സൈറസ് മിസ്ത്രി എങ്ങനെയായിരിക്കും ചരിത്രത്തിൽ രേഖപ്പെടുത്തപ്പെടുക. രാജ്യത്തെ ഒരു പ്രമുഖ കൺസ്ട്രക്ഷൻ ആൻഡ് എഞ്ചിനീയറിംഗ് സ്ഥാപനത്തിന് നേതൃത്വം നൽകുന്ന ഏറ്റവും പ്രായം കുറഞ്ഞ ഇന്ത്യക്കാരിൽ ഒരാൾ. 26 വയസിൽ ചുമതലയേറ്റ് ഷപൂർജി പല്ലോൻജി എന്ന വ്യവസായ ഗ്രൂപ്പിന്റെ അമരക്കാരനായി അദ്ദേഹം നടത്തിയ പ്രവർത്തനങ്ങൾ ഗ്രൂപ്പിന് നൽകിയ മൈലേജ് വളരെ വലുതായിരുന്നു. മൃദുഭാഷിയും വിനയാന്വിതനുമായ പാഴ്‌സി വ്യവസായി ടാറ്റഗ്രൂപ്പുമായി കൊമ്പുകോർത്തപ്പോൾ പുതിയൊരു ചരിത്രം പിറന്നു.
24 ഒക്ടോബർ 2016: ഗ്രൂപ്പിന്റെ ഇടക്കാല ചെയർമാനായി രത്തൻ ടാറ്റയെ നിയമിക്കുകയും ടാറ്റ സൺസ് ചെയർമാനായിരുന്ന സൈറസ് മിസ്ത്രിയെ പുറത്താക്കുകയും ചെയ്തു.
20 ഡിസംബർ 2016: മിസ്ത്രിയുടെ സൈറസ് ഇൻവെസ്റ്റ്‌മെന്റ് പ്രൈവറ്റ് ലിമിറ്റഡും സ്റ്റെർലിംഗ് ഇൻവെസ്റ്റ്‌മെന്റ് കോർപ്പറേഷൻ പ്രൈവറ്റ് ലിമിറ്റഡും മിസ്ത്രിയെ നീക്കം ചെയ്‌തതിനെ വെല്ലുവിളിച്ച് മുംബൈ NCLT യെ സമീപിച്ചു. ന്യൂനപക്ഷ ഓഹരി ഉടമകളെ അടിച്ചമർത്തുന്നുവെന്നും ടാറ്റ ഗ്രൂപ്പിന്റെ കെടുകാര്യസ്ഥതയും പരാതിയിൽ ആരോപിച്ചു.
12 ജനുവരി 2017: ടാറ്റ സൺസ് ചെയർമാനായി നടരാജൻ ചന്ദ്രശേഖരനെ നിയമിച്ചു.
2017 ഫെബ്രുവരി 6: ടാറ്റ സൺസ് ബോർഡിൽ നിന്ന് മിസ്ത്രിയെ നീക്കം ചെയ്തു.
6 മാർച്ച് 2017: ഒരു കേസ് ഫയൽ ചെയ്യുന്നതിനു കമ്പനിയിലെ 10 ശതമാനം പങ്കാളിത്തത്തിന്റെ മാനദണ്ഡം മിസ്ത്രി കുടുംബത്തിന്റെ രണ്ട് നിക്ഷേപ സ്ഥാപനങ്ങൾ പാലിച്ചില്ലെന്ന് ചൂണ്ടിക്കാട്ടി, National Company Law Tribunal മുംബൈ ഹർജി മാറ്റിവച്ചു.
17 ഏപ്രിൽ, 2017: കേസ് ഫയൽ ചെയ്യുന്നതിന് ഒരു സ്ഥാപനത്തിൽ കുറഞ്ഞത് 10 ശതമാനം ഉടമസ്ഥാവകാശം ഉണ്ടായിരിക്കുന്നതിനുള്ള മാനദണ്ഡത്തിൽ ഇളവ് ആവശ്യപ്പെട്ട നൽകിയ അപേക്ഷയും NCLT മുംബൈ നിരസിച്ചു.
27 ഏപ്രിൽ, 2017: NCLT ഉത്തരവിനെ വെല്ലുവിളിച്ച് മിസ്ത്രി National Company Appellate Tribunal-ലേക്ക് നീങ്ങി.
21 സെപ്റ്റംബർ, 2017: ടാറ്റ സൺസിനെതിരെ മിസ്ത്രി നൽകിയ ഹർജികൾ NCLAT ബെഞ്ച് അനുവദിച്ചു.
5 ഒക്ടോബർ 2017: ഹർജി മുംബൈയിൽ നിന്ന് ഡൽഹിയിലേക്ക് മാറ്റണമെന്ന് ആവശ്യപ്പെട്ട് ഡൽഹിയിലെ എൻസിഎൽടിയുടെ പ്രിൻസിപ്പൽ ബെഞ്ചിനെ സമീപിച്ചു.
6 ഒക്ടോബർ 2017: ഡൽഹിയിലെ NCLT പ്രിൻസിപ്പൽ ബെഞ്ച് ഹർജി തള്ളി.
9 ജൂലൈ, 2018: ടാറ്റ സൺസിൽ നിന്ന് തന്നെ പുറത്താക്കിയതിനെ ചോദ്യം ചെയ്ത മിസ്ത്രിയുടെ ഹർജികൾ മുംബൈയിലെ NCLT ബെഞ്ച് തള്ളി.
3 ഓഗസ്റ്റ് 2018: NCLT മുംബൈയുടെ ഉത്തരവിനെതിരെ മിസ്ത്രി NCLAT-നെ സമീപിച്ചു.
29 ഓഗസ്റ്റ്, 2018: NCLAT മിസ്ത്രിയുടെ അപേക്ഷകൾ സ്വീകരിക്കുകയും വിഷയം കേൾക്കാൻ തീരുമാനിക്കുകയും ചെയ്തു.
23 മെയ്, 2019: വിഷയത്തിൽ NCLAT അതിന്റെ ഉത്തരവ് പുറപ്പെടുവിച്ചു
18 ഡിസംബർ, 2019: ടാറ്റ സൺസിന്റെ എക്‌സിക്യൂട്ടീവ് ചെയർമാനായി NCLAT മിസ്ത്രിയെ പുനഃസ്ഥാപിച്ചു. ടാറ്റയ്ക്ക് അപ്പീൽ നൽകാൻ നാലാഴ്ചത്തെ സമയവും അനുവദിച്ചു.
2 ജനുവരി 2020: NCLAT ഉത്തരവിനെ ടാറ്റ സൺസ് സുപ്രീം കോടതിയിൽ ചോദ്യം ചെയ്തു.
10 ജനുവരി 2020: സുപ്രീം കോടതി NCLAT ഉത്തരവ് സ്റ്റേ ചെയ്തു.
22 സെപ്റ്റംബർ, 2020: ടാറ്റ സൺസിലെ 18% ഓഹരി വിൽക്കുന്നതിൽ നിന്ന് മിസ്ത്രിയുടെ ഷപൂർജി പല്ലോൻജി ഗ്രൂപ്പിനെ സുപ്രീം കോടതി വിലക്കി.
8 ഡിസംബർ 2020: സുപ്രീം കോടതിയിൽ അന്തിമ വാദം തുടങ്ങി.
17 ഡിസംബർ 2020: നാളുകൾ നീണ്ട തർക്കത്തിൽ സുപ്രീം കോടതി വിധി പറയാൻ മാറ്റിവെച്ചു.
26 മാർച്ച് 2021: ടാറ്റ സൺസിന്റെ എക്‌സിക്യൂട്ടീവ് ചെയർമാനായി മിസ്ത്രിയെ പുനഃസ്ഥാപിക്കാനുള്ള NCLAT ഉത്തരവ് സുപ്രീം കോടതി റദ്ദാക്കുകയും ടാറ്റ ഗ്രൂപ്പിന്റെ അപ്പീൽ അനുവദിക്കുകയും ചെയ്തു.
മേയ് 2022: Tata Sons vs Cyrus Mistry കേസിൽ 2021ലെ സുപ്രീംകോടതി വിധി ചോദ്യം ചെയ്തുകൊണ്ട് മിസ്ത്രി കുടുംബം നൽകിയ പുനപരിശോധനാ ഹർജിയും സുപ്രീം കോടതി തളളി.
4 സെപ്റ്റംബർ 2022: അഹമ്മദാബാദിൽ നിന്ന് മുംബൈയിലേക്ക് പോകുകയായിരുന്ന സൈറസ് പല്ലോൻജി മിസ്ത്രി കാർ അപകടത്തിൽ മരിച്ചു. മഹാരാഷ്ട്രയിലെ പാൽഘറിൽ കാർ ഡിവൈഡറിൽ ഇടിച്ചുണ്ടായ അപകടത്തിലായിരുന്നു മരണം.
