ദേശീയപാതകളിലെ ടോൾ പ്ലാസകളിൽ വനിതാ പ്രാതിനിധ്യം വർദ്ധിപ്പിക്കുന്നതിന്റെ ഭാഗമായി 5100ലധികം വനിതാ ജീവനക്കാരെ വിന്യസിച്ച് നാഷണൽ ഹൈവേ അതോറിറ്റി ഓഫ് ഇന്ത്യ (NHAI). രാജ്യത്തുടനീളമുള്ള 1140ലധികം ടോൾ പ്ലാസകളിൽ പകൽ ഷിഫ്റ്റുകളിലാണ് ഇവരെ നിയമിച്ചിരിക്കുന്നത്. ടോൾ ബൂത്തുകളിലെ തർക്കങ്ങൾ കുറയ്ക്കുന്നതിനും യാത്രക്കാർക്ക് മികച്ച സേവനം ഉറപ്പാക്കുന്നതിനുമാണ് ഈ പദ്ധതിയെന്ന് ദേശീയപാതാ അതോറിറ്റി വ്യക്തമാക്കി. വിവിധ ഹൈവേ ഓപ്പറേറ്റർമാരുമായും വ്യവസായ സംഘടനകളുമായും നടത്തിയ ചർച്ചകൾക്ക് ശേഷമാണ് സുപ്രധാന തീരുമാനം കൈക്കൊണ്ടത്.
ഗ്രാമീണ, അർദ്ധ-നഗര മേഖലകളിലെ സ്ത്രീകൾക്ക് കൂടുതൽ തൊഴിലവസരങ്ങൾ സൃഷ്ടിക്കുക എന്നതാണ് പദ്ധതിയുടെ മറ്റൊരു ലക്ഷ്യം. നിയമിക്കപ്പെട്ടവർക്കായി വിനിമയ വൈദഗ്ധ്യം, അടിയന്തര സാഹചര്യങ്ങളിലെ പ്രതികരണം, സുരക്ഷാ മാനദണ്ഡങ്ങൾ എന്നിവയിൽ പ്രത്യേക പരിശീലനം നൽകുമെന്നും ദേശീയപാതാ അതോറിറ്റി അറിയിച്ചു. വരും ദിവസങ്ങളിൽ കൂടുതൽ വനിതകളെ ഈ മേഖലയിലേക്ക് ഉൾപ്പെടുത്താനാണ് അധികൃതർ ലക്ഷ്യമിടുന്നത്.
In a major push for gender diversity, NHAI has deployed over 5,100 women staff across 1,140 toll plazas in India. This initiative aims to reduce disputes at toll booths and create employment opportunities for women in rural and semi-urban areas
