ധാരാവിയിലെ ചേരികൾ പുനർവികസിപ്പിക്കാനുള്ള അദാനി ഗ്രൂപ്പിന്റെ ബിഡ്ഡിന് മഹാരാഷ്ട്ര സർക്കാർ അംഗീകാരം നൽകി. 259 ഹെക്ടർ ധാരാവി പുനർവികസന പദ്ധതിക്കായി അദാനി ഗ്രൂപ്പിന് കീഴിലുളള അദാനി പ്രോപ്പർട്ടീസായിരുന്നു രംഗത്തെത്തിയത്. കഴിഞ്ഞ നവംബറിൽ ഗ്രൂപ്പ് സ്ഥാപനമായ അദാനി പ്രോപ്പർട്ടീസ് 5,069 കോടി രൂപയുടെ നിക്ഷേപ വാഗ്ദാനത്തോടെ 259 ഹെക്ടർ ചേരി പുനർവികസനം ചെയ്യാനുള്ള ബിഡ് നേടിയിരുന്നു.
2,025 കോടി രൂപ ക്വോട്ട് ചെയ്ത ഡിഎൽഎഫിനെ പിന്തള്ളിയാണ് അദാനി ഗ്രൂപ്പ് ബിഡ് നേടിയത്. പ്രോജക്ടിന്റെ പ്രവർത്തനം ആരംഭിക്കാൻ ഗ്രൂപ്പിനെ സഹായിക്കുന്ന സർക്കാരിൽ നിന്നുള്ള ഔപചാരിക അറിയിപ്പാണ് ഗവൺമെന്റ് റസല്യൂഷൻ. ഹൗസിംഗ് ഡിപ്പാർട്ട്‌മെന്റ് GR പുറപ്പെടുവിക്കുകയും എല്ലാ സർക്കാർ വകുപ്പുകളും ഒരാഴ്ചക്കകം ഉത്തരവുകൾ പുറപ്പെടുവിക്കാൻ നിർദേശിക്കുകയും ചെയ്തിട്ടുണ്ട്. പുനർനിർമ്മാതാവിന് പദ്ധതി ആരംഭിക്കുന്നതിന് മഹാരാഷ്ട്ര സർക്കാർ അലോട്ട്‌മെന്റ് ലെറ്റർ നൽകും.
ഏകദേശം 23,000 കോടി രൂപ ചെലവ് പ്രതീക്ഷിക്കുന്ന പദ്ധതി ആഗോള ടെൻഡറിങ്ങിലൂടെ ഇന്ത്യയിലെ ഒരു ഏജൻസി നടത്തുന്ന ഏറ്റവും വലിയ പുനർവികസനങ്ങളിലൊന്നായിരിക്കും. ഇപ്പോൾ 2.5 ചതുരശ്ര കിലോമീറ്റർ വിസ്തൃതിയിൽ വ്യാപിച്ചുകിടക്കുന്ന 6.5 ലക്ഷം ചേരി നിവാസികളെ പുനരധിവസിപ്പിക്കുന്നതിന് ഏഴു വർഷമാണ് പദ്ധതിയുടെ ആകെ സമയപരിധി. സെൻട്രൽ മുംബൈയിൽ ലക്ഷക്കണക്കിന് ചതുരശ്ര അടി പാർപ്പിടവും വാണിജ്യപരവുമായ സ്ഥലം വിറ്റ് ഉയർന്ന വരുമാനം നേടാൻ അദാനി ഗ്രൂപ്പിനെ സഹായിക്കുന്ന പ്രോജക്റ്റ്, അതിന്റെ സങ്കീർണ്ണതകൾ കാരണം വർഷങ്ങളായി അനിശ്ചിതത്വത്തിലായിരുന്നു. പദ്ധതി നടപ്പിലാക്കുന്നതിനായി അദാനി ഒരു സ്പെഷ്യൽ പർപ്പസ് വെഹിക്കിൾ (SPV) രൂപീകരിക്കേണ്ടതുണ്ട്. പുനരധിവാസം, പുതുക്കൽ, സൗകര്യങ്ങൾ, അടിസ്ഥാന സൗകര്യ ഘടകങ്ങൾ എന്നിവ ഡെവലപ്പറുടെ ഉത്തരവാദിത്തമാണ്. സബർബൻ ഘാട്‌കോപ്പറിലും സെൻട്രൽ മുംബൈയിലെ ബൈക്കുളയിലുമുൾപ്പെടെയുള്ള പദ്ധതികൾ അദാനി ഗ്രൂപ്പ് നടപ്പിലാക്കിക്കൊണ്ടിരിക്കുകയാണ്. അദാനി ഗ്രൂപ്പ് നിലവിലെ നിവാസികളെ ട്രാൻസിറ്റ് ക്യാമ്പുകളിലേക്ക് മാറ്റുന്നതോടെ ഘട്ടം ഘട്ടമായി പുനർവികസനം ആരംഭിക്കും.
ദക്ഷിണ കൊറിയയിൽ നിന്നും യുഎഇയിൽ നിന്നുമുള്ള സ്ഥാപനങ്ങൾ ഉൾപ്പെടെ എട്ട് ബിഡർമാർ 2022 ഒക്ടോബറിൽ നടന്ന പ്രീ-ബിഡ് മീറ്റിൽ പങ്കെടുത്തിരുന്നു. അവരിൽ മൂന്ന് പേർ പദ്ധതിക്കായി ലേലം വിളിച്ചിരുന്നു. ഡവലപ്പറായ നമൻ ഗ്രൂപ്പാണ് ബിഡ് യോഗ്യത നേടാനാവാതെ പോയ മൂന്നാമത്തെ ഗ്രൂപ്പ്.
