കോവിഷീൽഡ് വാക്സിൻ നിർമ്മിക്കുന്ന സെറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ സിഇഒ അഡാർ പൂനവല്ല കഴിഞ്ഞ വർഷം ലണ്ടനിൽ നിന്നും അവിടെ വിൽക്കുന്ന ഏറ്റവും വിലകൂടിയ ഒരു വീട് വാങ്ങാനുള്ള കരാർ ഉറപ്പിച്ചതായി റിപ്പോർട്ടുകൾ ഉണ്ടായിരുന്നു. മാധ്യമ റിപ്പോർട്ടുകൾ പ്രകാരം ലണ്ടനിലെ ഈ വീടിന് 2023 ലെ ഏറ്റവും വിലകൂടിയ വീടെന്ന പദവി ലഭിച്ചിരുന്നു. അതിൻ്റെ മൂല്യം 1,446 കോടി രൂപയാണ്. 42 കാരനായ ഇന്ത്യൻ ശതകോടീശ്വരൻ, വാക്സിൻ രാജകുമാരൻ എന്നറിയപ്പെടുന്ന അഡാർ പൂനവല്ല ഹൈഡ് പാർക്കിന് സമീപമുള്ള നൂറ്റാണ്ടോളം പഴക്കമുള്ള ഈ അബർകോൺവേ ഹൗസിന് 1,446 കോടി രൂപ നൽകിയാണ് വാങ്ങിയത്.
അന്തരിച്ച വ്യവസായി ജാൻ കുൽസിക്കിൻ്റെ മകളും പോളണ്ടിലെ ഏറ്റവും ധനികയുമായ ഡൊമിനിക്ക കുൽസിക്കിന്റെ ഉടമസ്ഥതയിലുള്ള ഹൈഡ് പാർക്കിന് സമീപമുള്ള 1920-കളിൽ പണിത മാളികയായ അബർകോൺവേ ഹൗസ് ആണ് ഇദ്ദേഹം സ്വന്തമാക്കിയത്. ആഡംബര പ്രോപ്പർട്ടി ഏജന്റുമാരുടെ അഭിപ്രായത്തിൽ, ലണ്ടനിൽ ഇതുവരെ വിറ്റുപോയ ഏറ്റവും ചെലവേറിയ രണ്ടാമത്തെ ഭവനവും ആ വർഷത്തെ ഏറ്റവും വലിയ ഇടപാടുമായി അബർകോൺവേ ഹൗസിനെ കണക്കാക്കുന്നു. ലണ്ടനിലെ ഏറ്റവും വിലപിടിപ്പുള്ള റസിഡൻഷ്യൽ ഇടപാട് നടന്നത് 2020 ജനുവരിയിൽ ആയിരുന്നു. 2-8a റട്ട്ലാൻഡ് ഗേറ്റ്, മുൻ സൗദി അറേബ്യൻ കിരീടാവകാശി സുൽത്താൻ ബിൻ അബ്ദുൽ അസീസ് വിറ്റത് 210 മില്യൺ ഡോളറിന് ആണെന്നാണ് റിപ്പോർട്ട്.
റിപ്പോർട്ടുകൾ പ്രകാരം 22.1 ബില്യൺ ഡോളറിലധികം അതായത്1.8 ലക്ഷം കോടി രൂപ ആസ്തിയുള്ള സൈറസ് പൂനവല്ലയുടെ മകനെന്ന നേട്ടം അവഗണിച്ചാണ് അഡാർ സ്വന്തമായി തന്റെ നേട്ടങ്ങൾ ഉണ്ടാക്കിയെടുത്തത്. കാൻ്റർബറിയിലെ പ്രശസ്തമായ സെൻ്റ് എഡ്മണ്ട് സ്കൂൾ, പൂനെയിലെ ബിഷപ്പ് സ്കൂൾ, ഒടുവിൽ വെസ്റ്റ്മിൻസ്റ്റർ യൂണിവേഴ്സിറ്റി എന്നിവിടങ്ങളിൽ നിന്നാണ് അദ്ദേഹം വിദ്യാഭ്യാസം നേടിയത്. ലണ്ടനിലായിരിക്കെ ബയോടെക്നോളജിയിലും മാനേജ്മെൻ്റിലും പഠനം നടത്തിയിട്ടുണ്ട് അദ്ദേഹം.
2011-ൽ അഡാർ പൂനവല്ലയെ സിഇഒ ആയി നിയമിച്ചത് സെറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ വഴിത്തിരിവായിരുന്നു. COVID-19 കൈകാര്യം ചെയ്യാനുള്ള ആഡാറിൻ്റെ ആഗോള ശ്രമത്തിൻ്റെ ഭാഗമായിരുന്നു കോവിഡ് വാക്സിനേഷനുകൾ. ആഗോള പകർച്ചവ്യാധിയുടെ സമയത്ത്, 70 രാജ്യങ്ങളിലേക്ക് COVID-19 വാക്സിൻ ഡോസുകൾ നിർമ്മിക്കുന്നതിലും വിതരണം ചെയ്യുന്നതിലും അഡാർ കമ്പനിയെ നയിച്ചു.
ലണ്ടനിൽ സ്വത്തുക്കൾ ഉള്ള മറ്റ് ഇന്ത്യൻ വ്യവസായികൾ
മുകേഷ് അംബാനി: ലണ്ടൻ്റെ പ്രാന്തപ്രദേശത്തുള്ള മുകേഷ് അംബാനിയുടെ ഉടമസ്ഥതയിലുള്ള 900 വർഷം പഴക്കമുള്ള ഒരു ഹോട്ടലാണ് സ്റ്റോക്ക് പാർക്ക്. 49 കിടപ്പുമുറികളുള്ള ഈ എസ്റ്റേറ്റിൽ പതിമൂന്ന് ടെന്നീസ് കോർട്ടുകളും പതിനാല് ഏക്കർ സ്വകാര്യ പൂന്തോട്ടങ്ങളും 27-ഹോൾ ഗോൾഫ് കോഴ്സും ഉണ്ട്. 2020-ൽ, 57 ദശലക്ഷം പൗണ്ട് അഥവാ 529 കോടി രൂപയ്ക്ക് ആണ് അംബാനി ഈ ഹോട്ടൽ വാങ്ങിയത്. സൈനികനും പണ്ഡിതനുമായ ജോൺ പെൻ 1760-ൽ നിർമ്മിച്ചത് ആയിരുന്നു ഇത്.
ലക്ഷ്മി മിത്തൽ: ലക്ഷ്മി മിത്തലിൻ്റെ ഉടമസ്ഥതയിലുള്ള ബംഗ്ലാവുകൾ ലണ്ടനിലെ സിറ്റി പ്രദേശങ്ങളിലാണ് സ്ഥിതി ചെയ്യുന്നത്. ബിഷപ്പ് അവന്യൂവിൻ്റെ സമ്മർ പാലസ് അദ്ദേഹത്തിൻ്റെ ഉടമസ്ഥതയിലുള്ളതാണെന്ന് കരുതപ്പെടുന്നു. സെൻട്രൽ ലണ്ടനിലെ കെൻസിംഗ്ടൺ പാലസ് ഗാർഡൻസിൽ 20 പാർക്കിംഗ് സ്ഥലങ്ങളുള്ള 12 ബെഡ്റൂം വീടിനായി 70 മില്യൺ പൗണ്ട് നൽകി അദ്ദേഹം 2004-ൽ ലോക റെക്കോർഡ് സ്ഥാപിച്ചിട്ടുണ്ട്. 2013-ൽ ലക്ഷ്മി മിത്തൽ തൻ്റെ സമ്പന്നമായ ലണ്ടനിലെ വസതി വിൽപ്പനയ്ക്ക് ലിസ്റ്റ് ചെയ്തതായി റിപ്പോർട്ടുകൾ ഉണ്ടായിരുന്നു.
Adar Poonawalla, CEO of Serum Institute of India, acquires Aberconway House, a century-old mansion near Hyde Park, for Rs 1,446 crore. Learn about this luxurious purchase and other Indian billionaires’ properties in London.
