റെയിൽവേ യാത്രക്കാർക്ക് അവസാന നിമിഷം ബോർഡിംഗ് സ്റ്റേഷൻ മാറ്റാവുന്ന തരത്തിലുള്ള പുതിയ ഇളവ് പ്രഖ്യാപിച്ച് ഇന്ത്യൻ റെയിൽവേ. ഏപ്രിൽ 1 മുതൽ പ്രാബല്യത്തിൽ വന്ന പുതിയ പരിഷ്കാരം അനുസരിച്ച്, ട്രെയിൻ പുറപ്പെടുന്നതിന് 30 മിനിറ്റ് മുൻപ് വരെ യാത്രക്കാർക്ക് ബോർഡിംഗ് പോയിന്റിൽ മാറ്റം വരുത്താൻ സാധിക്കും. തിരക്ക് കാരണമോ വ്യക്തിപരമായ കാരണങ്ങൾ കൊണ്ടോ മുൻകൂട്ടി നിശ്ചയിച്ച സ്റ്റേഷനിൽ എത്താൻ കഴിയാത്ത സാഹചര്യത്തിൽ യാത്രക്കാർക്ക് ഏറെ ആശ്വാസം നൽകുന്നതാണ് ഈ തീരുമാനം. നേരത്തെ ഇത്തരം മാറ്റങ്ങൾ വരുത്താൻ ട്രെയിൻ പുറപ്പെടുന്നതിന് 24 മണിക്കൂർ മുൻപ് അപേക്ഷ നൽകണമായിരുന്നു.
ട്രെയിനിന്റെ രണ്ടാമത്തെയും അവസാനത്തെയും റിസർവേഷൻ ചാർട്ട് തയ്യാറാക്കുന്നതിന് മുൻപ് വരെ ഈ സൗകര്യം പ്രയോജനപ്പെടുത്താം. സാധാരണയായി ട്രെയിൻ ആദ്യ സ്റ്റേഷനിൽ നിന്ന് പുറപ്പെടുന്നതിന് അരമണിക്കൂർ മുൻപാണ് ഫൈനൽ ചാർട്ട് തയ്യാറാക്കുന്നത്. ഐആർസിടിസി വെബ്സൈറ്റ്, മൊബൈൽ ആപ്പ് എന്നിവ വഴിയോ അല്ലെങ്കിൽ റെയിൽവേ പിആർഎസ് കൗണ്ടറുകൾ വഴിയോ യാത്രക്കാർക്ക് ഈ മാറ്റം വരുത്താവുന്നതാണ്. മാറ്റം സ്ഥിരീകരിച്ചാൽ യാത്രക്കാരന്റെ റജിസ്റ്റർ ചെയ്ത മൊബൈൽ നമ്പറിലേക്ക് എസ്എംഎസ് ലഭിക്കും.
കൺഫേം ആയ ടിക്കറ്റുകൾ ഉള്ളവർക്കും ആർഎസി ടിക്കറ്റുകൾ ഉള്ളവർക്കുമാണ് ഈ സൗകര്യം ലഭിക്കുക. എന്നാൽ വെയ്റ്റ്ലിസ്റ്റ് ടിക്കറ്റുകൾ ഉള്ളവർക്ക് ബോർഡിംഗ് പോയിന്റ് മാറ്റാൻ അനുവാദമില്ല. ഒരു ടിക്കറ്റിൽ ഒരു തവണ മാത്രമേ ഇത്തരത്തിൽ സ്റ്റേഷൻ മാറ്റാൻ കഴിയൂ എന്നതും പ്രത്യേകം ശ്രദ്ധിക്കണം. അവസാന നിമിഷം യാത്ര പ്ലാൻ ചെയ്യുന്നവർക്കും ട്രാഫിക് കുരുക്കിൽ പെട്ട് ആദ്യ സ്റ്റേഷനിൽ എത്താൻ കഴിയാത്തവർക്കും തങ്ങളുടെ സീറ്റ് നഷ്ടപ്പെടാതെ തന്നെ അടുത്ത സ്റ്റേഷനിൽ നിന്ന് ട്രെയിനിൽ കയറാൻ ഇത് സഹായിക്കുമെന്ന് റെയിൽവേ മന്ത്രാലയം അറിയിച്ചു.
Indian Railways now allows passengers to change their boarding station up to 30 minutes before the final chart is prepared. Available for confirmed and RAC tickets via IRCTC
