കൂവപ്പൊടിയിലൂടെ ക്ലിക്കായി ഇവർ

മലയാളികൾ മാത്രമല്ല, ഇംഗ്ലീഷിൽ ആരോറൂട്ട് എന്ന പേരിൽ വിളിക്കുന്ന കൂവയുടെ ആരാധകർ അങ്ങ് അയൽനാടുകളിലുമുണ്ട്.

കൂവ അരച്ചെടുത്ത് കൂവപ്പൊടിയാക്കി അതിൽ നിന്ന് മികച്ച വരുമാനം നേടുന്ന ഒരു സംരംഭത്തെ കുറിച്ചാണ് പറഞ്ഞ് വരുന്നത്. പേര് വിന്റർഗ്രീൻ. എറണാകുളം ജില്ലയിലെ കുട്ടമ്പുഴയിലുള്ള പിണവൂർകുടിയിൽ 5 ട്രൈബൽ സ്ത്രീകൾ ചേർന്ന് ആരംഭിച്ച സംരംഭം. 2018 ജനുവരിയിൽ മേഖലയിലെ കുടുംബശ്രീ യൂണിറ്റിന്റെ പൂർണ്ണ പിന്തുണയോടെയാണ് വിന്റർഗ്രീനിന് തുടക്കമിട്ടത്. സംസ്ഥാന സർക്കാരിന്റെ പട്ടികവർഗ സുസ്ഥിര വികസന പദ്ധതിയുടെ ഭാഗമായി, ട്രൈബൽ മേഖലയിലെ വനിതകൾക്ക് ഉപജീവനം ഉറപ്പുവരുത്തുക ലക്ഷ്യമിട്ട് ആരംഭിച്ചതാണ് വിന്റർഗ്രീൻ. സ്വന്തമായി കൃഷി ചെയ്യുന്നവയും പ്രാദേശികമായി ശേഖരിക്കുന്നതുമായ കൂവയാണ് മൂല്യവർദ്ധിത ഉൽപന്നമാക്കി മാറ്റുന്നത്. തുടക്കത്തിൽ യന്ത്ര സഹായമില്ലാതെയാണ് യൂണിറ്റ് പ്രവർത്തിച്ചിരുന്നത്. അതുകൊണ്ട് തന്നെ ഉത്പാദനം ശ്രമകരമായിരുന്നു. പിന്നീട് 2021ൽ കുടുംബശ്രീ ജില്ലാ മിഷൻ വഴി ഇവർക്ക് കൂവ അരയ്ക്കുന്നതിനുള്ള യന്ത്രം ലഭിച്ചു. അതോടെ ഉത്പാദനം കൂട്ടി. പിണവൂർകുടിയിൽ വാടക മുറിയിലാണ് യൂണിറ്റിന്റെ പ്രവർത്തനം. തികച്ചും പരമ്പരാഗതമായ രീതിയിൽ തന്നെ കൂവപ്പൊടി ഉൽപാദിപ്പിക്കുന്നു എന്നതിനാൽ 100 ശതമാനം ഗുണമേന്മയും ഇവർ ഉറപ്പു നൽകുന്നു.

കൂവപ്പൊടിയിലെത്തിയ വഴി

കുട്ടമ്പുഴയിൽ ഒരു സംരംഭക യൂണിറ്റ് ആരംഭിക്കാൻ പദ്ധതിയിട്ടപ്പോൾ തന്നെ ഈ മേഖലയിൽ ഏറ്റവും എളുപ്പത്തിൽ ലഭ്യമാകുന്നതെന്ത് എന്ന ചിന്തയാണ് ആദ്യമുണ്ടായത്. അങ്ങനെ പോഷകഗുണമുള്ള കൂവപ്പൊടി നിർമ്മാണം എന്ന ആശയത്തിലേക്കെത്തി. പിന്നീട് അയൽക്കൂട്ടത്തിൽ നിന്നും സംരംഭത്തിൽ ചേരാൻ താൽപ്പര്യമുള്ള 5 സ്ത്രീകളെ തെരഞ്ഞെടുത്തു. അങ്ങനെയാണ് വിന്റർഗ്രീനിന്റെ ജനനം. മുഖ്യധാരയിലേക്ക് കടന്നുവരാൻ വിമുഖത കാണിക്കുന്ന ട്രൈബൽ സ്ത്രീകളെ അവരുടെ വീട്ടുപരിസരത്തു തന്നെയുള്ള കൂവയിലൂടെ സ്വന്തമായി വരുമാനം നേടാൻ സഹായിക്കുകയെന്ന ലക്ഷ്യവും നിറവേറ്റുകയാണ് വിന്റർഗ്രീൻ. വർഷത്തിൽ ഒരിക്കലാണ് കൂവ വിളവെടുക്കുന്നത്. ആ സമയത്ത്‌ ഉത്പാദനത്തിനാവശ്യമായ കൂവ പ്രദേശത്തെ കർഷകരിൽ നിന്ന് ഇവർ വാങ്ങും. ചെറിയ തോതിൽ സ്വന്തമായും ഇവർ കൂവ കൃഷി ചെയ്തു വരുന്നു. അങ്ങനെ സംഭരിക്കുന്ന കൂവ അരച്ച് ഉണക്കി പൊടിയാക്കും. ഡിസംബർ-ജനുവരി മാസങ്ങളിലാണ് ഉൽപ്പാദനം നടക്കുന്നത്.

പാക്കേജിംഗും വിപണനവും

ആദ്യഘട്ടത്തിൽ സാധാരണ രീതിയിലുള്ള പാക്കേജിംഗ് ആയിരുന്നത് പിന്നീട് ബ്രാൻഡിംഗിലേക്കും, മികച്ച പാക്കിംഗിലേയ്ക്കും മാറി. വിന്റർഗ്രീൻ കൂവപ്പൊടി നൂറ് ഗ്രാമിന്റെ ഒരു പാക്കറ്റിന് 120 രൂപയാണ് വില. കുട്ടമ്പുഴയിലെ കുടുംബശ്രീയുടെ പീടിക ഔട്ട്ലെറ്റ്, കോലഞ്ചേരിയിലുള്ള കുടുംബശ്രീ ജില്ലാ ബസാർ എന്നിവ വഴിയാണ് പ്രധാനമായും വിപണനം നടത്തുന്നത്. കൂടാതെ കുട്ടമ്പുഴ, മാമലക്കണ്ടം തുടങ്ങിയ ഇടങ്ങളിലെത്തുന്ന വിനോദസഞ്ചാരികളിൽ പലരും കേട്ടറിഞ്ഞ്, യൂണിറ്റ് തേടിയെത്തിയും ഉൽപ്പന്നം വാങ്ങുന്നുണ്ട്.