ഇന്ത്യയിലെ തിരഞ്ഞെടുത്ത ഫയറിംഗ് റേഞ്ചുകളിൽ ജപ്പാൻ സെൽഫ് ഡിഫൻസ് ഫോഴ്സിന് (JSDF) ആദ്യമായി ലൈവ്-ഫയർ പരിശീലനം നടത്തുന്നതിനുള്ള താല്പര്യപത്രത്തിൽ ഇന്ത്യയും ജപ്പാനും ഒപ്പുവെച്ചു. ടോക്കിയോയിൽ നടന്ന നാലാമത് ഇന്ത്യ-ജപ്പാൻ വിദേശകാര്യ-പ്രതിരോധ മന്ത്രിതല (2+2) യോഗത്തിലാണ് പ്രതിരോധ മന്ത്രി രാജ്നാഥ് സിംഗും ജാപ്പനീസ് പ്രതിരോധ മന്ത്രി ഷിൻജിറോ കൊയ്സുമിയും ഇക്കാര്യത്തിൽ ധാരണയായത്. കരയിൽ നിന്ന് കപ്പലുകളിലേക്ക് തൊടുക്കാവുന്ന മിസൈൽ പരിശീലനങ്ങൾ ഉൾപ്പെടെയാണ് ഇതിലൂടെ ലക്ഷ്യമിടുന്നത്; എന്നാൽ ഇത് ഇന്ത്യയിൽ ജപ്പാന്റെ സ്ഥിരം സൈനിക സാന്നിധ്യത്തിനോ സൈനിക കേന്ദ്രങ്ങളിലേക്കുള്ള അനിയന്ത്രിതമായ പ്രവേശനത്തിനോ വഴിയൊരുക്കില്ല. ചൈനയുടെ വർദ്ധിച്ചുവരുന്ന സൈനിക നീക്കങ്ങളുടെ പശ്ചാത്തലത്തിൽ ഇന്തോ-പസഫിക് മേഖലയിലെ സുരക്ഷയും ഇരുരാജ്യങ്ങളുടെയും സൈനിക ഏകോപനവും ശക്തിപ്പെടുത്താൻ ഈ നീക്കം സഹായിക്കും.

പ്രതിരോധ പരിശീലനത്തിന് പുറമെ ‘ഡിസൈൻ വിത്ത് ജപ്പാൻ, മേക്ക് ഇൻ ഇന്ത്യ’ പദ്ധതിക്ക് കീഴിൽ യുദ്ധക്കപ്പലുകളിലെ വാർത്താവിനിമയ സംവിധാനമായ ‘യൂണിക്കോൺ’ (UNICORN) ആന്റിനയുടെ നടപടികൾ വേഗത്തിലാക്കാനും 2027 ഫെബ്രുവരിയോടെ ഇതിന് ഇന്ത്യയുടെ പ്രാരംഭ അനുമതി (AoN) നൽകാനും യോഗത്തിൽ തീരുമാനമായി. സമുദ്ര സുരക്ഷാ കരാർ പ്രാവർത്തികമാക്കുന്നതിന്റെ ഭാഗമായി വിവര കൈമാറ്റം, രക്ഷാപ്രവർത്തനം, സംയുക്ത നാവിക കപ്പൽ നിർമ്മാണം, മൈൻ പ്രതിരോധ ശേഷി വർദ്ധിപ്പിക്കൽ എന്നിവയിലും ഇരുരാജ്യങ്ങളും സഹകരിക്കും. ഇതിനുപുറമെ സെമികണ്ടക്ടറുകൾ, അപൂർവ ധാതുക്കൾ, ശുദ്ധോർജ്ജം, ഫാർമസ്യൂട്ടിക്കൽസ് എന്നീ മേഖലകളിലെ വിതരണ ശൃംഖല ശക്തിപ്പെടുത്തുന്നതിനും സമുദ്രാന്തര കേബിളുകളുടെയും എ.ഐ സൈബർ സുരക്ഷയുടെയും സംരക്ഷണത്തിനായി ഒരുമിച്ച് പ്രവർത്തിക്കാനും 2+2 യോഗത്തിൽ ധാരണയായി.
India & Japan sign LOI allowing Japan’s Self-Defense Forces live-fire training in India. Key outcomes from the 2+2 Ministerial Dialogue in Tokyo. (149 characters)

