ഇന്ത്യൻ റെയിൽവേയുടെ ചരിത്രത്തിലെ സുപ്രധാന നാഴികക്കല്ലായ ഗതിമാൻ എക്സ്പ്രസ് സർവീസ് പത്ത് വർഷം പൂർത്തിയാക്കി. 2016 ഏപ്രിൽ 5നാണ് അന്നത്തെ റെയിൽവേ മന്ത്രി സുരേഷ് പ്രഭു ഡൽഹിയിലെ ഹസ്രത്ത് നിസാമുദ്ദീൻ റെയിൽവേ സ്റ്റേഷനിൽ നിന്ന് രാജ്യത്തെ ആദ്യ സെമി ഹൈസ്പീഡ് ട്രെയിനായ ഗതിമാൻ എക്സ്പ്രസ് ഫ്ലാഗ് ഓഫ് ചെയ്തത്. നിലവിൽ നോർത്തേൺ റെയിൽവേ സോണിന് കീഴിലാണ് ഈ ട്രെയിൻ പ്രവർത്തിക്കുന്നത്.
വേഗതയും റൂട്ടും
മണിക്കൂറിൽ പരമാവധി 160 കിലോമീറ്റർ വേഗതയിൽ സഞ്ചരിക്കാൻ ശേഷിയുള്ളതാണ് ഗതിമാൻ എക്സ്പ്രസ്. തുടക്കത്തിൽ ഹസ്രത്ത് നിസാമുദ്ദീൻ മുതൽ ആഗ്ര കാന്റ് വരെയായിരുന്നു സർവീസെങ്കിലും, 2018 ഏപ്രിൽ 1 മുതൽ ഇത് ബുന്ദേൽഖണ്ഡ് മേഖലയിലെ വീരാംഗന ലക്ഷ്മിബായി ഝാൻസി ജംഗ്ഷൻ വരെ നീട്ടി. ഗ്വാളിയോർ, ഝാൻസി എന്നിവിടങ്ങളിലെ ടൂറിസം സാധ്യതകൾ വർദ്ധിപ്പിക്കാൻ ഇത് ഏറെ സഹായിച്ചു.
സവിശേഷതകളും യാത്രാനിരക്കും
5500 എച്ച്പി കരുത്തുള്ള ഇലക്ട്രിക് ലോക്കോമോട്ടീവ് ഉപയോഗിച്ചാണ് ഗതിമാൻ കുതിക്കുന്നത്. ആധുനിക ബയോ ടോയ്ലറ്റുകൾ, സുഗമമായ യാത്ര ഉറപ്പാക്കുന്ന ബാലൻസ്ഡ് ഡ്രാഫ്റ്റ് ഗിയർ കപ്ലറുകൾ തുടങ്ങിയവ ഇതിന്റെ പ്രത്യേകതയാണ്. കോച്ചുകളുടെ ഫ്ലോർ പ്രത്യേക ‘മാരത്തൺ ഷൈൻ’ ട്രീറ്റ്മെന്റിലൂടെ എപ്പോഴും തിളക്കമുള്ളതാക്കി നിലനിർത്തുന്നു. ഹസ്രത്ത് നിസാമുദ്ദീൻ മുതൽ ഝാൻസി വരെ ചെയർ കാറിന് 1,140 രൂപയും എക്സിക്യൂട്ടീവ് ക്ലാസിന് 2,300 രൂപയുമാണ് യാത്രാനിരക്ക്.
