽ ഏകദേശം 100 നിക്ഷേപകരും നൂറിലധികം മെന്റർമാരും വിവിധ മേഖലകളിൽനിന്നുള്ള 150ലധികം പ്രഭാഷകരും പങ്കെടുക്കുമെന്ന് കേരള സ്റ്റാർട്ടപ്പ് മിഷൻ സിഇഒ അനൂപ് അംബിക അറിയിച്ചു.

സംരംഭകർക്ക് പുതിയ നിക്ഷേപസാധ്യതകളും ബിസിനസ് ബന്ധങ്ങളും കണ്ടെത്തുന്നതിനൊപ്പം ആഗോള സ്റ്റാർട്ടപ്പ് സമൂഹവുമായി ആശയവിനിമയം നടത്താനുള്ള വേദിയായിരിക്കും ഹഡിൽ ഗ്ലോബൽ.

ഇനിയും ഒരു ടെക് കോൺഫറൻസിൽ പങ്കെടുക്കേണ്ടതിന്റെ ആവശ്യകതയെക്കുറിച്ച് പലരും ചോദിക്കാറുണ്ടെന്ന് അനൂപ് അംബിക പറഞ്ഞു. അതിന് വളരെ ലളിതമായ ഉത്തരമാണുള്ളതെന്നും അദ്ദേഹം വ്യക്തമാക്കി. സ്റ്റാർട്ടപ്പ് സ്ഥാപകർ, സംരംഭകരാകാൻ ആഗ്രഹിക്കുന്നവർ, മെന്റർമാർ, നിക്ഷേപകർ, വ്യവസായ വിദഗ്ധർ തുടങ്ങി വ്യത്യസ്ത മേഖലകളിലുള്ളവരെ ഒരേ വേദിയിൽ അനൗപചാരികമായി കാണാനും സംസാരിക്കാനും കഴിയുന്നതാണ് ഹഡിൽ ഗ്ലോബലിന്റെ പ്രധാന പ്രത്യേകത.

സാധാരണ കോൺഫറൻസുകളിലെ പ്രസംഗങ്ങളും പാനൽ ചർച്ചകളും മാത്രമല്ല, നേരിട്ടുള്ള കൂടിക്കാഴ്ചകളും സൗഹൃദസംഭാഷണങ്ങളും സംരംഭകർക്ക് പുതിയ അവസരങ്ങളൊരുക്കുമെന്ന് അദ്ദേഹം ചൂണ്ടിക്കാട്ടി. ലീല കോവളത്തിന്റെ കടൽത്തീരത്തുകൂടി നടക്കുമ്പോൾ പോലും പുതിയ സംരംഭകരെയും നിക്ഷേപകരെയും മെന്റർമാരെയും കണ്ടുമുട്ടാൻ കഴിയുന്ന അന്തരീക്ഷമാണ് ഹഡിൽ ഗ്ലോബൽ ഒരുക്കുന്നതെന്ന് അനൂപ് അംബിക പറഞ്ഞു.

സംരംഭകയാത്രയിലെ വെല്ലുവിളികൾ, പുതിയ ബിസിനസ് ആശയങ്ങൾ, വിപണി വിപുലീകരണം, നിക്ഷേപസാധ്യതകൾ തുടങ്ങിയ വിഷയങ്ങളിൽ നേരിട്ട് ആശയവിനിമയം നടത്താനാകുമെന്നതാണ് പരിപാടിയുടെ പ്രത്യേകത.

ഒരു സ്റ്റാർട്ടപ്പിന്റെ വളർച്ചയിൽ നിക്ഷേപകരുമായുള്ള ബന്ധങ്ങൾ നിർണായകമാണ്.മികച്ച ഉൽപ്പന്നമോ നൂതന ആശയമോ ഉണ്ടായിട്ടും അനുയോജ്യമായ നിക്ഷേപകരെ കണ്ടെത്താൻ കഴിയാത്തത് പല സംരംഭകരും നേരിടുന്ന വെല്ലുവിളിയാണ്. ഹഡിൽ ഗ്ലോബൽ ഈ അകലം കുറയ്ക്കാനുള്ള വേദിയായി മാറും. നിക്ഷേപകരുമായി നേരിട്ട് സംസാരിക്കാനും ബിസിനസ് ആശയങ്ങൾ അവതരിപ്പിക്കാനും വിപണി സാധ്യതകൾ ചർച്ച ചെയ്യാനും സംരംഭകർക്ക് അവസരമുണ്ടാകും. നിക്ഷേപസമാഹരണത്തിന് പുറമെ പരിചയസമ്പന്നരായ മെന്റർമാരുടെ നിർദേശങ്ങൾ സ്വീകരിക്കാനും വ്യവസായരംഗത്തെ പ്രമുഖരുമായി ബന്ധം സ്ഥാപിക്കാനും പരിപാടി സഹായിക്കും. അതേസമയം നിക്ഷേപകരുമായുള്ള കൂടിക്കാഴ്ചകൾ നിക്ഷേപം ലഭിക്കുമെന്ന ഉറപ്പല്ല. മികച്ച ബിസിനസ് ആശയങ്ങൾക്കും വളർച്ചാസാധ്യതയുള്ള സംരംഭങ്ങൾക്കും അനുയോജ്യമായ ബന്ധങ്ങൾ കണ്ടെത്താനുള്ള അവസരമാണ് പരിപാടി ഒരുക്കുന്നത്.

ഇന്ത്യയിലെ ശ്രദ്ധേയമായ ബീച്ച്സൈഡ് സ്റ്റാർട്ടപ്പ് സംഗമങ്ങളിലൊന്നായ ഹഡിൽ ഗ്ലോബലിൽ ഇന്ത്യയ്ക്കകത്തും പുറത്തുമുള്ള സംരംഭകരും വ്യവസായ വിദഗ്ധരും പങ്കെടുക്കും. സ്റ്റാർട്ടപ്പ് സ്ഥാപകർ, നിക്ഷേപകർ, കോർപ്പറേറ്റ് പ്രതിനിധികൾ, നയരൂപീകരണ രംഗത്തെ പ്രമുഖർ, സാങ്കേതികവിദ്യാ വിദഗ്ധർ തുടങ്ങിയവരുടെ പങ്കാളിത്തം പരിപാടിയെ വിപുലമായ ബിസിനസ് നെറ്റ്‌വർക്കിങ് വേദിയാക്കും.ആഗോള വിപണികളിലേക്ക് കടക്കാൻ ആഗ്രഹിക്കുന്ന കേരളത്തിലെ സ്റ്റാർട്ടപ്പുകൾക്ക് അന്താരാഷ്ട്ര സംരംഭക സമൂഹവുമായി ബന്ധപ്പെടാനുള്ള അവസരവും ഇതിലൂടെ ലഭിക്കും.

ഹഡിൽ ഗ്ലോബൽ 2026ന്റെ ഔദ്യോഗിക പരിപാടിപ്പട്ടിക പ്രകാരം നിക്ഷേപം, സാങ്കേതികവിദ്യ, വിപണി വികസനം, ബിസിനസ് വളർച്ച, സുസ്ഥിര വികസനം തുടങ്ങിയ വിഷയങ്ങളിൽ വിവിധ സെഷനുകൾ നടക്കും. Light House, Beyond Borders, Funding Mania, Marketing Madness, SDG Zone, DeepTech Zone തുടങ്ങിയ വേദികളിലാണ് ചർച്ചകൾ ക്രമീകരിച്ചിരിക്കുന്നത്.സ്റ്റാർട്ടപ്പുകൾക്ക് നിക്ഷേപകരുമായി ബന്ധപ്പെടാനുള്ള Investor Connect, വിദഗ്ധരിൽനിന്ന് മാർഗനിർദേശം നേടാനുള്ള Mentor Connect, ഉൽപ്പന്നങ്ങൾ അവതരിപ്പിക്കാനുള്ള Product Launch, പുതിയ സാങ്കേതികവിദ്യകളും ഉൽപ്പന്നങ്ങളും പ്രദർശിപ്പിക്കാനുള്ള Product Expo തുടങ്ങിയ അവസരങ്ങളും പരിപാടിയുടെ ഭാഗമാണ്.തിരഞ്ഞെടുത്ത സ്റ്റാർട്ടപ്പുകൾക്ക് നിക്ഷേപകരുമായും കോർപ്പറേറ്റ് സ്ഥാപനങ്ങളുമായും പ്രത്യേക കൂടിക്കാഴ്ചകൾ നടത്താനുള്ള സംവിധാനങ്ങളും ഒരുക്കിയിട്ടുണ്ട്.

ഹഡിൽ ഗ്ലോബലിന്റെ ഏറ്റവും വലിയ നേട്ടം പുതിയ ബിസിനസ് ബന്ധങ്ങൾ മാത്രമല്ലെന്ന് അനൂപ് അംബിക വ്യക്തമാക്കി.സമാനമായ ലക്ഷ്യങ്ങളും സ്വപ്നങ്ങളും പങ്കുവെക്കുന്ന സംരംഭകരുടെ കൂട്ടായ്മയുടെ ഭാഗമാണെന്ന അനുഭവം പങ്കെടുക്കുന്നവർക്ക് ലഭിക്കും.സ്വന്തമായി ഒരു സംരംഭം ആരംഭിക്കുമ്പോഴും വളർത്തുമ്പോഴും നേരിടുന്ന വെല്ലുവിളികൾ പലപ്പോഴും സംരംഭകർക്ക് ഒറ്റപ്പെട്ട അനുഭവമായിരിക്കും.
എന്നാൽ സമാനമായ സാഹചര്യങ്ങളിലൂടെ കടന്നുപോകുന്നവരെ നേരിൽ കാണാനും അവരുടെ അനുഭവങ്ങൾ അറിയാനും കഴിയുന്നത് പുതിയ ആത്മവിശ്വാസം നൽകും.ഹഡിൽ ഗ്ലോബൽ കഴിഞ്ഞ് മടങ്ങുമ്പോൾ പങ്കെടുക്കുന്നവർക്ക് പുതിയ ഊർജവും പ്രചോദനവും ആത്മവിശ്വാസവും ലഭിക്കുമെന്നാണ് പ്രതീക്ഷിക്കുന്നതെന്ന് അനൂപ് അംബിക പറഞ്ഞു.

കേരളത്തിലെ സ്റ്റാർട്ടപ്പുകൾക്ക് ദേശീയ, അന്താരാഷ്ട്ര വിപണികളിലേക്ക് കടക്കാനും പുതിയ നിക്ഷേപകരെയും ബിസിനസ് പങ്കാളികളെയും കണ്ടെത്താനും സഹായിക്കുന്ന പ്രധാന പരിപാടികളിലൊന്നാണ് ഹഡിൽ ഗ്ലോബൽ.സംരംഭക ആശയങ്ങളെ വിപണിയിലെത്തിക്കുന്നതിനും വളർച്ചയുടെ അടുത്ത ഘട്ടത്തിലേക്ക് കടക്കുന്നതിനും ആവശ്യമായ ബന്ധങ്ങളും അറിവും കണ്ടെത്താനുള്ള അവസരമാണ് ഇത്തരം സംഗമങ്ങൾ ഒരുക്കുന്നത്.നൂതന ആശയങ്ങളുള്ള വിദ്യാർത്ഥികൾക്കും സംരംഭകരാകാൻ ആഗ്രഹിക്കുന്ന യുവാക്കൾക്കും പ്രവർത്തനം ആരംഭിച്ച സ്റ്റാർട്ടപ്പുകൾക്കും വളർച്ചയുടെ വിവിധ ഘട്ടങ്ങളിലുള്ള കമ്പനികൾക്കും ഹഡിൽ ഗ്ലോബൽ പ്രയോജനകരമായ വേദിയായിരിക്കും.
കേരളത്തെ ആഗോള സ്റ്റാർട്ടപ്പ് ഭൂപടത്തിൽ കൂടുതൽ ശ്രദ്ധേയമാക്കാനുള്ള ശ്രമങ്ങളുടെ ഭാഗമായാണ് എട്ടാമത് ഹഡിൽ ഗ്ലോബൽ സംഘടിപ്പിക്കുന്നത്.നവംബർ 12 മുതൽ 14 വരെ ലീല കോവളത്ത് നടക്കുന്ന പരിപാടിയിലേക്ക് സ്റ്റാർട്ടപ്പ് സ്ഥാപകരെയും സംരംഭകരാകാൻ ആഗ്രഹിക്കുന്നവരെയും നിക്ഷേപകരെയും മെന്റർമാരെയും കേരള സ്റ്റാർട്ടപ്പ് മിഷൻ സിഇഒ അനൂപ് അംബിക സ്വാഗതം ചെയ്തു.

The eighth edition of Huddle Global 2026, organised by Kerala Startup Mission (KSUM), will take place from November 12 to 14 at The Leela Kovalam, Thiruvananthapuram. The event will bring together approximately 100 investors, over 100 mentors, and more than 150 speakers, offering startups opportunities to connect directly with investors and industry experts. KSUM CEO Anoop Ambika highlighted that Huddle Global goes beyond conventional tech conferences by encouraging informal networking, meaningful conversations, and collaboration. He said the event aims to inspire entrepreneurs, build valuable connections, and provide fresh ideas, confidence, and motivation for their entrepreneurial journeys.