ഇന്ത്യൻ ഉപഭോക്താക്കൾ കാനൺ ഉത്പന്നങ്ങൾ ഉപയോഗിക്കുന്നതിലെ മികവിനെ പുകഴ്ത്തി കാനൺ ഇന്ത്യ സിഇഒ തോഷിയാക്കി നോമുറ. ക്യാമറ രംഗത്തെ ലോകോത്തര ബ്രാൻഡായ കാനൺ (Canon), ഇന്ത്യയെ തങ്ങളുടെ ഉൽപ്പന്നങ്ങളുടെ പരീക്ഷണശാലയായാണ് കാണുന്നത്. ഇന്ത്യൻ വിവാഹ വിപണിയും ഗ്രാമങ്ങളിലെ ഫോട്ടോസ്റ്റാറ്റ് കടകളും കാനണിന്റെ ആഗോള ഗവേഷണ വികസന പ്രവർത്തനങ്ങളിൽ വലിയ സ്വാധീനം ചെലുത്തുന്നു. കാനൺ മെഷീനുകൾ ജപ്പാനിലെ എഞ്ചിനീയർമാർ വിഭാവനം ചെയ്തതിനേക്കാൾ വലിയ രീതിയിൽ ഇന്ത്യൻ ഉപഭോക്താക്കൾ ഉപയോഗിക്കുന്നുണ്ട്. ഉദാഹരണത്തിന്, ചെറിയ പ്രിന്ററുകളിൽ കട്ടി കൂടിയ പേപ്പർ ഉപയോഗിച്ച് ബുക്ക് കവറുകൾ നിർമ്മിക്കുന്ന ഇന്ത്യൻ രീതി കണ്ടാണ് കാനൺ തങ്ങളുടെ ആഗോള മോഡലുകളിൽ മാറ്റം വരുത്തിയത്. ഇത് പിന്നീട് ഇന്തോനേഷ്യ ഉൾപ്പെടെയുള്ള രാജ്യങ്ങളിലും വലിയ വിജയമായി.
ഇന്ത്യയിലെ കാനൺ വരുമാനത്തിന്റെ 60 ശതമാനവും വിവാഹ വിപണിയിൽ നിന്നാണ്. സ്മാർട്ട്ഫോണുകൾ ക്യാമറ വിപണിക്ക് ഭീഷണിയാണെന്ന വാദം നോമുറ തള്ളിക്കളഞ്ഞു. ഫോണുകൾ കൂടുതൽ ആളുകളെ ഫോട്ടോഗ്രാഫിയിലേക്ക് ആകർഷിക്കുന്നുണ്ടെന്നും, മികച്ച ക്വാളിറ്റി ആഗ്രഹിക്കുമ്പോൾ അവർ കാനൺ ക്യാമറകളിലേക്ക് തന്നെ എത്തുമെന്നും അദ്ദേഹം പറഞ്ഞു. എഐ സാങ്കേതികവിദ്യ ഉപയോഗിച്ച് മെഷീനുകൾ കേടാകുന്നതിന് മുൻപേ അറ്റകുറ്റപ്പണി നടത്താനുള്ള സംവിധാനങ്ങളും കാനൺ ഒരുക്കുന്നുണ്ട്. നിലവിൽ ഇന്ത്യയിലെ ക്യാമറ വിപണിയിൽ 30 ശതമാനം വിഹിതവുമായി കാനൺ ഒന്നാം സ്ഥാനത്താണ്.
