കഴിഞ്ഞ വർഷം, ഇലക്ട്രിക് വാഹനങ്ങളുടെയും അനുബന്ധ ഭാഗങ്ങളുടെയും ഇന്ത്യയിലെ ഇറക്കുമതി തീരുവ കുറയ്ക്കണമെന്ന് ടെസ്‌ല കേന്ദ്രസർക്കാരിനോട് ആവശ്യപ്പെട്ടിരുന്നു. എന്നാൽ നികുതിയിളവുകൾ പരിഗണിക്കുന്നതിന് മുമ്പ് ഇന്ത്യയിൽ തങ്ങളുടെ ഇലക്ട്രിക് വാഹനങ്ങളുടെ നിർമ്മാണം ആരംഭിക്കാനായിരുന്നു കേന്ദ്ര ഹെവി ഇൻഡസ്ട്രീസ് മന്ത്രാലയം ഇലക്ട്രിക് കാർ മേക്കറോട് ആവശ്യപ്പെട്ടത്. ഒരു ഓട്ടോമോട്ടീവ് കമ്പനിക്കും ഇത്തരം ഇളവുകൾ നൽകുന്നില്ലെന്നും ടെസ്‌ലയ്ക്ക് ഡ്യൂട്ടി ആനുകൂല്യങ്ങൾ നൽകുന്നത് ഇളവുകളില്ലാതെ ഇന്ത്യയിൽ ബില്യൺ കണക്കിന് ഡോളർ നിക്ഷേപിച്ച മറ്റ് കമ്പനികൾക്ക് നല്ല സൂചന നൽകില്ലെന്നും സർക്കാർ വൃത്തങ്ങൾ സൂചിപ്പിച്ചിരുന്നു. നിലവിൽ, പൂർണ്ണമായി നിർമ്മിച്ച യൂണിറ്റുകളായി (CBUs) ഇറക്കുമതി ചെയ്യുന്ന കാറുകൾക്ക് എഞ്ചിൻ വലുപ്പവും ചെലവും ഇൻഷുറൻസ്, ഫ്രൈറ്റ് (CIF) വാല്യു 40,000 ഡോളറിൽ കുറവോ അതിൽ കൂടുതലോ ആണെങ്കിൽ അതനുസരിച്ച് 60 മുതൽ 100 ശതമാനം വരെ കസ്റ്റംസ് തീരുവ നൽകണം. രാജ്യത്ത് വാർഷിക കാർ വിൽപ്പനയുടെ 1% മാത്രമാണ് EV- കൾ എന്നതിനാൽ വിലയേറിയ ടെസ്‌ലയുടെ വിപണി പ്രവേശം ചെലവേറിയ താണെന്നതാണ് മസ്കിനെ നിരന്തര ചർച്ചകൾക്ക് പ്രേരിപ്പിക്കുന്നത്. പൂർണ്ണമായും നിർമിച്ച ഇലക്ട്രിക് കാറുകൾ ഇവിടെ വാണിജ്യാടിസ്ഥാനത്തിൽ അവതരിപ്പിക്കുന്നത് സംബന്ധിച്ച് പരസ്യമായ ഒരു പ്രഖ്യാപനവും ടെസ്‌ല ഇതുവരെ നടത്തിയിട്ടില്ലെന്നതും ശ്രദ്ധേയമാണ്. ഇന്ത്യയിൽ നാല് വാഹന വേരിയന്റുകൾ ഇറക്കുമതി ചെയ്യുന്നതിനോ നിർമിക്കുന്നതിനോ ടെസ്‌ലക്ക് കേന്ദ്ര ഗതാഗത മന്ത്രാലയത്തിന്റെ അനുമതി ടെസ്‌ലക്ക് നേരത്തെ ലഭിച്ചിരുന്നു.