സിംഗപ്പൂർ ഗവർൺമെന്റിൽ നിന്നും സുപ്രധാന കരാർ സ്വന്തമാക്കി കേരളത്തിൽ നിന്നുള്ള റോബോട്ടിക് സ്റ്റാർട്ടപ്പ് ജെൻറോബോട്ടിക്സ് ഇന്നൊവേഷൻ (Genrobotic Innovations Pvt. Ltd). അപ്ഡേറ്റ് വാട്ടർ ഇൻഫ്രാസ്ട്രക്ചറിനായി ഏകദേശം 44 റോബോട്ടുകളെ വിന്യസിക്കുന്നതിനുള്ള കരാറാണ് ശുചിത്വത്തിലും മെഡിക്കൽ പോർട്ട്ഫോളിയോയിലും വൈദഗ്ധ്യമുള്ള ഇന്ത്യയിലെ ആദ്യത്തെ ഫിസിക്കൽ എഐ കമ്പനിയായ ജെൻറോബോട്ടിക്സ് നേടിയിരിക്കുന്നത്. സിംഗപ്പൂരിലെ ദേശീയ ജല ഏജൻസിയായ പബ്ലിക് യൂട്ടിലിറ്റി ബോർഡിൽ നിന്നുള്ള കരാർ കേരളത്തിലെ സ്റ്റാർട്ടപ്പ് ആവാസവ്യവസ്ഥയുടെതന്നെ സുപ്രധാന നാഴികക്കല്ലായാണ് വിലയിരുത്തപ്പെടുന്നത്.
80 കോടി കരാർ
അടുത്ത രണ്ട് സാമ്പത്തിക വർഷത്തിനുള്ളിൽ കമ്പനി ഈ റോബോട്ടുകളെ സിംഗപ്പൂരിൽ വിന്യസിക്കുമെന്നും പ്രോജക്റ്റിന് ഏകദേശം 2 മുതൽ 2.5 കോടി വരെ ഈടാക്കുമെന്നും ജെൻറോബോട്ടിക്സ് സിഇഒ വിമൽ ഗോവിന്ദ് (Vimal Govind) പറഞ്ഞു. കരാറിന്റെ ആകെ മൂല്യം ഏകദേശം 80 കോടി രൂപയാണ്. 600ലധികം ആഗോള മത്സരാർത്ഥികളെ ഉൾപ്പെടുത്തിയുള്ള വിലയിരുത്തലിനുശേഷമാണ് കമ്പനി കരാറുകൾ നേടിയത്. കരാർ അന്തിമമാക്കാൻ ഏകദേശം 18 മാസമെടുത്തു.
വിന്യസിക്കുക വിൽബോറിനെ
മലിനജല കിണറുകൾ, മഴവെള്ള ഡ്രെയിനുകൾ, വ്യാവസായിക ടാങ്കുകൾ തുടങ്ങിയ അപകടകരവും പരിമിതവുമായ ഇടങ്ങൾ വൃത്തിയാക്കുന്നതിനായി രൂപകൽപ്പന ചെയ്ത നൂതന റോബോട്ട് റോവറായ വിൽബോറിനെയാണ് കരാർ പ്രകാരം വിന്യസിക്കുക.
ഐപിഒ ലക്ഷ്യം
അതേസമയം 2029ഓടെ കമ്പനി ഐപിഒയ്ക്ക് ഒരുങ്ങുകയാണെന്നും രണ്ട് വർഷത്തിനുള്ളിൽ 500 കോടി രൂപയുടെ വളർച്ച നേടാനാണ് ലക്ഷ്യമിടുന്നതെന്നും വിമൽ കൂട്ടിച്ചേർത്തു. അടുത്തിടെ കമ്പനി അപകടകരമായ സാഹചര്യങ്ങൾ കാര്യക്ഷമമായി കൈകാര്യം ചെയ്യുന്നതിനുള്ള സെമി ഹ്യൂമനോയിഡ് റോബോട്ട് വികസിപ്പിച്ച് ശ്രദ്ധനേടിയിരുന്നു.
Kerala-based AI startup Genrobotics has secured a massive ₹80 crore deal from the Singapore government. Beating 600 global firms, Genrobotics will deploy 44 ‘Willboar’ robots for water infrastructure maintenance, targeting an IPO by 2029
