- സംരംഭങ്ങള് ആരംഭിക്കാന് വേണ്ട അനുമതികള് താമസംകൂടാതെ തന്നെ ലഭ്യമാക്കാനാകുമെന്ന് മുഖ്യമന്ത്രി
- കേരളത്തിലെ സംരംഭങ്ങൾ ഒരുലക്ഷത്തി മുപ്പത്തി മൂവായിരത്തിലെത്തി
- നൂതനാശയങ്ങളെയും ഉത്പന്നങ്ങളാക്കി മാറ്റാന് നമുക്കു കഴിയണം.
- ഗ്ലോബല് സ്റ്റാര്ട്ടപ്പ് എക്കോസിസ്റ്റം റിപ്പോര്ട്ട് അനുസരിച്ച് അഫോര്ഡബിള് ടാലന്റില് ഏഷ്യയില് ഒന്നാമത്തെയും ലോകത്ത് നാലാമത്തെയും സ്ഥലമാണ് കേരളം.
- തെക്കേ ഏഷ്യയിലെ ഏറ്റവും വലിയ സ്റ്റാര്ട്ടപ്പ് ഇന്നൊവേഷന് ഹബ്ബ് കേരളത്തിൽ
കേരളത്തിന്റെ വികസനത്തിൽ ഏറെ പ്രധാനമാണ് വ്യവസായവത്ക്കരണവും നൂതന ആശയങ്ങളുടെ പ്രോത്സാഹനവുമെന്ന് മുഖ്യമന്ത്രി പിണറായി വിജയൻ. സുസ്ഥിര വികസന ലക്ഷ്യങ്ങൾ ഭാവി കേരളത്തിന് എന്ന വിഷയത്തിൽ സർക്കാർ ജീവനക്കാർക്കുള്ള ബോധവൽക്കരണ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
അനുമതികൾ വൈകരുത്
ഇപ്പോള്തന്നെ ഒരു വര്ഷംകൊണ്ട് ഒരുലക്ഷം സംരംഭങ്ങള് തുടങ്ങാനാണ് നമ്മള് ലക്ഷ്യംവച്ചിരുന്നതെങ്കില് അത് ഒരുലക്ഷത്തി മുപ്പത്തി മൂവായിരത്തില് എത്തിക്കാന് നമുക്കായി. ഇത് പതിനൊന്ന് മാസത്തോളംകൊണ്ട് കൈവരിച്ച നേട്ടമാണ്. ഇനിയുള്ള ഒരു മാസത്തില്ക്കൂടി ഇതേ വേഗതയില് കാര്യങ്ങള് മുന്നോട്ടു പോയാല് ലക്ഷ്യംവച്ചതിനേക്കാള് ഒരുപാട് മുന്നിലെത്താന് നമുക്കു കഴിയും. അതിനുതകുന്ന ഇടപെടലുകള് ജീവനക്കാരുടെ ഭാഗത്തുനിന്നും ഉണ്ടാവണം. സംരംഭങ്ങള് തുടങ്ങുന്നതിനെക്കുറിച്ചു ബോധവത്ക്കരണം നല്കുന്നതോടൊപ്പം സംരംഭങ്ങള് ആരംഭിക്കാന് വേണ്ട അനുമതികള് താമസംകൂടാതെ തന്നെ ലഭ്യമാക്കുകയും വേണം. അതിനുതകുന്ന നിയമഭേദഗതികള് സര്ക്കാര് കൊണ്ടുവന്നിട്ടുണ്ട് എന്നത് എല്ലാവര്ക്കും അറിവുള്ളതാണ്.
സ്റ്റാർട്ടപ്പ് സൗഹൃദ സമീപനം അനിവാര്യം
നൂതനാശയങ്ങളെയും ഉത്പന്നങ്ങളാക്കി മാറ്റാന് നമുക്കു കഴിയണം. അത് ലക്ഷ്യംവച്ചാണ് ഒരു സ്റ്റാര്ട്ടപ്പ് പ്രോത്സാഹന നയം തന്നെ സംസ്ഥാന സര്ക്കാര് രൂപീകരിച്ചത്. ഗ്ലോബല് സ്റ്റാര്ട്ടപ്പ് ഇക്കോസിസ്റ്റം റിപ്പോര്ട്ട് അനുസരിച്ച് അഫോര്ഡബിള് ടാലന്റില് ഏഷ്യയില് ഒന്നാമത്തെയും ലോകത്ത് നാലാമത്തെയും സ്ഥലമാണ് കേരളം. തെക്കേ ഏഷ്യയിലെ ഏറ്റവും വലിയ സ്റ്റാര്ട്ടപ്പ് ഇന്നൊവേഷന് ഹബ്ബ് നമ്മുടെ നാട്ടിലാണ്. ഇന്ത്യയിലെ ഏറ്റവും മികച്ച സ്റ്റാര്ട്ടപ്പ് സൗഹൃദാന്തരീക്ഷം നിലനില്ക്കുന്ന സംസ്ഥാനവും കേരളമാണ്. ഇതിനെയെല്ലാം ഉപയോഗപ്പെടുത്തി കൂടുതല് മുന്നേറാന് നമുക്കു കഴിയേണ്ടതുണ്ട്. അതിന് നിലമൊരുക്കുന്നതിനുള്ള പ്രവര്ത്തനങ്ങളും ഏറ്റെടുക്കണം.
തൊഴിലവസരങ്ങൾ സൃഷ്ടിക്കാൻ പരിശ്രമം
സംരംഭങ്ങള് സൃഷ്ടിക്കുന്നതോടൊപ്പം തന്നെ തൊഴിലവസരങ്ങളും സൃഷ്ടിക്കപ്പെടേണ്ടതുണ്ട്. 2026 ഓടെ 40 ലക്ഷം തൊഴിലവസരങ്ങള് സൃഷ്ടിക്കുമെന്ന് വാഗ്ദാനം നല്കിയാണ് ഇടതുപക്ഷ ജനാധിപത്യമുന്നണി സര്ക്കാര് അധികാരത്തിലെത്തിയത്. അതില്ത്തന്നെ 20 ലക്ഷം തൊഴിലവസരങ്ങള് നൂതന വ്യവസായങ്ങളുടെ രംഗത്താണ് സൃഷ്ടിക്കപ്പെടുക. ഇതിനായുള്ള പ്രവര്ത്തനങ്ങള് കെ-ഡിസ്കിന്റെ നേതൃത്വത്തിലുള്ള നോളജ് ഇക്കണോമി മിഷനിലൂടെ ആവിഷ്ക്കരിച്ചു വരികയാണ്. ബാക്കിയുള്ളവ പ്രാദേശിക സര്ക്കാരുകളിലൂടെയും കാര്ഷിക – സഹകരണ മേഖലകളിലൂടെയും ഒക്കെയാണ് ഒരുക്കേണ്ടത്.
ചെറുകിട സംരംഭങ്ങൾക്ക് പിന്തുണ
ചെറുകിട സംരംഭങ്ങള് ആരംഭിക്കുന്നതിന് വ്യവസായ വകുപ്പിന് സഹായം നല്കാന് കഴിയും. നിലവില് പുതുതായി വരുന്ന സംരംഭങ്ങളില് അതിദരിദ്രര്ക്ക് തൊഴില് ലഭ്യമാക്കാനും വ്യവസായ വകുപ്പിനു കഴിയും. ആ കുടുബങ്ങളിലെ പുതിയ തലമുറയുടെ വിദ്യാഭ്യാസം ഉറപ്പാക്കുന്നതിന് വിദ്യാഭ്യാസ – ഉന്നത വിദ്യാഭ്യാസ – സാമൂഹ്യക്ഷേമ – പട്ടികജാതി, പട്ടികവര്ഗ്ഗ, പിന്നാക്ക വികസന, ന്യൂനപക്ഷക്ഷേമ വകുപ്പുകള്ക്ക് കഴിയും. അങ്ങനെ വിവിധ വകുപ്പുകളുടെ കൂട്ടായ പ്രവര്ത്തനത്തിലൂടെയാണ് ദാരിദ്ര്യനിര്മ്മാര്ജ്ജന പ്രക്രിയ സാധ്യമാകുന്നത്. അതാണ് ഞാന് നേരത്തെ സൂചിപ്പിച്ച പരസ്പര പൂരകത്വം. അതുകൊണ്ടുതന്നെ തന്റെ വകുപ്പുമായി ബന്ധപ്പെട്ട ലക്ഷ്യങ്ങളൊന്നും ഈ സുസ്ഥിര വികസന ലക്ഷ്യങ്ങളില് ഉള്പ്പെട്ടിട്ടില്ല എന്നു ചിന്തിച്ചുകൊണ്ട് ഒരു വകുപ്പിനും, ഒരു ഉദ്യോഗസ്ഥനും ഇതില് നിന്നും മാറിനില്ക്കാനാകില്ല.
വ്യാവസായിക മുന്നേറ്റം ലക്ഷ്യം
ഏറെ പ്രധാനമാണ് വ്യവസായവത്ക്കരണവും നൂതന ആശയങ്ങളുടെ പ്രോത്സാഹനവും. വ്യവസായവത്ക്കരണം എന്നാല് വമ്പന് വ്യവസായങ്ങള് തുടങ്ങുകയും അവയില് കുറച്ചു പേര്ക്ക് ജോലി നല്കുകയും ചെയ്യുക മാത്രമല്ല. വന്കിട വ്യവസായങ്ങളോടൊപ്പം തന്നെ ചെറുകിട – ഇടത്തരം വ്യവസായങ്ങളും പ്രാദേശിക സംരംഭങ്ങളും ആരംഭിച്ചുകൊണ്ട് സമഗ്രമായ വ്യാവസായിക മുന്നേറ്റം ഉറപ്പാക്കല് കൂടിയാണ്. അങ്ങനെ ഉത്പാദനവും, ഉത്പാദനക്ഷമതയും വര്ധിപ്പിക്കാന് കഴിയണം. അങ്ങനെ സൃഷ്ടിക്കപ്പെടുന്ന അധിക വിഭവങ്ങള് സാമൂഹ്യസുരക്ഷ ഉറപ്പുവരുത്താന് ഉപകരിക്കും എന്നുകൂടി നാം ഓര്ക്കണം എന്നും മുഖ്യമന്ത്രി ഓർമ്മിപ്പിച്ചു.
According to Kerala’s chief minister, Pinarayi Vijayan, industry and the support of creative ideas are crucial to the state’s prosperity. The Chief Minister was inaugurating an awareness programme for government employees on the topic of sustainable development goals for the future of Kerala. One lakh thirty three thousand businesses launched . This accomplishment took around eleven months to complete. We could be far ahead of the goal if things keep moving along at the same rate for another month. The personnel should make the required interventions, he continued.
