രാജ്യത്തുടനീളമുള്ള സംരംഭകർക്ക് അധിക മൂലധന പിന്തുണ നൽകുന്നതിന്, സ്റ്റാർട്ടപ്പുകൾക്കായി ഒരു ഇക്വിറ്റി ഫണ്ട് സൃഷ്ടിക്കാൻ കേന്ദ്ര സർക്കാർ. 20 ശതമാനം ലിമിറ്റഡ് സ്റ്റേക്കുമായി സ്റ്റാർട്ടപ്പുകൾക്കായി സർക്കാർ ഒരു ഇക്വിറ്റി ഫണ്ട് സൃഷ്ടിക്കുമെന്ന് ഇൻഫർമേഷൻ ടെക്നോളജി- ഇലക്‌ട്രോണിക്‌സ് സഹമന്ത്രി രാജീവ് ചന്ദ്രശേഖർ അറിയിച്ചു. ഫണ്ട് രൂപീകരിക്കുന്നതുമായി ബന്ധപ്പെട്ട് ധനമന്ത്രി നിർമല സീതാരാമൻ ബജറ്റിൽ പ്രഖ്യാപനം നടത്തിയിരുന്നു. സർക്കാർ 20 ശതമാനം ലിമിറ്റഡ് പാർട്ണർ ആയിരിക്കുമെന്നും അത് സ്വകാര്യ ഫണ്ട് മാനേജർമാർ നിയന്ത്രിക്കുമെന്നും ധനമന്ത്രി പ്രഖ്യാപിച്ചിരുന്നു. തീർച്ചയായും സർക്കാർ ആവിഷ്കരിച്ച് സ്പോൺസർ ചെയ്യുന്ന ഒരു ഫണ്ട് ഉണ്ടാകും. എന്നാൽ ഇത് മറ്റേതൊരു സ്വകാര്യ ഫണ്ടിനെയും പോലെ കൈകാര്യം ചെയ്യും, മന്ത്രി പറഞ്ഞു.