ചരക്കുനീക്കവും അടിസ്ഥാന സൗകര്യങ്ങളും മെച്ചപ്പെടുത്തുന്നതിനായി 35,800 കോടി രൂപയുടെ സ്വകാര്യ നിക്ഷേപം സമാഹരിക്കാൻ ഇന്ത്യൻ റെയിൽവേ. ഇതിന്റെ ഭാഗമായി 50 വർഷത്തെ ദീർഘകാല പൊതു-സ്വകാര്യ പങ്കാളിത്ത (PPP) കരാറുകൾ നൽകാനാണ് സർക്കാർ ലക്ഷ്യമിടുന്നത്. ചരക്ക് ടെർമിനലുകളുടെയും അനുബന്ധ സൗകര്യങ്ങളുടെയും വികസനത്തിനായി നിക്ഷേപകരെ ആകർഷിക്കാൻ ഭൂമി ഏറ്റെടുക്കൽ ഉൾപ്പെടെയുള്ള കാര്യങ്ങളിൽ റെയിൽവേ പൂർണ്ണ പിന്തുണ നൽകുമെന്നും സർക്കാർ റിപ്പോർട്ടുകൾ സൂചിപ്പിക്കുന്നു.
ഗതിശക്തി കാർഗോ ടെർമിനലുകൾക്കും മറ്റ് ലോജിസ്റ്റിക് ഹബ്ബുകൾക്കുമാണ് ഈ പദ്ധതിയിൽ മുൻഗണന നൽകുന്നത്. 50 വർഷത്തെ ദീർഘകാല കരാർ നൽകുന്നതിലൂടെ നിക്ഷേപകർക്ക് സുസ്ഥിര വരുമാനം ഉറപ്പാക്കാനും കൂടുതൽ വൻകിട പദ്ധതികൾ ഏറ്റെടുക്കാൻ അവരെ പ്രേരിപ്പിക്കാനും സാധിക്കുമെന്ന് അധികൃതർ കരുതുന്നു.
ചരക്കുനീക്കം റോഡ് മാർഗത്തിൽ നിന്ന് റെയിൽവേയിലേക്ക് മാറ്റുന്നതിലൂടെ ഗതാഗതക്കുരുക്ക് കുറയ്ക്കാനും വേഗത്തിലുള്ള ഡെലിവെറി ഉറപ്പാക്കാനും ഈ പരിഷ്കാരം സഹായിക്കും. ഭൂമി കൈമാറ്റം, പരിസ്ഥിതി അനുമതി തുടങ്ങിയവയ്ക്കായി സംസ്ഥാന സർക്കാരുകളുമായി സഹകരിച്ച് കൃത്യമായ സമയപരിധി നിശ്ചയിച്ചായിരിക്കും പദ്ധതി നടപ്പിലാക്കുക.
indian railways is seeking ₹35,800 crore in private investment through 50-year ppp contracts. the plan focuses on gati shakti cargo terminals and enhancing logistics infrastructure across india.
