ഇപ്പോൾ, ആമസോണിന് ദശലക്ഷക്കണക്കിന് തേർ‌ഡ് പാർട്ടി സെല്ലർ‌മാരാണുളളത്. അത് ഭാവിയിൽ ഇനിയും വളരാൻ സാധ്യതയുണ്ട്. കഴിഞ്ഞ വർഷം 1 ദശലക്ഷത്തിലധികം വിൽപ്പനക്കാർ പ്ലാറ്റ്‌ഫോമിൽ ചേർന്നതായി റിപ്പോർട്ടുണ്ട്. അതിനാൽ, ത്രാസിയോ മോഡൽ അവതരിപ്പിക്കാൻ സ്റ്റാർട്ടപ്പുകൾക്ക് ഇപ്പോൾ വളരെ മികച്ച സമയമാണ്. ത്രസിയോ-സ്റ്റൈൽ സ്റ്റാർട്ടപ്പ് സാധാരണ മൂന്ന്-ഘട്ടങ്ങളുളള പ്രക്രിയയാണ് പിന്തുടരുന്നത്.
ഒന്നോ രണ്ടോ മീറ്റിംഗുകൾക്ക് ശേഷം വിൽപ്പനക്കാരനെയും അവരുടെ ബിസിനസ്സിനെയും അറിയുക എന്നതാണ് ആദ്യപടി. പ്രാരംഭ താൽപ്പര്യം പ്രകടിപ്പിക്കാൻ ലെറ്റർ ഓഫ് ഇന്റന്റ് ഒപ്പിടാം. ബ്രാൻഡിന്റെ വളർച്ചാ സാധ്യതകളിൽ സ്റ്റാർട്ടപ്പിന് സംതൃപ്തി തോന്നിയാൽ വാല്യുവേഷൻ നിശ്ചയിക്കുകയും വിൽപ്പനക്കാരനെ സമന്വയിപ്പിക്കുന്നതിനുള്ള കരാറുകൾ തയ്യാറാക്കുകയും ചെയ്യുന്നു. ബ്രാൻഡ് സ്വന്തമാക്കുകയും സ്ഥാപകർക്ക് ലാഭകരമായ എക്സിറ്റ് നൽകുകയും ചെയ്യുന്നു. തുടക്കം മുതൽ അവസാനം വരെയുളള പ്രക്രിയ 8 ആഴ്ചയ്ക്കുള്ളിൽ പൂർത്തിയാകും. ചില സന്ദർഭങ്ങളിൽ, സ്ഥാപകർക്ക് അവരുടെ ബിസിനസ്സ് വിറ്റതിന് ശേഷവും ലാഭത്തിന്റെ ഒരു പങ്ക് തുടർന്നും ലഭിക്കുന്നു.

ത്രാസിയോ മോഡൽ ഇന്ത്യൻ സ്റ്റാർട്ടപ്പുകൾ വിജയകരമായി നടപ്പാക്കുമ്പോൾ യഥാർത്ഥ ത്രാസിയോ ഇന്ത്യയിൽ ആദ്യത്തെ സ്റ്റാർട്ടപ്പ് ഏറ്റെടുത്തിരിക്കുകയാണ്. 500 മില്യൺ ഡോളറിന് D2C കൺസ്യൂമർ ഡ്യൂറബിൾസ് ബ്രാൻഡായ ലൈഫ്‌ലോംഗ് ആണ് ത്രാസിയോ ഏറ്റെടുക്കുന്ന ആദ്യത്തെ സ്റ്റാർട്ടപ്പ്. ഇന്ത്യൻ ഡിജിറ്റൽ-ഫസ്റ്റ് ബ്രാൻഡുകൾ സ്വന്തമാക്കുന്നതിന് ത്രാസിയോ കൂടി കളത്തിലിറങ്ങുന്നതോടെ വരുംവർഷങ്ങളിൽ ചെറുകിട ബിസിനസുകൾ സ്വന്തമാക്കാനുളള മത്സരം മുറുകുമെന്നാണ് വിലയിരുത്തപ്പെടുന്നത്.