ടിക് ടോക് വാങ്ങാൻ മൈക്രോസോഫ്റ്റ്?

അഞ്ച് വർഷങ്ങൾക്കു ശേഷം ചൈനീസ് കമ്പനി ബൈറ്റ്ഡാൻസിനു കീഴിലുള്ള ടിക് ടോക് വാങ്ങുന്നതിനായുള്ള ശ്രമങ്ങൾ വീണ്ടും ഊർജിതമാക്കി
യുഎസ് സോഫ്റ്റ് വെയർ ഭീമൻമാരായ മൈക്രോസോഫ്റ്റ്. ടിക് ടോക്കിന്റെ യുഎസ്സിലെ പ്രവർത്തനങ്ങൾ ഏറ്റെടുക്കുന്നതിനായി ബൈറ്റ്ഡാൻസുമായി മൈക്രോസോഫ്റ്റ് ചർച്ച സജീവമാക്കിയിരിക്കുകയാണ് എന്നാണ് റിപ്പോർട്ട്. യുഎസ് പ്രസിഡന്റ് ഡൊണാൾഡ് ട്രംപും ഇത് സംബന്ധിച്ച് പരാമർശം നടത്തിയിട്ടുണ്ട്. എന്നാൽ സംഭവത്തിന്റെ കൂടുതൽ വിശദാംശങ്ങൾ പുറത്തു വന്നിട്ടില്ല.

2020ൽ ടിക് ടോക് ഏറ്റെടുക്കാൻ മൈക്രോസോഫ്റ്റ് ശ്രമം നടത്തിയിരുന്നു. എന്നാൽ ഈ ശ്രമം പരാജയപ്പെട്ടതായി മൈക്രോസോഫ്റ്റ് സിഇഒ സത്യ നദെല്ല 2021ൽ വെളിപ്പെടുത്തൽ നടത്തി. തന്റെ സിഇഒ ജീവിതത്തിലെ ഏറ്റവും വിചിത്ര അനുഭവം എന്നാണ് അന്നത്തെ ചർച്ചയെക്കുറിച്ച് സത്യ നദെല്ല വെളിപ്പെടുത്തൽ നടത്തിയത്. മൈക്രോസോഫ്റ്റിനു പുറമേ 2020ൽ ടെക് കമ്പനിയായ ഒറാക്കിളും ടിക് ടോക് ഏറ്റെടുക്കാൻ ശ്രമം നടത്തിയിരുന്നു.  

ചൈനീസ് ആപ്പായ ടിക് ടോക് യുഎസ്സിൽ നിരോധനത്തിന്റെ വക്കിലാണ്. ട്രംപ് അധികാരമേറ്റതോടെ നിരോധനത്തിനുള്ള തീയതിയിൽ 75 ദിവസം കൂടി കമ്പനിക്ക് നീട്ടി നൽകിയിരുന്നു. നേരത്തെ ടെസ്ല സ്ഥാപകൻ ഇലോൺ മസ്ക് ടിക് ടോക് വാങ്ങും എന്ന് അഭ്യൂഹളുണ്ടായിരുന്നു.

^{Microsoft is reportedly reconsidering acquiring TikTok’s U.S. operations, nearly five years after its last attempt. Discussions reignited following Trump’s renewed push for a sale.}