ഇന്ത്യ സന്ദർശിക്കാനൊരുങ്ങി കനേഡിയൻ പ്രധാനമന്ത്രി മാർക്ക് കാർണി. ഫെബ്രുവരി 26 മുതൽ മാർച്ച് 7 വരെ നീണ്ടുനിൽക്കുന്ന ഇന്തോ-പസഫിക് പര്യടനത്തിന്റെ ഭാഗമായാണ് കാർണിയുടെ ഇന്ത്യാ സന്ദർശനം. ആഗോള വ്യാപാര-സാമ്പത്തിക രംഗത്തെ അനിശ്ചിതത്വങ്ങൾക്കിടയിൽ കരുത്തുറ്റതും സ്വതന്ത്രവുമായ സമ്പദ്വ്യവസ്ഥ കെട്ടിപ്പടുക്കുന്നതിൽ ശ്രദ്ധ കേന്ദ്രീകരിക്കുന്നതായി കാർണി വ്യക്തമാക്കി. വ്യാപാരം വൈവിധ്യവൽക്കരിക്കാനും തൊഴിലാളികൾക്കും ബിസിനസ്സുകൾക്കും പുതിയ അവസരങ്ങൾ സൃഷ്ടിക്കാനും ആഗ്രഹിക്കുന്നതായും അദ്ദേഹം കൂട്ടിച്ചേർത്തു.
പ്രതിരോധം, ഊർജ്ജം, കൃത്രിമബുദ്ധി എന്നിവയുൾപ്പെടെയുള്ള പ്രധാന മേഖലകളിൽ ഉഭയകക്ഷി ബന്ധങ്ങൾ ശക്തമാക്കുകയാണ് കാർണിയുടെ ഇന്ത്യാ സന്ദർശനത്തിൻറെ ലക്ഷ്യം. ആദ്യം മുംബൈ സന്ദർശിക്കുന്ന കാർണി തുടർന്ന് ഡൽഹിയിലേക്ക് തിരിച്ച് പ്രധാനമന്ത്രി നരേന്ദ്ര മോഡിയുമായി ഉന്നതതല യോഗം നടത്തും. വ്യാപാരം, ഊർജ്ജം, സാങ്കേതികവിദ്യ, എഐ, പ്രതിരോധം തുടങ്ങിയ മേഖലകളിൽ പുതിയ പങ്കാളിത്തങ്ങളിലൂടെ കാനഡ-ഇന്ത്യ ബന്ധം ഉയർത്തുന്നതിലും വികസിപ്പിക്കുന്നതിലും നേതാക്കൾ ശ്രദ്ധ കേന്ദ്രീകരിക്കുമെന്ന് മാർക്ക് കാർണിയുടെ ഓഫീസ് പുറത്തിറക്കിയ കുറിപ്പിൽ പറയുന്നു.
Canadian PM Mark Carney visits India from Feb 26 to March 7. Key discussions with PM Modi to focus on AI, trade diversification, energy, and defense.
