ഇന്ത്യയിൽ 1,000 കോടി രൂപയുടെ നിക്ഷേപത്തിനൊരുങ്ങി ജാപ്പനീസ് എയർ കണ്ടീഷനിംഗ് ഭീമനായ ഡൈക്കിൻ (Daikin Industries). ജപ്പാന് പുറത്തുള്ള കമ്പനിയുടെ ആദ്യ ആഗോള ഗവേഷണ വികസന കേന്ദ്രം ഇന്ത്യയിൽ സ്ഥാപിക്കുന്നതിനാണ് ഈ തുക വിനിയോഗിക്കുന്നത്. ഡാറ്റാ സെന്ററുകൾ, വീടുകൾ, വാണിജ്യ സ്ഥാപനങ്ങൾ എന്നിവയ്ക്കാവശ്യമായ എയർ കണ്ടീഷനിംഗ് സംവിധാനങ്ങൾക്കൊപ്പം ചില്ലർ സോഫ്റ്റ്വെയർ, ഉൽപ്പന്ന വികസനം എന്നിവയിലായിരിക്കും ഈ കേന്ദ്രം ശ്രദ്ധ കേന്ദ്രീകരിക്കുക. പ്രമുഖ സ്ഥാപനങ്ങളിൽ നിന്നുള്ള 500ഓളം എഞ്ചിനീയർമാരെ ഈ കേന്ദ്രത്തിലേക്ക് പുതുതായി നിയമിക്കുമെന്നും കമ്പനി അറിയിച്ചു.
മാനുഫാക്ചറിംഗ്, കയറ്റുമതി, ഉൽപ്പന്ന വികസനം എന്നീ മേഖലകളിൽ ജപ്പാന് പുറത്തുള്ള ഡൈക്കിന്റെ ഏറ്റവും വലിയ ഹബ്ബായി ഇന്ത്യയെ മാറ്റുകയാണ് ലക്ഷ്യം. ഇതിനുപുറമെ, ഡാറ്റാ സെന്ററുകൾക്കായുള്ള ചില്ലറുകൾ പ്രാദേശികമായി നിർമ്മിക്കുന്നതിനായി 200 കോടി രൂപയുടെ അധിക നിക്ഷേപവും കമ്പനി നടത്തും. 2030ഓടെ ഇന്ത്യയിൽ നിന്നുള്ള കയറ്റുമതി 100 രാജ്യങ്ങളിലേക്ക് വ്യാപിപ്പിക്കാനും 15,000 കോടി രൂപയുടെ വാർഷിക വരുമാനം കൈവരിക്കാനുമാണ് ഡൈക്കിൻ ലക്ഷ്യമിടുന്നത്.
Japanese AC giant Daikin Industries announces a ₹1,000 crore investment to set up its first global R&D hub in India. The project focuses on data centre cooling, product development, and creating 500+ engineering jobs.
