2026ലെ ഐസിസി ടി20 ലോകകപ്പിലെ ചരിത്ര വിജയത്തിനു പിന്നാലെ ഇന്ത്യൻ ക്രിക്കറ്റ് ടീമിന് 131 കോടി രൂപ പാരിതോഷികം പ്രഖ്യാപിച്ച് ബിസിസിഐ. അഹമ്മദാബാദ് നരേന്ദ്ര മോദി സ്റ്റേഡിയത്തിൽ നടന്ന ഫൈനലിൽ ന്യൂസിലൻഡിനെ 96 റൺസിന് കീഴടക്കിയായിരുന്നു ഇന്ത്യയുടെ കിരീടനേട്ടം. ചരിത്ര വിജയത്തിന് കളിക്കാർക്കും, സപ്പോർട്ട് സ്റ്റാഫുകൾക്കും, സെലക്ടർമാർക്കും ബിസിസിഐ അഭിനന്ദനങ്ങൾ അറിയിച്ചു. ടീമിന്റെ നേട്ടത്തിൽ അഭിമാനം പ്രകടിപ്പിച്ചുകൊണ്ട് ബോർഡിന്റെ ഓണററി സെക്രട്ടറി ദേവജിത് സൈകിയാണ് നന്ദി അറിയിച്ചത്.
ടീമിന്റെ മികച്ച പ്രകടനത്തിനും ആഗോളതലത്തിൽ ഇന്ത്യൻ ക്രിക്കറ്റിന് ടീം നൽകിയ സംഭാവനകൾക്കും ബോർഡ് നൽകുന്ന അംഗീകാരമാണ് ഈ ക്യാഷ് റിവാർഡ്. സ്വന്തം മണ്ണിലെ ഈ മഹത്തായ വിജയം ഇന്ത്യയിലുടനീളം ആഘോഷങ്ങൾക്ക് തിരികൊളുത്തുക മാത്രമല്ല, ക്രിക്കറ്റിലൂടെ രാജ്യത്തിന്റെ ആധിപത്യം ശക്തിപ്പെടുത്തുകയും രാജ്യമെമ്പാടുമുള്ള യുവ ക്രിക്കറ്റ് ആരാധകർക്ക് പ്രചോദനമാവുകയും ചെയ്തതായും അദ്ദേഹം പറഞ്ഞു.
നേരത്തേ ലോകകപ്പ് വിജയത്തോടെ ഐസിസിയുടെ 3 മില്യൺ ഡോളർ (ഏകദേശം ₹27.48 കോടി) സമ്മാനത്തുകയും ഇന്ത്യൻ ക്രിക്കറ്റ് ടീം സ്വന്തമാക്കിയിരുന്നു. ഇന്ത്യയും ശ്രീലങ്കയും ആതിഥേയത്വം വഹിച്ച മത്സരങ്ങളിൽ നിന്നുള്ള വമ്പൻ പ്രക്ഷേപണ ഡീലുകളും സ്പോൺസർഷിപ്പ് വരുമാനവും കാരണം, 2024നെ അപേക്ഷിച്ച് 2026ലെ ടൂർണമെന്റിൽ സമ്മാനത്തുകയിൽ ഏകദേശം 20% വർധനയാണ് ഉണ്ടായത്.
എല്ലാ ടീമുകൾക്കും സാമ്പത്തിക നേട്ടങ്ങൾ ലഭിക്കുന്നുണ്ടെന്ന് അന്താരാഷ്ട്ര ക്രിക്കറ്റ് കൗൺസിൽ ഉറപ്പാക്കി. റണ്ണറപ്പായ ന്യൂസിലാൻഡിന് ₹14.65 കോടി രൂപയാണ് സമ്മാനത്തുക. അതേസമയം, സെമി ഫൈനൽ വരെയെത്തിയ സൗത്ത് ആഫ്രിക്കയ്ക്കും ഇംഗ്ലണ്ടിനും ₹7.24 കോടി രൂപ വീതം സമ്മാനത്തുകയും ലഭിച്ചു.
BCCI rewards the Indian cricket team with ₹131 crore following their historic 2026 T20 World Cup win against New Zealand. Learn more about the prize money breakdown and the board’s official announcement
